اغاني الدرويش
#أغاني_الدرويش_رقم_1
اولا
أريدك گمره تضوي الروح ..
وإتحدر مشاحيف الحلم بالروح ..
وأجيك إبحسبه . . حداري . . وأرد بين الگصب مشحوف
إويطگ مني . .
الضمير إشراع . .
للوادم سفر . .
إو لعيونك أمر بين القوافي صور . .
مطر . .
مطر . .
زارگك يلتم إبروحي إويظل جيسة برد للصيف
ترس روحي العطش والملگه صبح إوطيف
أريدك . .
أريدك ساعة الغربة حبيب إوسيف
أريدك طيف . .
وإبنومي تفيض إدموع . .
ولو حزني ثچيل إو ما تبرده إدموع . .
مو گلبي عراق التنبض انهاره حزن وإشموع
اوتلمع عالقميص إدموع . .
وأحزن . .
يضحك الصفصاف . .
ولك حزني ظلام إولا درب ينشاف
أخاف . .
أخاف . .
أخاف حتى من روحي . .
انه إبلياك
سيف إيعارچ بروحه . .
انه بالياك
أرگص . .
يرگص إخيالي لهب عالگاع
أگعد . .
يشهگ إخيالي عليّ إبساع
وأسولف للظلام . .
إهناك . .
يلمع للحچي وإيموع
اذبّن روحي فد خطوه . .
وأسولف . .
للظلام إيموع
إبكل خطوه . .
اسولف . .
للظلام إيموع
وأجيك آنه إبدرب مظلم . . كل خطوه الحچينه إتموع
إوصدّگ لو رجف گلبي . .
يوج ليل . .
الشواطي إشموع
إوتلمع عالقميص إدموع . .
وأرگص . .
يرگص إخيالي لهب عالگاع
وأگعد . .
يشهگ إخيالي عليّ إبساع
وأطيحن لك . .
جمر يبچي الثلج ويّاه
إو لو نهر فرات إتغيّر إبمجراه
يعرضله ضميره إو يرجع إبممشاه
يوگف للحزن . .
وتفيض أهلنه إدموع
إولمض بالكوخ ضي السيف . .
إو مامش للمضايف ضيف
إوتموع الليالي إبنوم تنطر للصبح فد طيف
إويضحك للهوه الصفصاف
أخاف . .
أخاف . .
أخافن حتى من روحي :
آنه إبليّاك . .
سيف إيعارچ إبروحه . .
آنه إبليّاك . .
أجيلك بالحلم تبگه الليالي اوياك . .
ياخذني الصبح يبگه الحلم ويّاك
آنه بلياك . .
سفر بين الثلج والنار . .
جرح حنّه السيوف إبعار
ميت خنجره الاسرار . .
آنه وياك . .
عرگ حَن للچفوف إوجاك
إبليل السفر وياك
أموت إهناك
إبليل السفر وياك
أموت إهناك
أموت إهناك
إو ماهزك صبر روحي . . إولا سولف ضمير إوياك.
أذوب . .
أذوب . .
أذوب إمن الصبر مشوار . .
إو دمنه هناك عالجرفين
إو مامش للصبح أنهار . .!!
نساگيها . .
نساگيها . .
من ماي الخجل أنهار . .
ثانياً
روحي إلما لگت بالبچي . .
أسرارك . .
لذيذه وبيها طعم الموت . .
أسرارك . .
غميجه وماتعَرف الگيش . .
أسرارك . .
وأسرارك . .
أسرارك . .
أبروحي إوتلمض أسرارك . .
خناجر من ذهب تضوي
أو چم مرّه . .
إو چم مرّه . . أجيلك بالحلم . .
وأرجع . .
وأجيلك بالحلم . .
إومامش أثر يضوي . .
إو ياثگل ذاك الحزن . .
كبر الخطوه . .
إو رجع لسنين
ظلّت بالتراب إذنوب
سوِلفت ويه الصخر حَن للصخر أيوب
لابي تطيب النَفِس . .إولا روحي منّه إتوب . .
حيرة . .
حيره . .إو دربنه إلتوه . .
إتمنين أحطك حچي وبين الدفاتر ضوه
ملّت إدروب السفر . . إو مامش الروحي دوه . .
سافرت روحي إلك . .
إبكل خطوه . .
ظلمه إوضوه . .
خضره الشمس بالحلم . . اسودگمرها إيطوف
والنجمه تربة وضوه . .
وكت الصلاه إتشوف
سيف الذنب بالنفَفِس . .والروح چيحة دم . .
صلو إبكلبي چذب
باعوا عيوني إبتبن . .
دير الفرح بالحزن . .
إوخلي الليالي إتدور . .
وجهي الماي والناعور . .
إوصاحوا . .
إوصاحوا إبكل العمر . .
فد . .صو . .و . .و . .ت . .
يحمَر الثلج . .
گبل الغضب بسكوت
اويشب قوس القزح خطار . .
رايات المذلة إتفوت
إوياخذنه الحلم خطوات . . ولك بينه النِفَس وإنموت
ياسيف الثلج يلما خذيت الثار . .
ولك ظلمه . .
إوضواك العار . .
ياسيف الثلج يلما خذيت الثار . .
إومن يسمع إو يهتم . .
نهب روحي دبيب الخوف . .
يَمه الراس طوبة دم . .
شو تلتم . .
شو تلتم . .
سواجي الناس
من يدبي دبيب الخوف . .
عِمه عدنه السمع . .
والشوف
صوت إيجفل الميتين . .
نعارچ والرمح من طين . .
نعارچ والرمح من طين . .!!
إوتصطف الروح إبحيل تبني إمن النِفَس فد طوف .
حنينه الروح وكت الخوف . .
إخذ طولي جذع للطوف
إويمر الخوف . .
يمر الخوف . .
يمر الخوف برد أزرگ يلم روحي زمن ويطوف
ياخذني إبعِد ماجيت . .
وإيذبني گمر ما شوفة . . !!
وإبهيده . .
إبهيده . .
يدب الخوف . .
بالرجلين . .
يصعد عالجلد ليفوگ . .
يطگ جنح ابجنح ويطير
- ردتك . .
ردتك تجيني ضوه جنحان إلي وإنطير
اخاف الرس نسر إيصير
يطگ جنح إبجنح وإطير
وأكمش رجفة إعيوني . .
إبدربها إتحير . .
. . أجفل وأخاف إمن الجنح . .
جر النِفَس سيف إو جرح . .
آنه العطش گلبي ملح . .
غمض ولك
بالحلم مشحوفك صبح —
ويدور الزمن بالدم
يلم روحي شبگ للگاع . .
وأگوم إبساع . .
يلم روحي . .
وأگوم إبساع
أرد ألتم . .
إوكل شبكه تظل عالگاع . .
كوخ إمن الزمن والدم . .
وأشهگ بالدمع . . ليفوگ . .
كل شهگه منارة دم . . !!
گوه ألتم . .
گوه ألتم . .
خرابه الروح تتهدم . .
ولك گلبي حمامة وإتخاف من جيس البرد تلتم
إعيونك تلمض إبليلي..
إو تسهر للصبح سچين..!!
خطواتي گبر ميتين..
أوف..
أوف..
زغر راسي..
برد راسي..
هاك إيدي.. إخذ منها الفعل للطين..
إو ذبني إعله النعاس.. إسنين..
ذبني..
إعله النعاس..
إسنين..!!
*ثالثاً
فز قوس القزح بالروح..
هِدم نومي..
إو وگف خطوات..
للممشه فرح..
ردت أمشي.. دفع روحي..
نبض مجنون
سواني خوف إو فرح
ذبني إعله چفك دمع
إو ياخذني ليل السفر.. وياك سيف إو درع
إو رديت آنه المشي.. إبرجليه صار الموت
وحشه إشكبرها صرت..
كل خطوه لون إيموت
إو لگيته إهناك..
بعده إيعارچ إبمامش..
نجم..
دگ البُعد غايه
يظن بيده الشمس
قوطيه للچكليت
إو حچه إسيوف تفتح بالسمه إولايه
إو سعدي<١> السنطه بعيونه.. تعبر للحچي إمرايه
إو روحي إتصير گبل الموت..
گمرة دم..
توج وتطيح..
گمرة دم..
فوگ الثلج..
گمرة دم..!!
إو تتلگه السيوف إبليل وتغيض العدو إو تفرح
يوج بيها البرد مرات وإبماي الخجل تسبح
تشهگ إبطولي..
إو يرد بيها..
الجمر حالوب..!!
إو تشهگ إبگاع الثلج..
رمحين..
تصلبني واموت إذنوب
أتلگه وجه الصبح.. بلچن تموت إذنوب..
ولك دوم الشمس.. مليانه ندم وذنوب..
لو عدها بخت چا نامت إلها إبفيْ
عليمن هالسفر والضي
ندوخ إو مانعرف إنتوب
وحدك إو گاع الثلج بيها الضباب إهدوم
إلكل رگصه يرهم لبس إو لمّن تموت إهدوم
آنه الرگص للصبح..
وإنتَ الفرح بنجوم
وأرگص والثلج يلهب
من حدر الجدم للروح
ولك وج البرد بالروح
گبل الموت بلچي إتلوح
وأساهر للصبح بعناد وجه النوم في أزرگ
إو حلم خاتل على اكتاره..
إيتمنه الراس من يعرگ
واطيحن عالثلج فد نوب..
يسولفلي..
وأعرگ..!!
وأمي إتگول:
مو غنيت وإرتفعت إچفوف الناس
بالظلمه كتب..
آخ..
آخ..
لو راس المغني طرب..
وأمي إتصيح..
إو ينبت صوتها المهجور..
إنجوم إعله الثلج من دم..
يمّه إگعد
إبني إگعد
بچه إحصانك خمس مرات
والسته مضيفك.. وج..!
إنتَ السيف..
وإيموت الضوه إبدمك..؟
دمك سال
ولك فوگ الثلج.. دمك
إو شفت عالدم..
إهلال إمفطر إبحزنه
بخت لطفالنه إبكل عيد
إو مهر عنده رجل وحده
إو بعيونه السفر ترديد
او شمع گبل العرس ذايب..
مات إو ما لمس كل إيد
إو خيط إهناك للذلّه..
إيتحرك والضمير إيحيد..
يمّه إگعد..
إبني إكعد..
أحشم كل بنات الناس
تهلهل..
للضوه اليلمض
وحگ شيب السفر من يعرگ إو يلمض
نموع الثلج بالدبچات
يسيٌر..
للصبح انهار..
إو دمعنه هناك..
عالجرفين..
يتلگه الصبح شمسين
شمس تضوي الفرح.. للناس..
إو شمس تخبز عليها الطين..!!
<١>سعدي: هو القاص والكاتب الدكتور سعدي السماوي
الشاعر عزيز السماوي
كركوك/آذار/1971
تعليقات
إرسال تعليق