قصائد مظفر النواب الشعبية
هل تصبح الغربة وطن ؟؟؟؟؟،؟؟؟
سؤال لايعرف إجابته سوى الغريب
يجي يوم نرد لأهلنا
يجي يوم ....ونرد لأهلنه
يجي يوم إنلم حزن الأيام ...
وثياب الصبر....
ونرد لأهلنه
يجي يوم
الدرب يمشي بكيفه.....
وياخذنه الوطنه
يجي يوم
أنفرّگ الغربة على العالم ملبس
والحزن طاسات حنّه
زغارنه يعرفون
ألهم ظهر بالدنيا
ومدينة وناس
وجيران و گرايب
ما يگللهم طفل: غربة عراقيين
ويموت اللعب بيهم
ياطفل الناس مانعتب على اهلك
كلنا غربة
لاچن احنه نشوف كل الحزن يحبيب حبايب
يجي يوم
زغارنا يعگدون خيط الشمس بدرابين كل الناس
بلچي هناك حي الله طفل عن اهله غايب
تجي الدرابين
تاخذهم للبساتين
يلگطون الذهب خستاوي ذايب
يجي ذاك اليوم
لاچن انه خايف گبل ذاك اليوم
تاكلني العگارب
يجي يوم
الفرح ياخذ كل مساحي الحلم
يحفر ساجية
ويسگي العمر
ونگله ياعمي فرح
راح الربيع
والله طفطرة حزن كل يوم اخذها لمحطة
چم محطة چذب مرت ....
وشكثر سواق چذابين ياعمي فرح؟
والناس تتشلبه على الفراگين
وزعاطيط وزعاطيط افندية
شگـلّـك والله جطلة
ويخشون بعيوني ويگولولي سريع
والله چطلة
والله چطلة
ولك مخدوعين ...
چطلة
واصعد ويه الناس
هذا اليشتري وهذاك اليبيع
كل بشر يوصل محطة
ويشبگ اهله
وانا اشوبح من شبابيچ الفراگين الحزينة
انطر احد ... مايجيني
انطر الدمعتها چانت
نجمة تتلالى بجبيني
انطر انطر....
وارجع ردود لمچاني
وينزل بگلبي الصگيع
السچچ خلصت... ماوصلت...
ومشيت وحدي بلايا سچة..
ايه ياعشگ الماله سچه
ياوطن
يا بيك
وبلياك اضيع...
يجي يوم اركض بالدرابين
اتعلگ بالشناشيل
ابوس البوب الحياطين الشبابيچ
ورجلچ
واگلچ يزي يا بغداد
يزي الغربة ربتيلي علل
واسمع حچي يسم البدن
واسكت واگولن شحچي يحبيبة الوكت گواد
اخذيني لسواد الليل اسمع طوشة توگع
واگعد صغيرون كلش حدر تينة
مثل متزهر ازهر
واسمع زريزير يزرزر
على كيفة
ودجله هناك ليغاد
اخذيني وحگ عيناچ
عگرني الليالي ودنجن من شافن اسمچ على راسي
وبية طن عناد
يگلي فريخ
توة يهذري
ما اعرفچ لون رديت
اذا ما عرفچ انه الدنية ما تنراد
يجي يوم نلم حزن الايام
ونرد البواچي للگلب
مثل الشبابيچ بأيام المطر
يجي ذاك اليوم
لكن خايف اتعب
گبل ما حظنك بأدي الثنين
يا كلش نهر
يجي ذاك اليوم
وان ما جاش
ادفنوني على حيلي
اشبح لنيرة هلي
رايحة لبغداد
اعظ الچفن واركض ورة النيرن
جاي يا بغداد
حي ميت اجيلچ
بالگمر جايچ وبلايه گمر
ترافة
وليل
ودك ريحان
يا أسمر لا تواخذنه
يلن .... كل دكه من حسنك ..
شتل ريحان للجنه
ليالي ...
ودك نحر حدار
وأحنه الشوك ناحرنـــــــــه
تحنن ..
دوس ..
فوك الروح ..
واحسبها علي منـــه..
أطكن ورد ،
من تجزي ...
وألف نمام .. يتحنه
بترف جدميك أطيرن فوك ...
فوك الفوك ...
اكتن عالورد
مزنه
من اشوفك..
انذر النجمات ترجيه لسوالفنه
ووديلك هوى شكابين ...
وتردني بطرك ونــــــه !!
بوشل هجرك ، يلمذبل
شتلنه العشك والصندل
تنينه..
وكل هجر حمل ،
دمع نيلي ... وسعد اسود
ترف وانته ... ولا سعده
ولا ما مش
ولا أزود
حسافه اسكيتك بروحي...
وحسافه العمر ما ورد .
حمام نسوان..
......
حمام نسوان
حزنك چماله شته
وگاعد لوحدك غاد بزويه عمر
والگهوة چنهة سنين نطرت ناس
مسحتهم صفنتك
مطر كلش مطر
والشارع مغوش حچي
وريحة ناس مالك شغل بيهم
عينك مرايه وكت ما بيهة احد
وانت ضايع مثل ورگة يانصيب انتهت
وتدور الجرايد بلچي ريحة وطن
وتغمض عيونك وين راحو
يعني حلفو ما يجون ؟
تمسح الليل والمطر
ترسم على الشباچ دويرة صحو
برجفت چفوفك بلچي جيتهم تشوفك
ما اجو شسوي يعني ؟
ما اجو
تثاوب تعد الكراسي الفارغة
تعد الليالي الضيعتهة بهل زويه
وتصفن بواحد گبالك
بلش يزنجر مثل شرطي بعيد
انت والشرطه عرف من زمن المرحوم ادم
تطرد افكارك
تلم روحك تصغر بالزويه وانت عالم
تحلم بحمام ريحه مستحه ونسوان
بين فخاذك يدورن على الصابونه
ويصبن نهدهن والمسچ فوگاك
وطاسه ضحك
وانت بگد الاصبع
صوتك صغيرون يلعلع
يبدن شويه اصابيعك يفهن
يبدن افخاذك يرطنن
تبتدي تحب التمر
يوگعنلك جلف
تلمع مثل قوري صغير
وتتراعش ركبتك
تنظف انته !
لچن توصخت نظرتك
مدري وين تزرزر عيونك بالزواغير ؟
وانت صغير
وانت صغير لگطه مسج و زواغير ومطينه حسبتك
ياخذنك بالمناشف
حيل ينشفنلك فخاذك حيل
وتگلهن شنو الصابونه من جديد ضاعت ؟
يضحكن ساعات
لليوم الضحك بأذنك
يدفننك دفن جوه وزرهن والروايح
لچن العصفور الصغيرون مارح
يضحكن وگلوبهن تسعر جمر
گاعد انته وحزنك الما ينتهي بگهوة بعيدة
يجي شرطي جديد بالكاغد
ينشدك
وين حمام الزلم ؟
تصفن !!
زلم !!
ضلت زلم ؟
وتدير عينك غاد
وتمشه بجريدة لچن يصب الدمع
نهر يرسم على حروف السود
وكربه مسيسه
كربه كلش لچن تشيل الوطن فوگ الدهر زفه شمع
يا شعب لو شفت كربه الزمن لاعب لعب بيه
وحزينه وراسهة يلعلع لالله مكابر وحب
يا شعب هذي كربتي
وفوگ هل الايام شموع حمرة تشتمع
صاحت الدنيه عليه ثگلت كربتك
خلهة تثگل
وين ما اسمع غريب يلوب اشيله
يگلي تغرگ
يا عساني بعشگ اغرگ دوم
ولا وحدي اطوف بلايه ديرة
وحبلي منكم ينگطع
ذيب حزن الليل
رائعة ذيب حزن الليل
الكاملة بدون اي اختصار
مظفر النواب عام ١٩٧٨
....
ذيب حزن الليل
صيحة ريل خالي
ومثل الفراگين كلش
حزن مربوط بحزن
وانه كلما گلت اوچيلي بمحطة
تشيل الضوايات وتمشي
والگة چوله روحي ويه الچول
تصفر ناس وتراب وتبن
بطلت ماعاد احبك
لچن بگلبي نزيزة عتب
خلينة انتلاگة
چنه ما نعرف بعظنة
والعمر والليل ونفثات الحزن
ولك يا اخر محطة بليل عمري
مثل الفراگين كلش
مثل نظرة تواسي ميت
مثل دفتر فارغ من الناس ورازونة سجن
چنة خدك مر علة الزعرور
وشال الفي وحطة بوسط حجري
والحواجب چنهة مطرت گبل ساعة
ورسمت النوم عله صدري
والصبح كلش
والبساتين عرگانه مسچ ودموع
احچي بكل حرير الله التعرفه وياك
وتگلي خشن
خشن حزن الليل
صيحة ريل راجع من وليف بعيد كلش
مثل الفراگين كلش
حزن ينطخ بحزن
______________
سهرنالك دهر ..ما جيت
ورزه وباب وشبابيج
خضرن من مدامعنا
كون الدهر بس وياك
بلياها الاوادم كلها والجنه
وزه توازينا موش تراب
بچانا القفل بالباب
لگينا السلف متغير
مثل ديرة غرب
خلف الله چنا احباب
ردينا نتعارك وي بواچينا
ولا شبيبيچ يحاچينا
عساها بالگصب يفلان
حوبتنا..ومدامعنا ..وتراچينا
عساها تخضر التينه
ونمد بفيها السواليف
راحة بال وخبزه
وستكين چاي تكفينا
وعلى ركبك
مثل ما چنا وحنا زغار
ننسه رواحنا
ونغفه لهذاك الصوب
ياخذنا السعف ل الله ..ويرد بينا
مظفر النواب
________________________
روحي ولا تكَلها : شبيج
وانت الماي
مكَطوعة مثل خيط السمج روحي
حلاوة ليل محروكَة حرك روحي
حمرية كَصب مهزومة بالفالة ولك روحي
وعتبها هواي ....
لا مرّيت ... لانشديت .... لا حنيت
وكَالولي عليك هواي
وعودان العمر كلهن كَضن ويّاك
يا ثلج الي ماوجيت
تعال بحلم ... ,أحسبها إلك جيّه واكَولن جيت
يلي شوفتك شبّاج للقاسم ... ودخول السنة من الكَاك
يا فيّ النبع واطعم .... عطش صبّير ولا فركاك
يلرهميت ... يا مفتاح فضة ولا رهم غيرك عليّ مفتاح
أجرت لك مخدتي وانطر الشبّاج اليجيبك
وانت عرس الليل والقدّاح
يا هلبت تجي وترتاح ؟؟
طركَــ المسج والنوم ...... طركَــ المسج والنوم
عمر واتعده التلاثين ... لا يفلان
عمر واتعدّه واتعديت
ولا نوبة عذر ودّيت
وانه والمسج والنوم ... واغمّض عود اجيسك يا ترف تاخذني زخة لوم
واكَلك : ليش وازيت العمر يفلان
يفلان العمر ... يشكَر ولك يفلان
وهجرك دم ... كل ليلة اشوفك بالحلم عريس
اكَول اليوم يجيبه .... خلص كَلبي واكَول اليوم
ولا مريت ..ولانشديت
ولا طارش جذب ودّيت
ولا مرّة شلت عينك تعرف البيت
وكَالولي عليك هواي .... ورحت ابراي وجيت ابراي
حسبالي سنة وسنتين وتلاثة
واشوفك ذاك البكَلبي .... واضوكَــ الماي .. واضوكَك ماي
حسبالي اشوفك ابن اوادم .... يا شكَلك ... موش اشوفك هاي
ولا مريت ...ولا نشديت
ولا جيت اعله بالي
تبيع بيّه وتشتري بالسوكَــ
لا ما جيت
وكَالولي عليك هواي ....... كَالولي ......
كَالولي ........
كَالولي
_______________
فرشت شليلي بدروبك
ابيع العشگ للدنيه
هظيمه تحنن الشامت
عليه وتشتمت بيه
چثير گزازك بروحي
واگولن هاي حنيه
من اتلك بالحلم يسمر
يجي القداح بيديه
واعتك واطبج بحرگه
رفيف الريه عالريه
تسيل دموعي بچفوفك
دمع برمال نجديه
واگلك وين هالغيبه
سنه وبالحلم منسيه
شگلك وانته هالمايع
وانه من الحرگه زهديه
يمايل فرگ كل مايل
فرگ بالعشگ عاريه
واشل هجرك يالمگذل
شتلني من العشگ مشتل
شتلني الهيل والصندل
تنينه وكل هجر حمل
دمع نيلي
وسعد اسود
ترف انته
ولا سعده ولا مامش
ولا ازود
حسافه سگيتك بروحي
وحسافه العمر ماورد
________________
أيام المزبَّن
مظفر النواب
دِكَ راسك ، ابكَاع العرس
واصعد مراجف للدف
أيام المزبَّن كضن
تكَضن يا ايام اللف .
هيلك صلف . كلّش صلف
تلني وِلحس بِعراني
أشحرّك يا ابو عكَال الترف
دكَ غفوتي ووعاني
من ازمان شوك مياسمي
وما مِش نده بغدراني
وانت عل أخضر بايع العشره
شَكَلّّك . تاني ؟
دِكَ مَتنك ابحجل العرس
وانكَز نكَزتك للدف
الدنيه غرشه ، وهم تِتن
وتدور بينا ونلتف .
يا اسمر . اشكثر اتغرنكَت
يلما شفت مثلك وِنس .
ابعد يّبعد امحبتي
انوجي عله غروب الشمس
خَل نوصل إلفيّة كَصب
واذبحلك أميّة النفس
سِتري بعكَالك يا ترف معكَود
وفَلته بمي العرس
دكَ سترك بستر العرس
وبضحكتك حَنّي الدف
عطشانه , وأنت أُميّتك
ما توكَف بحنّة جف .
حته الكَصب شَب ابعِكَد
بوسه تشِب من بوسه
حِسها شدهني
وخاف كَلبي
ولذت بالجاموسه
جا هاذي عملات العشكَ
كَلبي ، وأكَلك دوسه
موش انته صوجك يا شهم
كَلبي وكَع ناموسه .
دِكَ راسك ابكَاع العرس
واصعد امراجف للدف
أيام المزبَّن كَضن
تَكَضن يا ايام اللف .
هّدِّل رموشك
هَدّل اعله الروح
لَمّن تروَه
يمعذب ظنوني
ذراني الشوك
وانت بذروه
خي لا تعذب الروح
يا مدلول سَوه أمره
كلفه أكَلك
تذبح الزردوم
حَبة الخُوه .
خنر وجفية غوه
وكل كَذله ريحانة طَف
جني مشيت لدخلتي
ويدفعني رمشك لو رَف
ابياهي أعاتب ؟
شو بحت روحي
وكَضت توميلك
طرزت روحي
بريسم أشكَر
يا ترف ، بشليلك
كون آنه مُهرتك
كل العمر واحجيلك
جم دوب اعاتب
والعتب ينساك ويساويلك
أبدي عتبي
لو إلَك كَبل العتب عذر ولف
كَبلك يغالي ، نومتي
لا الها مخدّه ولا شف .
جم ليطه من هذا الكَصب صابتك
واسلتها بصبر
دَمنَه اشكثر حنّه الشِلب
واشكثر داوينه اشكثر ؟
جم سكته فوكَ الموت
ولوبة جوع وتترجه النصر ؟
دكَ راسك
براس العرس
واشرب دمعتي بالدف
أيامي وايامك كّضن
بين المزبَّن واللف .
التمسك ، أبرد الصبح . أزركَ
امرصع بالشذر
التمسك ، بفي الضحى
أمسَلهم بنسمات الفجر
التمسك بجود النبع
بأميّته ، بحر الظهر
لا تجي شايك عذر
كَلفه يلسمر تعتذر .
عذرك يحزني من النحر
لا تجي ولا تتوسف
خلِّ الفراكَ بلا شمس
والدمع بالفي يمشف .
اش . لا توَعي المزنه
وتسودن حنيني بعذرك
آنه كَربت بور الفلا
وطشيت صبري وصيرك
وسكيت ، وضميت الشمس لليل
عود انتظرك
تاليها ريحان وملح
جا هذا كَدري وكَدرك ؟
عذرك ، يشكَ مرارتي
لا تجي وتتوسف
جذباتك تسل الخشب
يفلان وتشكَ الدف
نَعثِر كَذلتك
ودَلع زياكَك
بعد واتعَدل
ظلت انجيمه والصبح
كِلسه يتثاوب منجل
والسلف دخان اكَهوه
ودلة الصبح تتدلل
نامن بنات الناس
والشكَره بحنطتك
يَمَك تصهل
حط راسك بكَاع العرس
واشرب حنينك بالدف .
حنَّيت جفي
بلا عرس
للعتب عود أندهلك
ولضمت كَذلة مهرتك بدموعي
كلهم لَهلك
لا وين ، كَلي يا ترف
شميَّل الدنيا
________________
اجيتك والسلف نايم
على رويسات اصابيعي
سريرك دخن بروحه
انفضحنة بريحة العطاب والعنبر
دخيلك هود النياران يامخلوگ
صاحو ناس حچي مايلبس فوگه عگال
كل الصار
دخانه صغيره غيمة من جاسني حزامك
لگو حتى العشب محروگ
ماعدهم شغل هل ناس
گالو شافو البوسات بل مظبوط
حلفو بالخضر بثوب شگ أجديد
چذابين
من سنين ثوبي من النهد مشگوگ
ماطول الحچي الماصخ
يضل ماصخ ، عليش انبوس بل مفرد
خلينه نتباوس كله بل مشمش
واذا كلش توازينه فواكه بوس بل صندوگ
اگلك هاك اخذ ، الگاك فوگ الهاك انته تبوگ
زلمنه تخوض مي تشرين حدر البردى تتنطّر
زلمنه اتحز ظلام الليل تشتل ذبحة الخنجر
زلمنه الماتهاب الذبح تضحك ساعة المنحر
يساگي الشمس من عينك ابعز الشمس حب اخضر
لون حلت نسمة ليل شعرك تنشگ العنبر
أحط الحجل للثوار گمره زغيره على المعبر
وأشيم أترف النجمات فوك شراعكم تسهر
سفن غيلان ازيرج تنحر الذاري
لون ودت سفنهم يمك أخباري
وحگ عينك احط الروح عل الساري
وأگل الحسره بشليلك واشوفك ازغر اسراري
وأفك الشبگه من ابعيد أغله شراع
أشبگك شبگة النسمات للنعناع
ليش الروح يامدلول يمك تنشره وتتباع
زلمنه اتخوض مي تشرين الأول
حدر البردي تتنطّر زلمنه تغني والخنجر يشگ الروح
لون كل الگصب غنه بحنيني لشوفتك يا أسمر
يسيل الگصب سل اصفر واظن المأي يتمرمر
واظن حته النجم يطفة زراگه ولا بعد يسهر
سفن غيلان ازيرج تضوي بالعبره
ياغيلان گلبي شيصبره
اخذ كل الزلم وأملي السفن ياعيني الله وياك
وفد چلمه عشگ حلوه اظن الها مچان هناك
ذبهة بسكتة الغبار ياغيلان
خلهة اتعانگ السكان ياغيلان
شارة نصر للسفان ياغيلان
يامعود دخيل امروتك السمره
دخيل الشوگ احب چفك
احب ايديك وشوف شفاف لو جمره"
___________________
عله كد البريسم
صفنتْ يملثّمْ بالموْزَرْ
والغارهَ تـﮔـولك للغاره
ولنْ بيرغْ وايدي عل الصفنه
ولو ﮔامت ريح تطﮔ ناره
وصفين الدﮔ بعضدينك
مشطين تزّتْ العبّاره
مودّعْ بالبارود العنبرْ
يلعينك شـﮔ الله بخنجرْ
وحزامك عل البشت الماطرْ
عربيد مناطر عل الورورْ
ومروز الريحان تهمهمْ
لاذيالك حته الذبلانه
حتّه المكسور بخاطرهه
وعطشانه تـﮔلك عطشانه
وزناد الكسريّه يتوّزْ
والضكك بحزام المرعز
يلممشاك بهونه وتردس
عزبه وشباج من اعتابك
وحده يعرّس
هونك هونك
كلش هونك
عدوانك بالزور نطاره
فييني بصدّات عيونك
جيتك أركض للدغّاره
وخذني بجفينك للمفرﮔ
أشبع موت وذبني حجارة
صدّاتك شذراتْ المحزمْ
والخزره بريسم وبشاره
وتسهرلك كسريّه تهلهلْ
بعيون المخفر هدّاره
ومن ديره لديره نوصيلك
وزلام بذجرك تتباره
وريجك طعم خيارة شاطي
ورشة مزنه
ويتشد بطلع الزهدية
من تشوفك ضك مشابكنه
وتتنده سواجي المهجورة
وثوبي تلف عليه طيوره
وتستعدل روحي المديوره
وضكني الجمرة بضك الدله
وطعم الهيلة يـﮔب بجفّك
والشمامة وورد العلّه
وعرس امك وامي ويتلاﮔن
والسبعه يذبن ميتهن
بالـﮔمره وخشلك يالهاون
والـﮔمره بميّتنه تغرّزْ
والضكك بحزام المرعز
ﮔمرات ثلاثة ولا بيّنْ
طارش منك نمشي لناره
وخزامت عرسي عل الشرجي
تشمشم بارودك وأخباره
وأهجس كسريتك بالحندس
كللي ـ شجم كسريّه معرس
هونك هونك
كلش هونك
عدوانك بالشط انطاره
*
خلي الشبكه بعمر الورده
وشبكه النوبه
وشبكه النوبه
وحد ما نذبل حدر الغتره
وسجّة كحلك دﮔهه بعيني
يموت حسابي
وتطفه العبره
وكل شهـﮔه التشهـﮔهه بصدري
تدﮔ لك عشره
يالساكت والتحجي طيوفك
وأتدّافع آنه وكل ﮔلبي نريد نشوفك
واشبع منك؟
كون الطير يشوف الماي
ويشبع منه
كون الترفه
تحل ﮔذلتهه
وما تفتك بيبان الجنه
وكون أتمنه
وكون اتمنه وما مش حدر ﮔليبي عريضي
شجرن ﮔمرات الصبحية
وعطّ الجول بنفحة عنبر
وآنه الما نيمني عيوني
كل ليله ولنك ﮔالبني
وكاسر ماي الظنه بروحي
وما تنزل وتبور ظنوني
ونزلت للشط كل مكحله
تفرّ الجرفين بطرتهه
وشبعانه سوالف ومشابك
ليش انه بعشـﮔك سياحه
وكلهن طابـﮔ
موش حلفنه وكلنه نموت
وما نتفارﮔ
جا ليش بساع تفارﮔنه
جذاب امشينه مزعلينك
جا دلحـﮔنه
نفك لك كل بيبنان الجنه
وفوك الجنه وفوك الفوك
الفوك الجنه
مو بتوهدن، وياك هواي توهدنه
لو رديت أعلـﮔ دايرنه
وجياتك أفرش بيديهن
ضحجه وحنه
وافرش لك بالعتبه شليلي
وثوبي الأسود
يفتك حزنه ويفرح نيلي
وتخضّر الرزه من دموعي
وضحجة وبجيه تطﮔ بعيني
لو رديت انته وذاك انته
وكسريتك فوك تفييلي
اتبلل واتفتفت بيدك
وبتالي زبونك المطرّز
امسح ضحجاتي وبشليلك
موش مصدكه وموش مجذبه
وموش اﮔدر، أﮔدر احجيلك
بسّنج بسج يا روحي
وهمانه وما مش من رده
تظلين حبيبه عل السده
تظلّين تـﮔلبين عيونج
بالعبّاره وباليتعده
وقداحج يتناثر منج
والليلة طويلة ومطّاره
هونج هونج
كلش هونج
للشامت يضحك مشواره
وللمامش يضحك مشواره
___
_____________________________
الباصات على اهبه العودة الى العراق
وطفل دفنت امه بالسيدة زينب بدمشق
ان شاء الله يردون كلهم
وانت تتشله لسطح الباص
وتحمل حزنهم والجنط والعمر وشويه اماني
وتضحكلهم وانت ترحي گزاز
عالضلو اجباري بتربة الغربة
وينطروهم اهلهم
تلتفت ليغاد وتصعد طفل بوسته امه والقفل من الشباچ ونذرتله وغفت غفوة طويله
تمسح بوصلة قميصك خشمة الصغيرون
تاخذ چفة بايدك نهر من خباز
تضحكلك مثل فانوس زفة بلا فتيله
تنزل الدمعه على خدة گزازة خضرة
يغوص بالكرسي
مثل صندوگ فضة صغير
ضامم ضحچة امة بالحرير بليل صدرة
وين
وين نروح عمي
گلبي الليلة يوجعني اريد امي
تشوف بعينة حفرة شلون حفرة
تگعد تسكتة
الگمر لو غاب يرجع عيب تبچي
شوف يوليدي البيارغ كلهة خضرة
وگضن الباصات يمشن
وامك تنطرك ورة الچولة الچبيرة
امي انه
ويصفن بحفرة بعيدة
ويبتسم لله ببراءة
وخشمة الصغيرون نايم
چنة حضرة
امي خبازة
اخدهة بچفك بهيدة
تراهي الدنية عضتخة بچثير چلاب
وتگب بحزن نضرات ليل غبرة
امي
يصفن غاد
ودولاب الهوة يدور بنظرتة
بلاد فوگ بلاد
بلاد العرب اوطاني وبليه بلاد
امي وامك تگله وجميع الناس
وتبوسگ گبلنه
وترجف شفافة برجفة شفافك ببغداد
اي بغداد
من تجيب اسمهة شفافك تضوگ الثرية
ويمتلي گلبك طرب وعناد
ويگلك بعد احلم
ويذبلك على الخبازة حامض حلوة
مثل شفافة تاخذهة بدمعتك
تنزل بسرعة
تضم الدمع لچن تمزل الدمعه
تضحكلك صواني شموع
وانت تبتسم شمعه
ويهوميلك عليش نزلت
تسكت
صار الملاگة صعب
والغربة صارت صعب تندار
واخاف يصير المزاود واضل ساكت
و بحر غاد
مو كلمن يحب بغداد يحب بغداد
يا ناس العشگ اسمة عشگ
ويفض نوبات العشگ نهرين
ودشداشة طفل يركض يريد الله
يگله امة خبازة
وليالي طويله لولتلة
من البصرة لثلج الله وطنة
والگمر نوبات يگول اسود
وطنة وين اكو طيبين
واطفال وعرب واكراد
وطنة وين اكو نخلة ونهر
وبيوت تتلگة الغريب من الگلب
وتگله انت البيت واحنة ظيوف عندك والملح والزاد
____________________
ثلثينك اسمر للحنطة
ثلثينك اسمر للحنطة
و من تشهگ چن جثة بطة
چملني بنهدك نص غطة
انبگلك چن فحل الوز
جريت ثيابك للصرة
وشفت الدگ واصل للبصرة
كتلك نلعب كتبة وطرة
فنك كتلي تعدي الحز
حز خصرك فرارة فضة
وشامة بنص خصرك معترضة
همي بفضتك شنهي فضة
غير مكابر بوس ولز
تدريني ما ضگت فراشي
من يوم اللاگيتك ماشي
وي غيري وطعمتة الراشي
وبس انه بعشگك مز
ترجيتك سديت الباب
مغيرير وما تسوة عتاب
حگك يا شجرة عناب
لچن نگدرلك بالهز
ياما هزيناك الغبشة
وعنابك طاح على الفرشة
ونزلنة خديدك عن عرشة
وعلمنة عرانك عالرز
گالولك انه من الطين
صدگو
بس طين بساتين
طينتهم صبخة وعفنين
و دود البيهة ماهو قز
تذكر يامة سكرنة بريجك
وايدنة تصلي بشگ زيجك
يا ضيج عين شما ضيجك
جرة عينك جود وعز
بستاني تحفالك يرعش
يصغير ما ضاج المشمش
تسألني بيا خمرة مغوش !
بالينجاس بگطنة يفز
بطلنة نحب شنهي طلابة
لچن نوبات ندگ بابة
ونگله شلونك يطوي كتابة
كلساع دمعه بعينة تنز
صوجك ضيعت الايام
كلما صحي الليل تنام
شميتك شمة شمام
و گتلك باچر
باچر سز
_________________________
لقد سرقنا مرتين "
1965
بحزامك مفاتيح السوالف
و أنت تدري..
ضيعينه الباب و المفتاح
و شراعك شليل الليل
يحچي للسمچ ،
سالوفة القدّاح.
سولِف يا حبيِّب،
لا يجينه فراگ،
و يحچي وياك ...
و يبوگك.
أمس باكَوك...
و نشدوني عله أوصافك،
حِرِت..
راويتهم كَلبي، و كَلت يرهم عليه مفتاح.
____________________________________________
گطرة امية نداها اليل من قداح خصرك..
وانه ضبة بخور خلصت بالوسافة
وظلت العطابة..دخانة وعود
كبل ما شوفك وشيش بروحي يزعل
اعرف انت...وخيمة النعسان ما آلها عمود ..
فرد نوبة بالسماحة...انطيني من زودة حلاتك..نفس راحة
اني گاتلني المسچ..... مشمشه بنص بگلب خدک
ادري عنبر ..وادري عود الياس صدك
يا سمح كلش سمح ليش الصدود
سطري ضايع..مثل عصفور الشرايع.
..والفكر متخلبص بحزني وشايع..
ارتعش حيل من اشوفك..
مثل تكية المامش..نفضاها اليل فوگ النبي هود
روحي عيدية مطر..جايه لمراجيحك اتعيد.
حطلي بيها بالچذب بالعيدیة ..صم چذب
سماکه.. فصمة تمرة عود
على ياهي اتلوم ..والوردة اجت فوك النزيزه ...
وانت نهدك جلجل ازغيرون ..يلعب على ريزه ..
لاحني بچفه اعل خدي ..بنص عذر مسقول ..علمني الحدود
روحي عيدية مطر..جايه لمراجيحك اتعيد.
حطلي بيها بالچذب بالعيدیة ..صم چذب
سماکه فصمة تمرة عود
امني..نومة ليل ..وانطر..
فوكي يتراجف جفلها..
يا خشلها يا تبارك...
يا عرس اية اعل اية..
يا عنگ ساحة مرايه...سنيني راحت بيك..راحت چنها جایه
اصعدت ارکض وامدلك باية باية..
والحسود بعینه عود
لا تحط شمعة افراك اعل المخدة
..احنا شدة....
احنا كطرة ماي..وكطرة ليل ..
تتلاكه اعل وردة..
احنا قصة تين وشهكة عطش..
تتلاكه بمودة..
وننعكد كون الله بينا
من المدينه للمدينه..
بجاه كل بوسة اعل خدك لا تكلي اني احبك على مود
تراها الدنيا تمطر..والكلب درجاته مرمر..
وين جيدك ...اني خايف كودني بريج المسچ ..واعمیني عنبر .
وين ماشي وگلك امچلچل علیه مدري ماشي مدري راجع .
هيجت كل المواجع..
حبة الحنية يحبيب...لذوذ
چن جناجل تصهل بذیچ الاصابع
شابگک واتگلي اشبگ
وابتعد چذابي عنك ..ارد اسمعك بذني هاي اتكلي عود ...
انت شايفني رحت خاطر اعود .
شبيدي گلي ...اني ما اكدر عليه..
خصر خصرك لو تقية.
لو محابس ليلو شامرها الحسن ملوية..
والشمسه طشت واهليه
افيش ..يا شهكة حلاوة مستكية
..بخنصر الايام اضوگك..انت اكبر من اديه...
واني شككت الدفاتر فرد مره.
لكن الايام .طفيرة كمر والروح خضرة...
اشاااااه .من حطيت ثلجي اعل النهد..نيران كبره..
وجاوبتني بكل برود...
يا وسافة ...يا وسافة..
ما شفتني..وعطبيت من الوعود كون ابوسك نفس واحد
للسواجي للمعاتب ..
ليلة هاجت ..جنبدة محجيها ربك
للضليلة
اختنك بيدك واصبح بالجليلة..
بجاه كل عصفور ضايع لا تروح اوياي كلش...ضيعت راس الشليلة..
وغصن تفاح اعل ساجيتك .....
____________________________________________
عاتباني بحركة لاجن عالمودة
لز عليه النهد
وكلي اكطفلي من شفافي وردة
ضحك والرصعات
طشن الله ليلو بنار خدة
وسحب ورور ماي ورشني
ومن جذب موتت روحي
ودنج وصدك متت
اخذيته هو وروره الكاتم
وعركنه المخدة
____________________________________________
النواب العظيم يرسم لوحة
من لوحات الثورة والحب
تمتعوا معنا بروعة القديس
ابن ديرتنه حمد
حمد يل مزكتو سرجه
حمد بالليل البعيد
حمد والمهرة الحليبية المسعدة
سياكها متيل جديد
ابن ديرتنه حمد وده
الشمس تضحك لاْهلها
ابن توتة بيتنه الخضرة
المطر الازرك غسلها
ابن البساتين المغبشة
حمد والبربنه الحمره فحلها
حمد من جف المعيل
حمد بالليل البعيد
حمد بو كلب الخشف
وده الشمس لامها
وطلب حك الطبر
دعن الربعات كلهن
والحمامات لحمد
كالن عبر
حمد المغضب عبر
مغضب عبر مغضب عبر
طفر الغراب بالمهرة الحليبيه
اللي شوفته سفر
بلل جروحة
ومسح بهداي قصة الثار
بأمية نهر
حمد من ماي المجر
اكرموه الكمر واهلالين وست نجمات
ما راد الكمر
جدموله الليلة المرسنة لحوافرها
الثلاثه انجوم خضرة
حافر الرابع حمر
رختوله النجمة اللي تبوس الشمس صبحية
ويخوف حسنها
الليل كله وساعه من كلبه يطول الليل
يتضاحكله سنها
حمد من هور الدبن شله
بنجمة الليل والكمرة غرض
أي يلبكلبه طبر
شتداوي من كلبه الثريا
وشيفيد الكمر
وحمول العشيرة مذبحين ابليل
البيرغ حزن
وحمد من هور الدبن
حمد رد الزاد لاهل الشمس
والمهرة الحليبية حدر فخذه بجت
حمد رجل زين ومأصل
حمد حظ وبخت
حمد شله بالخزاين
حمد شله الدرر
جرح الافه المشعره
وكطع البيده وسبع تبحر عبر
يا كريم العين يا جد الشمس
كلبه انفطر
حمد من هور المجر هور المجر
هور المجر
ابن ديرتنه حمد
يمشي بحلم كل عين
بالخطوة الخفيفة
على جفن الترفة
لو حدر حمد يشتد رفيفه
قلبه صندوق الخناجر والمسج
وبطانته الحمرة قذيفة
حمد قلب بنية لو حن السلف لاهلها
وذكر هور الدبن والليل
واهله الشيلو بالليل كل بيت الخليفة
آه من الشوق ويا ويلاه أيامه التليفة
____________________________________________
المن تگص التذاكر
چم محطة ليل
چم قطار يصيح
وتنزل ناس وتصعد ناس
ومكومة جنط الايام كله للسفر
گاعد بشباچك من سنين انت وهل دفاتر
المن تگص التذاكر
تركض تشيل الجنط والحزن المن
ناس ما منهم گمر
ناس مايسون خاشوگة شكر
ناس وگعت ناس
وتثاوب طفل شمسية خضرة وركض بيج بعيد
والناس الردتهم
نسو من سنين اسمك والمحطة
وخلو دموعك نهر
لابد يردون باچر سوي نفسك ماشفتهم
بالك يحسون انت تذكرتهم
اثگل شوية ياگلبي
مرة خليهم محطة وانت سافر
انت والدخان وصبرك والمطر
ادري بيك تريد تبچي
ابچي وحدك
بس احلفك ياگلبي ياچبير لا ينخطف لونك
لو شفتهم
سلم بسرعة ولو نشدوك تعرف واحد يگص التذاكر
گلهم الشباچ گصلكم شهر
____________________________________________
من اروع واغرب واجرئ قصائد الارض شعبيه التي لا يفقهها الجميع (حمام نسوان ) ..
نوووابي... .. مظفر النواب
حزنك چمالة شته
وكاعد لوحدك غاد بزوية عمر
والگهوه جنه سنين نطرت ناس
مسحتهم صفنتك
مطر
كلش مطر
شارع مغوش حچي
بي ريحة ناس مالك شغل بيهم
عينك مرايت وكت ما بيه احد
مثل ورگة يانصيب انتهت
وادور الجرايد بالحچي ريحت وطن
وتغمض عيونك
وين راحو
يعني حلفو ما يجون
تمسح الليل المطر ترسم على الشباچ
( دويرة صحو)!!
رجفت چفوفك
بالچي جيتهم اشوفك
ما اجو
شسوي يعني ما اجو
تفتر تعد الكراسي
تعد اليالي الضيعته بهل الزويه
تصفن گبالك جنه شرطي مزنجر من زمان كلش
انت والشرطه عرف من زمن المرحوم ادم
تجمع افكارك وتزغر بالزويه
ويصعد الچاي لدماغك والدفو وتسرح بعالم
تحلم بحمام
وريحت مستحه ونسوان
ويصبن نهدهن والمسچ فوگاك وطاسة ضحچ
وانته بگد الاصبع
صوتك زغيرون يلعلع
يبدن شويه اصابيعك يفهمن
يبدن افخاذك يرجفن
تبتدي تحب التمر
يوگعلك جلف
تلمع مثل قوري جديد
وتتراعش ركتبتك
تنظف انته لاچن توصخك نظرتك
مدري وين تبذر عيونك بالزواغير وانته زغير
وانته زغير نطفة مسچ ومطينه حسبتك
ياخذنك بالمناشف بين افخاذك حيل ينشفنك
وتگلهن شني من جديد ضاعت الصابونه
يضحكن ساعات ولليوم الضحك بذنك
يدفننك دفن جوه الروايز والروايح
مثل عصفور واضح
يضحكن وگلوبهن تسعر جمر
گاعد انته وحزنك الماينتهي بگهوه بعيده
ويجي شرطي جديد بالكاغد ينشدك
وين حةام الزلم ..
زلم !!
ضلت زلم !
وادير عينك غااااد
وتنشه بجريده لاچن يصب الدمع
نهر يرسم عله حروفه السود وكربه مسيسه
كربه كلش لاچن تشيل الوطن فوگ الدهر
ياشعب لو شفت كربه ال من لاعب لعب بيه وحزينه
وراسه يلعلع ل الله
يلشعب هذه كربتي وفوگ هذا شموع حمره تشتعل
وصاحت الدنيه عليه ثگلت ركبتك.. خله تثگل
ووووين ما اسمع غريب يلوب اشيله ..
ياعساني اغرگ بعشگ دوم ولا حبلي منكم ينگطع
.....______________________________________
لا تحط شمعة أفراگ اعله المخدة
أحنه شدة ،،
احنه گطرة ماي
وگطرة ليل
تتلاگه اعله وردة ،،
أحنه قصة تين وشهكة عطش
تتلاكه بمودة ،،
وننعگد كون أنت بينه
من المدينه للمدينه !!
خلص قداحك وجيت
تعتذر مني وبجيت
لا تدنج خلني اشوفك
صدك تبجي
وامسح دموعك
وأخلي تدموعي تجري
بين ايديج
صدك خليني اشوف الدمع
يجري على خدك
ماهي يا حبيب شماتة
غصب مثل الموت عني
تشمتيت
صدك وبجاه الحزن
خليني اشوف دموعي
ودموعك على الأيام تنزل
دمعة حلوة تفوت دمعة
مثل ما جنا كبل وانت مشيت
....
## حب مو شماتة ##
.....______________________________________
متت وهمومي وسكتي
غطتك
يالچنت كلشي
أمس طشيتك على الأيام
صم نسيان
سميتك حزن
وصيت نفسي من معزتك
تنسى اسمك
تترك السبوره سوده مثل امس
تمحيلي رسمك
بطلت أتگبگب گبالك
مثل خوفة عصافير البيادر
بطلت
اوگف اصليلك مثل كل المناير
بطلوا الجيران يتختلون بشبابيچ حچيك
كله واجوني بحسدهم شگگت كل الدفاتر
متت
متت
متت
طفيت التبرزل
نيميت المطره بعشوش المشنشه
وحــــــــيل جريتك على
النسيان
يا سرجي خشب
بطلت اراچي ---
دفنتك بصبخة فرح بالروح
وهديت السواجي----
الروح روحي وبطلت ولويت اذنها
شرد اگلك يا حزنها
بطليت
طلسم فكيت سحرك وانتهيت
طلسم مكتوب كلشي
ومامش شلون ابتليت
ما اچذبك
انا ناسيك وبچيت
شلون ما اسكت بروحي
تلتفت للماضي تبچي
تحط على الحايط حلمها
هي مدري حايط الأيام يحچي
وانا صافن
مثل المحجر على الريح ارتچيت
لك لا متت انت
ولا انه احتييت
لچن الأيام ماتت
غلطتك يالچنت كلشي
ومادريت
غلطتك صلحها بعدك
انت كلشي
.....______________________________________
ذيب حزن الليل
صيحة ريل خالي
ومثل الفراگين كلش
حزن مربوط بحزن
وانه كلما گلت اوچيلي بمحطة
تشيل الضوايات وتمشي
والگى چوله روحي ويه الچول
تصفر ناس وتراب وتبن
بطلت مابعد احبك
لچن بگلبي نزيزة عتب
خلينا انتلاگى
چنه ما نعرف بعضنا
مثل الفراكين كلش
والعمر والليل ونفثات الحزن
چنه خدك مر علة الزعرور
وشال الفي وحطة بوسط حجري
وك يا آخر محطة بليل عمري
الصبح كلش
واحنا عركانين
احچي بكل حرير الله التعرفه وياك
وتگلي خشن
خشن حزن الليل
صيحة ريل راجع من مكان بعيد كلش
مثل الفراگين كلش
حزن ينطخ بحزن
.....______________________________________
...... القصيدة بعنوان: دكّيت بويتك كمرية
............
دكّيت بويتك كمرية
موديتلك عطابة حيلي
وحسبة حسراتي بجفيّة
يالعينك أوكح من بلبل
مستفحل رابي بزهديّة
وحسّك عضّاني من شفافي
وخضرن شبكاتك بيديّه
وياويلي من التكّي الأحمر
ياويلي جفوفك حنيّة
وانه مسديتلك بالكحلة
التركص بعيون الصبحية
ومفضوحة وعريانه شفافي
يدعَيْ سدّيلي بحذباتك
امسح بوساتك باعتابي
خافن امي تشوف عتابي
وتفضح كضاتك للوادم
وياويلي ومن كتلي احبك
ياويلي جفوفك حنيّة
وشفافك دمرن كل ثوبي
ومطرت فوكانه التكيّة
دكّيت بويتك كمرية
موديتلك ساعة من الدخلة
موديتلك ثوبي الدمرته
وتك ترجية
.....______________________________________
العب العب
آنه بيه.. امن الدعا.. لطولك
ألف ورگة عنب
وأرجه گربك .. بالتهجي ..
وروحي .. تباعة ذهب
بالحلم وياي
جنك باحلم.. ختيله تلعب
من أطش وياك ..
ست خطوات.. تتعب
من أبحر بيك.. تتعب
يللي نايم.. على طولك
مثل الگلاده اتلجلج
خرزه ليلو.. وخرزه كهرب
خرزه ليلو.. وسندلوس.. وخرزه عگرب
خرزه أبعد .. من نجمة الله البعيده
وخرزه أگرب
أگرب.. أگرب.. كلش أگرب
يابعد سچة المجر.. ومن سچة الغراف.. اگرب
انته وحدك والله دوله..
ونومتك والله منصب
گدرت طبعي اعله طبعك ..
ونته كلما اتساهلت وياي.. تصعب
يللي حسنك..
فوگ كل الناس.. شمرة عصا..
وبيك أشويه ملعب
العب.. العب.. العب .. العب
يابعد خالي.. عليك الحمزه ابو احزامين
تلعب
آنه تندگ روحي .. هلهوله ابسامير
أمن اشوفك .. ويه كل الناس تلعب
ونته گلبك ينكسر
مصقوله ورديه .. امن اعوفك
ويا كل الناس .. تلعب!!
نشدوا الوادم على انياشينك الحلوه
گلت: بويه ولك ..
كل وصله منك شكل تلعب
أمس شفتك بالحلم
بيديك جزوه
تصيد گمطات العصافير.. وعسل مشمشه
محروگة گلب..
ومشربك بخيط الشمس
والضحجه بيدك
وآنه جدامك
عله أميتك.. جنت مذبوح.. ارابيلك
ولك لا تعتذر
خليني افيدك
وانگضي .. ويا الليل.. ويا الليل
وسط الزهدي.. حلمي
يلي طولك نايل
امگدر .. گدر
هاك أخذ روحي وياك يحبيب
ربابه.. وبيها العب
مدري.. انته اوياي
مدري .. الدنيا تلعب ترس حضني
اتريد تلعب.. همه العب
آنه بعد أشويه.. بعد اشويه يوگع خجلي
أو وياك العب
آنه.. آنه امنين اجيلك
ونته بيني وبينك اجويريد
وسالوفة ورد.. وبيوت الگصاصيب
گلي امنين اجيلك
ألف مكتوب اكتبتلك
وألف سكته!
ونته ماداريت روحي.. بخلگ لفته !!
بخلگ گلبي.. اشلون كيفك
وآنه كل سا.. معتنيلك
أجي اگبالك.. وارجع اگبالك
عجايب!!
روحه جيه.. معتنيلك!!
روحي جدامك ..
تگلي : شيلني اشويه
من اتراب الهجر.. آخذ نفس
وشما ردت للطلع.. والقداح أشيلك
آنه داخل عد أصبعك
گبلي محد گال للأصبع دخيلك
سولفيت بفكري عنك
لأستكانات العرس.. والسوگ.. والصفه
وسراگي الناس..
ولا خليت
لاعطار.. ولا.. بگال
ولابايع مسچ. جاعشگ هاذا
لوعزه..!!
گلي طبعك .. جوز
گبلك ناس جازت
گتله جوز انته.. وجزيت انته
وغدت روحي جنازه
روحي بين ايدك.. افكهه وتنعگد
يللي حسنك
ريحة اللفته.. وبابك نوم.. عنوانك ورد
عشره.. باب السيف
عد عگد النصاره
لحضرة السابي الخلگ.. سيد نهد
آنه كلش.. كلش أهوايه احبك
نقطه.. بوسه..
المخلص العاشگ عبد
وأشويه ابعد
مدري انته.. وياي
مدري البلبريد وياي
يلعب!!
كون أصيرن طابع ابنهدك
وأظلن.. يمنه.. يسره
وياك ألعب
العب .. العب
.....______________________________________
القصائد التي لم تنشر
لمظفر النواب
قصيدة
حسن الشموس
.
.
.
أطرن هورها امصكك
واصيحهن عليك اجروح
يجحلن چالمطبجات الزرگ
صلهن يشوغ الروح
واجيك اشراع ...ماهواشراع
عريانه سفينة نوح
اصيح اشاه ... مابياش
يبني جحلت يبني
ويجيني امن الرضاع الحيل
موش امك واندهلك...
أشيلن حملك امگابل أنگلنه
وأشيلك شيل
أكابر... وانه اطر الهور
وأعدل ظهري للشمات
چني امگابل ويه الريل
أصدن لليصد ليه ابشماته
وفوگ اشيلن بيرغ الدفنه
عمد للسيل
كلها اولا شماتة عدو...
يتشمشم خبر موتك وراي ابليل
يازين الذي ابطرواك
دلتنه الچبيره اتگوم للخطار...
مهره من بنات اكحيل
نجمتها عزيزه اتدگ غمامة ليل
واتشگ اللهب ...
لنهه ابغمامة هيل
يا شبة وسط بيتي ...
التشيل السگف والخطار
والدنيه الثجيله... والبرانو شيل
چن ظلمه مچانك يبني بالديوان
والوحشات...
ايدبچن بالضماير حيل
چن عينك مرارة كوسج...
ايعارچ بحر يبني
وخبر موتك نهاية سيل
هوره...
اوكل گصبها ايخرخش ابموتك
أوروحي ويه الچبايش چنها تتگلگل
چباشه ... او راحت ويه الليل
تتراكس وراك امراكس أو تثگل
چباشه امفلشه ... ذبني عليك الزود
ايعطل اگليبي عيب اعطل
يمن جبت الحزب لبيتنه امعگل
والتمت سواليف السلف ...
كلها اتسولفلك
او تعافت بيك خبزتنه
چثيره ادلال ...
گامت نارها العطات دلتنه
چثيره احگوگ حزمها الحزب لليل
تفاگه ... اوتنومس ماي مدتنه
تفايض مسچ بالعتبه
وتشگگ ورد من داير ردسته
او فوگ شبتنه
او تساندنه ... متن يسند متن
ومتون لمتنه
ولا مرت ليالي ابغير گمره
الگمره ... گمرتنه
الشمس كلها شمسنه
ونجمة الصبحيه نجمتنه
واجت نجمه ...
اوغفت بالبردي النواطير
او لن الريح طرتنه
حسافه انچفت دلتنه
وتگلگل بيت المعازيب
ياكل الحسافه ...
امشردين ابشمس ديرتنه
وتطشرن كل سوالفنه
وتمزگت ذيچ لمتنه
وغدت لن السلف مجزره
ولا چنهه بيارغنه سمه الدنيه
ولا چنه ...
ياعيبة العيبه يهلنه وخيبة الضنه
حزبنه اليوم يبني امعگل ابحزنه
حزبنه ايدير عينه ايگلب الدنيه
اوسكته...
اتمطر الصحوه المشمسه
مطرة المزنه
حزبنه ما ايريد ازلام ...
تتمايل عگلها اوي الهوه
او تتوهم ابجنه
حزبنه اليوم ... يتهمهم عليها
وما ايعرف الگعده والهدنه
الطريج الزين المغني المرابع
والهلاهل طرزن ردنه
ايهبه ... الگلك ممحله الگاع
طرتها صباخة ظيم او ضكتها
اوگلبناها او غدت دهله
تشگگ بيها ريحان اللي منها
ويحمل اشتاها وصبخها وظيمها
والخابط المنه
النشامه ...
الما انبيع اگشاشه من اترابنه ابجنه
النشامه ...
الما انساوم على حگ اظفر
ننطي ارواحنه الكل طيب المعشر
اخذ ليل اليضوي اسيوف
من اسيوفنه ايگطر...صبح اخضر
واگلك يبني يمشكر
تدوهن... حشه گدرك
كل حكم اگبل على المعبر
تدوهن ...
واحنه... بس احنه اهلها
اعله الزلگ نگدر
تدوهن ...
والفلح جابته يضحك يبچي للمحشر
بلايه الفلح ... ماتطلع شمس زينه
ولاهو الغيم يتمطر
جزيره ابغير شد احزام ...
او صف ارصاص ماتنطر
يلضميت من ثارات
اهن ثارات من ثارات
حگ اودم... وراهن ليل ومساهر
وراهن ليلتن ليله
وزغير احسابهاابموزر
يحزب حسين ...
ماننساش حگنه او حگ المناطر
تراهو ازماطنه ابزيجك
اخذها امناحر امناحر
لجل عيناك ...
مامش عالجروح احساب ولانهوه
لجل عيناك ...
يلتسوه الگباحه... اوتسوه ماتسوه
تفگ ...
وابغيردشر اوشدحزم ورصاص
ما نهوه
خذوها ابگوه... عينك عينك
نستافيها بالگوه
يحزب حسين ...
بس منك علامه ... انسچ عليهم سچ
اندچهم حيل بالدم دچ
حگ ابحگ ... او دم ابدم
يلن حگ الذي ينلاچ ...
وانسولف عليه اهواي ... يتعلچ
هلابه ... هلابه
هلابه زلمتن مارخه للشدات وترچرچ
هلابه الدم على البارود
ورصاص اليسبچ الشمس يتسبچ
هلابه باليدليني الحفرتك يومها يبني
واحني الطين ...
واحط اترابك ابحضني
وائلولي ابريه مرديه ... وخلگ عشرين
چن تينة ربيع اتهز ثمرها ابگلب البساتين
چن ماي الحصو الابيض ...
ايهلهل روج ويزهلل
واشيل اترابك اعله الراس
لبيوت الگصب ...
والغاگه والغرنوگ ... وانهلهل
هله وليدي ... هله وليدي
هله وليدي ...
الضوة بيك الچباشه الظلمه والمنزل
هله وليدي ...
واحطلك نار ... واكسرلك شمس
وابچي ابشليلك سل
واگلك يبني شچيني الدهر وياي متبدل
مامش فوي ... او مامش للرمل من ساس
مذلوله... ابزويت البيت
لازمر اليگعد الروح ولا ادلال التشيل الراس
چا وين المعگل ...؟
واليعرف الخبزه بالنوماس
وين اللي تگص الراس صيحاته ...؟
وايحني الچف المفطر
وين البيرغ المنذور للشدات ...؟
چاهيه غدت كلش ...؟ ولاخنجر...؟
صنطه الدنيه ... لابيرغ ايرف بيها
ولا زمر اتفگه بشر
وچن الگصر الابيض بالرخاوه ايحيض
الوليلك ... الوليلك ...
واگلك يبني شگها اعريض
وزان او فلتها ...
وگامت الدنيه نجابه اتفيض
واتصلخ ابلحم الحي ...
واصيحن والده او جيتك
ابعرف الثار طلابة دول يبني
اجينالك ... او مامش زود
دم ابدم ... ونارابنار
وزلام التساوم حگ شواربها الشعب
واشوارب الثوار ... للثوار
چاهوه لعب دم الشعب يبني ...؟
چاهوه الشرف شكلين ...؟جاوبني
صفت يبني ... الچاتل حگ اله
واحنه ابحلگلنه الدم... ومامش حگ
صفت چنها اتداوه ابضرگة اللگلگ
صفت كلش ممحله...امدلهمه
ولا خبر ويه الريح ايبشر ابديم
صفت زيزايه ... هيمه
اوها يلن صاحبنه المعگل على اكحيله
ايسوگ الغيم ذيل احصانه المحومر
گصيبة شمس...والحافرحجل
والگذله شيلة ظيم
رد الماي للهوره ...
ورجع حمريها يتلاعب لعب
والتفگ...خزامة ذهب بخشومها وگمره
او صهيل اكحيل
هلهلن...ياتفگ زرگات روسيات
اوخيطن اول الريح ابتواليها واشخطن ليل
هلهلن ... والدلال اترد لهلها
وشعر المعرسه شليلة هيل
وانصعد الهلال اعله الفشگ ...
گبل الشهر ترمن
وتاخذني ابهواك الروح ...
اطرن هورها امصكك
واصيحهن عليك اجروح
حسن يبني ... حسن
جبنه عروسك ياحسن
خبزة دهن حلوه
حسن يبني...الشمس صاغت خشلها
ودگت النجمه نفسها ابطارف الغطوه
حسن يبني... بچاها اهلال
كل نگدة گلب ودموعها اتخورسلك ابهدوه
وغدت فضه...اصابعها ...
ومشطها ... وثوب دخلته
شگللها ...؟ الدمع سلوه
اوتعنت عگدة الگذله التحبه ...
اباب المعاتب ... اودگتهه
يا ايام الشعب يمظلمه ابگوه
اجينه البابچ امفاريع ...
يا قصة شعبنه...وياغناني الليل
طولتي علينه المده والغيبه
اجينه اگاده ...
للصدره عريض اوروشته هيبه
اجينه اندگلچ ابحرگه
وانگلچ ...
على الليل اشكثر طالت تراچيبه
ولبس خزامه واوي الليل
باگ التمر والنفطات وافترن دواليبه
يا ايام الشعب ... يل عتبتچ تنزار
وانحبها ... او نتربن بيها الگصيبه
مترادي الوكت والزاد زاد انذال
واندچت دول واجيال
واستافه الوعد يومه
وليالي الثار من دون الليالي اطوال
هلبت يلسمعت الشعب
گلت ايزلزل الزلزال ...؟
هلبت يحسن...وانرد لهلنه
ونذبح العرسك حلال اهلك وگفه اطيور
هلبت يحسن
هودج موتك امحنه ...
چبير اوشايلاته الحور
هودج موتك ... اتسلم عليه الشمس
وزمور التفگ... والطبگه والگارور
هودج موتك اوليدي ...
عليه امچلچله ابشيبي
واگلك يبني يمغرب...عليك الله
عليك الله ان بطيت ابديرة الغربه
تراهو الوكت مو طيب
عليك الله... تراني الوالده
او ماليش غيرك ياحسن واعتب
واخافن ذاك المعگل ايمر بينه...
اويندهك توگف ابصدر العدو ترهب
واخافن يوگف الهور اعله حيله
وينشد الموزر على ابني الزين المغرب
كل گذله اربات الليل ويه اسهيل مفجوعه
او مسچها ابنارك ايلهلب
ايگول الشافه...
نخل الباديه ابطرگ اسعفات اللب
ممشانه ثجيل...امكابر...امكابر
مراكب...والسفينه اتفوت ليجدام
واتهلهل
لوتوگف دول...يسحگها شعب الهور
چي ظيمه چبير اوگلبه شايل سل
اطرن هورها...وكل ساع اگول ايثور
واگولن ما ايصح گبرك ...
ولا حطوا عليه ناطور ... ؟
اگولن على ساعة...اويلهج الشاجور
المعگل فضي خلگه ...
ويعرف اشلون يعلگها او عليها ايدور
او ها هاذه وعدها...وهاذه يوم الشگ
اوها طرت الفجر...لنه بيان اول
او مطر اللوز... اوصيحة حگ
واوصلك...واگلك يبني يامذبوح
جرح الثار هود...الاجرح الروح
وشراعي...ايدگ شراع حزبك
للحويزه... للفلح
للناس كلها انروح
مظفر النواب
.....______________________________________
رائعة يا حزن للرائع مظفر النواب
واحدة من قصائدة التي لم تطبع حتى الان
.....
يا حزن ياريت اعرفك
چنت اسويلك حديقة ياسمين
وممشة من كاشي الفرح جدام بيتك
يا حزن وك يا حزن ياريت اعرفك
چان گتلك لا تجيني
وتمشي كل هاي المسافه
اني وحدي چان اجيتك
يا حزن وحياة حزنك ماعرفتك
چنك مغير مشيتك
حاط ريحة رخيصة كلش
يا رخيص شگد بچيتك
امس مر الفرح بية
سولفتلة چثير عنك
راد يعرفك
گتلة بس عيونة ما تشبه عيونك
ضحك مني ونزع النظارة
ها تو عرفتني
گتلة يا حزن الفرح ماضن نسيتك
يا حزن ياما نطرتك
وانت بيه بثوبي بعيوني بمخدتي
انه عشگك يا احب طيور الله واشتهيتك
يا حزن وك يا حزن وك يا حزن
يامة اشتهيتك
.....______________________________________
قصيدة حرز
بيه أونين ماونه كبل مذبوح
صبر اكبور بومه اتموت .. بومة تنوح
وحشه وضله يسحن ضلع فوك الروح
وأسري بليل أضم أجروح حدر أجروح
واجزي أمضايف الطيبين شيمه وهيل وافناجين
كل دله ابسماهه اهلال تشرك بالمضيف اسنين
ونته اهناك بالدخان تعلك لهبه ارياحين
كريه وزبونك طيف طرز نومه الغافين
سيلن ياغتر واسكن فججنه اطيور وبساتين
اذكرك ياحرز والروح بيهه اونيك يصك اونين
واوجي ابموت وسيول الحنين اتفيض
عيب اغرك يشامت اتفيض
جرف اهل الشمس وسيوف دمهه اعريض
آنه امك حرز جيتك دكوم الهه تلكاهه
زلك والروح مابيهه تشيل احمول دنياهه
اروز الضيم اشيمهه واشيم الضيم واتباهه
وجت للموت كل زينة تحني جفوف موتاهه
وحك عينك نجيك ازحوف لو صكت مناياهه
وكلك يا حرز روحي اوصلت حدهه
تجي ابطيفك والف تذكار يبردهه
تغيرت شيمة الدنيه وعوايدهه
نزيزة وضاع تاليههوتكول الكاع عاثوره
تشع نجمة ايتربص ذيب وكلهه اذياب مسعوره
ويطيح بزود حاميهه هلهلي النوب يالعوره
سحن يالروح مامش هيل مامش جمر بالوديان
أحن الصوت كل طارش نفل وأشتاك للدخان
كل ليلها لسكم يصعد امجان ايسح امجان
يلدنيه امن امسجن العمر مجروح
وأدلال المضيف اشماله عيب تفوح
واحرف اليدكه التيل ظل مشبوح
يتيول العمد شنهي الجرف غركان
نسرج طاح مهضوم بشرك بطران
يلطارش تطير ابعينك الغربان
اصيح ادخيل يلطارش وصيح ابذمتك احوه
يالشكره يمهره جا حرز جتلوه
يلدله الحزينه مدللج شالوه
كبل اكهوه مسبوجه ابمضيف امطرز الفنجان
كبل النبعه لو شكت ابشهكه الطين بالبستان
كبل امثاوب النبعات منعطة نبع ريحان
كبل الميل فضه ايخط كحل سمره
كبل الشمس تشرك كذله المهره
مهرتك حنه حنتهه مري احديثات كصته
معارفهه نده وريحه وتموج النار كذلتهه
رسنهه اتيه بيه الريح وآنه اتيه بيه اجروح
نطبك سوه كل ضلعين مطبك بالجزيره اينوح
اكلهه اكحيله لا تبجين ترج والربيع ايلوح
وسفه عليج يل مهره
حرز ذاكه حرز مانايم بكبره
حرز من تدفك اينابيع شذره اتسيل من شذره
حرز من تفرع اينابيع يكت اعيون من صخره
حرز لو كامت الدنيه
عجاجه موت بالغبره
حرز كل دم يسيح ابغدر كل افراك كل جمره
يكحيله جزت سنتين جن الدنيه عيب اتدور
عجلة فال بالدلال والمزهور صبره اصبور
فاله اتلوحني امن الراك فاله احاه فاله اتجور
كل جرح النخيطه ابسيم مايرضاش جرح انسور
مايفعل ينام الجرح دمه ايفور
وصواني العرس شالن حزن واطيور
وامك ياحرز للشمس عدهه انذور
بيه ونين ماونه كبل مصدور
صبر اكبور فوك اكبور فوك اكبور
حشه وكل ضلع مية ضلع مشطور
والدمعه ابربيع ام الربيع
ليله عار والذله انصبت بالغدر غوجتها
الدنيه امهوده ابظلمه
ودمعها اشراع وحشتها
تشيل اجروح أجروح موتاهه ويشك الظيم مهجتهه
تثور اعله الشعب ياحيف جاشنهي معزتهه
رشكنه الدنيه اولو ينهار كاب (جلعتها )
سكينه الشمس بلهيمه كبل جدحه شرارتهه
نشيل الكاع للنجمه او نذل انجوم ذلتهه
حجل للشمس موصلنه تشيل الناس فرحتهه
حرز للساع رشاشه يدك ابليل محنتهه
جزت سنتين يالدنيه (وغنيه ) ابسطح فرحتهه
جزت سنتين والموصل جرح ملجوم رايتهه
تسح ادموع فوك ادموع ثوره وهاي حنتهه
الدرب ذاكه الدرب مايغرك ابدمنه
ايخسه الهندس شمرنه لروح وشعلنه
شلهت يالموت دنيانه او تحزمنه
شلهت والشعب مايشله غدت حنه
تحملنه اليميل جبال ماملنه
وصرنه الموت يادنيه او توزنه
يهل موكد شني ظلتك توج النر بالغمه
يريت النار ماوجت عليك ولاجزت ظلمه
وموتن موته الصبير صنطه يموت من سكمه
بعد مالج كحل ياعين كلج شوفه من كبره
جزت دنياج ماتسوه بعد عبره
يهل الشامت الف لجمه والف عبره والف عثره
بيه ونين ما ونه كبل مذبوح
صبر اكبور بومه اتموت بومه تنوح
يالدنيه ألم جروح حدر جروح
احشم بيج وادري بيج اشدنيه روح....
.....______________________________________
منهو يگدر يقره گلبك ..
غير نرگيلة حزن والريل
واشوية اغاني
على المامش ..
شايل سنين العمر شدة اماني
ذايب ابحب الناس والدنيه گصيفه
گلبك التعبان ما بطل نزيفه
يا طعم كل العراق الدايخ ابليل البنفسج
يا مضايف هيل .. يا منجل صويحب
زنجر امن الحزن چي ما اخذ حيفه !!!!
بنات الشام
*********
يا عمر الورود و نثّات المطر
حالاّت الشعر ....غزوة شام
:
و النفنوف
هلهولة بحر
:
حارات من المدارس
چن خبز تنور
يفسدنك يا گلبي لو حجر
:
هيّمني
إيه و حق الله
تراهن هيّمني
:
ضبية عمي تگلي
ضبية تگلي خالي
ضبية بي تبحّرت
ركبتلي جني
:
طوال و محزمات
و ريّانات
يا الله دخيلك
أنا بسنين البرد و الثلج منهن عطّبيت
:
يساعد الله التوه خط الزغب فوق شفافه المورمات شهوة
و خالي جيبه و ماله بيت
:
إيــــــــــــــــه يا إنتِ تذكريتچ
كلهن أنتِ
:
شگد ضگت بقلاوة شغل الشام
مثلچ يا شغل بغداد أبداً ما لگيت
.....______________________________________
ترافه وليل ... ودك ريحان ... يسمر لا تواخذنه
يلَن كل دكه من حسنك .... شتل ريحان للجنه
ليالي ... ودكّ نحر حدّار .... واحنه الشوك ناحرنه
تحنّن ... دوس فوك الروح ... واحسبها عليّ منّه
أطكّن ورد من تجزي .... وألف نمّام يتحنه
بترف جدميك اطيرنّ فوك ... فوك الفوك
أكتنّ عالورد ... مزنه
من اشوفك انذر النجمات ... ترجيه لسوالفنه
ووديلك هوى شكابين ..... واتردني بطرك ونّه
بوشل هجرك يلمذبل .... شتلنه العشك والصندل
تنينه وكل هجر حمّل ...دمع نيلي وسعدّ أسود
ترف وانت ولا سعده ... ولا مامش ولا أزود
حسافه اسكيتك بروحي ... وحسافه العمر ما ورّد
يكلي امعبر الطبكه : عشكنه نياحه يا سمره
يالمعبّر ... دصدّ عينك .... لجعة العين ما تبره
نسيت الروح يا يمه .... شدهني وتلها من ايدي وعكدها بطارف الغترة
أموتنّ وانتي كليله .... تظل رويحتي بستره
يروحي شكثر عاكولج .... والمجاتل على الكطره
تبهذل حالي كل دكه ... وتذبني بفرح كل شمره
الزلف نايل هوى جبوري .... وانكط شفافي عالجوري
فرشت شليلي بدروبك .... أبيع العشك للدنيه
هضيمه اتحنّن الشامت عليّه وتشتمت بيّه
جثير اكزازك بروحي .... واكولن هاي حنيّه
من اتلّك بالحلم يسمر .... يجي القداح بيديه
واعتّك واطبج بحركه .... رفيف الريّه عالريّه
وتسيل دموعي بجفوفك ... نبع برمال نجديّه
واكلك ... ويــــــــــــــــــــــــــن هالغيبة ..؟؟
سنه .... وبالحلم منسيّه
يطيف شويه عاشرنه .... الصبح دنياك مكضيّه
شكلك .... وانت هالمايع ... ونه من الحركه زهديّه ..؟؟
يامايل فرك ... كل مايل فرك بالعشك عاريّه
بوشل هجرك يلمذبل .... شتلنه من الحزن مشتل
تنينه وكل هجر حمّل .... دمع نيلي وسعدّ أسود
ترف وانت ولا سعده ..... ولا مامش ولا أزود
حسافه سكيتك بروحي ....... وحسافة العمر ما ورّد
الكبير مظفر النواب
.....______________________________________
ودگك النوب الباب
نبگة وزفة زرازير وصغار بحديقة نوم يتختلون
وسنين انگضت وايام يمسحها الدمع ووجوه تطلع من ضباب العمر ترسم للزمان عيون
تمسح گصتك من بعيد بالقداح
راجع ورة نص الليل گايد سكرك ونعسان
ناسي بجيب امس مفتاحك اليسوة الف مفتاح
قصدن چنك انت مضيع المفتاح شوية ارتاح
دگيت وسمعت الصنطه بعظامك
چنهن خلصن ايامك
مثل عصفور نايم بالگمر وتكي جنحة وگعد الامك
راجع عگب كل العمر
تحلم بتنگة ماي مملية بنجوم الليل
وعضت هلال بارد
حمر التيغة بعمالك
وعانگ هلال السمة وشاور نجمة سهيل
وعيونك طفاهة السكر
تتوچه بالمحجر نقطة بيت علوية
والچراچف چنهة شمت كل البساتين
تسمع عركة بزازين
تسمع مدري شنهي ثنين عرگانين
تسمع نوم الجوارين
وتمتمت مدينة ماي مشتهية لشهر تشرين
ودور بجيبك تلگة كومة زروف
كرز
كرز زروف العمر
كرز راحو الاحباب
مفتاحك بجيبك مر عمر كلش
وبابك نست المفتاح
يمكن نست چانت باب
يمكن نست رجعاتك توالي الليل
كطبة ورد چفيتك
وصبعك بليلته تگلب الصنطة
وقريت من السكوت كتاب
ترسم صوت ترسم فكر
ترسم راحة لاچن انت مامرتاح
لصغار بحديقة نوم ولبزازين تتعارك عشگ مجنون
ولا انت رجعت انت
حزين وتعشي وعيونك عليها عيون
تسأل والجواب تراب
ودگك النوب الباب !!
وتگلك منو ؟؟
اتگلها ارجعت ماغيرت ثوبي چثير الغيرو
بس انزعت كلشي وجيتچ طفل عاشگ ماعليه ثياب
درت الكون كله ومالگيت زوية تحظني
احظنيني اتعب مني ومن الايام وعشگ الناس
اريد اتلولي بحظنچ
الوح الكمر بيدية الصغيرة
وانه اگلج رضعيني اعتاب
حگج غبت عن حبچ زمان طويل
لاچن گلبي ياحبية گمر عن شوفتچ ماغاب
احبچ وارد انام بسدچ احبيبة
اشمن ريحة الله بصدرچ الواسع
وامرغل وجهي بترابچ اعز تراب
.........___________________________________
لم تقرأ هذي القصيدة الا مرة واحدة وكانت في امسية لندن عام ١٩٩٥
ولم تطبع او تنشر لحد الان
وهي تعتبر من النوادر للشاعر مظفر النواب
يا بني ضلعك من رچيتة
لضلعي جبرته وبنيته
يا ابني خذني لعرض صدرك
واحسب الشيب اللي من عمرك جنيته
يا بني طش العمى بعيني
وجيتك بعين الگلب أدبي على الدرب ألمشيته
شيلةالعلاگة يا بني
تذكر چتوفي بلعب عمرك عليهن
سنة وچفوفك وردتين على رأسي
وبيك أناغي كل فرح عمري لنسيته
يا اللي شوفك يبعث الماي الزلال بعودي وأحيا وأنه ميتة
أبيض عيونك لبن صدري
وسواد عيونك الليل اللي عد مهدك بچيته
وأبنك التو يناغي الخرز بالكاروك ياا بني
گتلة لا تخاف اليتم جده
اللي ما مش أبو عده
الحزب أبوه الحزب بيته
گتله ياا بني يا وليدي من تكبر على الأيام
تلگه حزام أبوك الماطواني وما طويته
تلگه منه خطوط أضمهن حدر ضلعي
لحد ما موت بعز على السر الحويته
يا عمد بيتي وگمر ليلي وربيع الشيب والعمر الجنيته
جيت أهزك يا عمد
بيتي
لا يكون الدهر ضعضع عظم منك للمذله للخيانة
وساومت جرحك على الخسة وجفيته
يا بني خلي الجرح ينطف
خله يرعف خله ينزف
يا بني جرح اليرفض شداده علم ثوار يرفرف
يا بني ارضى الچلب يرضع من حلبيي
ولا ابن يشمر لي خبزه من البراءة
يا بني يأكلني الجرب عظم ولحم
وتموت عيني ولا دناءة
يا بني هاي الأيام يفرزنها الگحط أيام محنة
يا بني لا تثلم شرفنا
يا بني يا وليدي البراءة تظل مدى الأيام عفنة
تدري يا بني بكل براءة
كل شهيد من الشعب ينعاد دفنه
وخلي إيدك على شيبي واحلف بطاهر حليبي
گطرة گطرة وبنظر عيني العميته
قلي ما يندار رجمي و أنتي أمي وذاك حزبي
وعز أبوي المالواني وما لويته
گلي ما اهدم حزب بيدي بنيته
...........___________________________________
براءة الاخت
....
خوية گابلت السجن حر وبرد
ليلي ونهاري
اتحملت لاجلك شتايم
على عرضي واشعلت بالليل ناري
تالي تهتكني بخلگ وصلة جريدة
گرت عيونك ياخويه بهاي جازيت انتظاري
بهاي أگابل كل إخت تنتظر منك ثار يا
خويه لعرضها
بهاي اگابل امهات الناس وهمومي افضها
چنت ارضة تدوس بعظامي واگلك حيل رضها
چنت ارضه تذبح ابطني جنيني
ولا براءة عار متبرگع تجيني
ولك كون الگاع تبلعني شخبر الناس والينشد شگله
شلون عيني اتچابس عيون المحلة
اشلون اوصفك وانته كلك عار وذله
بعد ما لك عرف ويانه وخبز لا تصل يمنه
هاك اخذ عار الجريده
ولف ضميرك والكرامه وعار اسمنه
مثل ما تبريت من شعبك تبرينا من اسمك
يا شعب هذا التشوفه موش ابنه
اسم القصيدة .. جنــح غـنـيـده ...
______
رديلي الفرح رديت
معضد باب يبچيني
وأحن حنة حمامة بيت
مثل الطاكـ محني عكاد عالمهجور
يلتم العكد بينه ويعبرني ثلاثيني
جنح عصفور ... تايه والعكود تدور .. تايه والعكود دور .
للفضوه نشرنه چفونه جناحين
صارت بلحظه طيارات وغنغنه
وجرح جنحي الطفل ياطوفه غصن التين
وجنح غنيده دك جنحي وكسر عمري
وعبرنه سواجي وبساتين .
بالحفره كبرنه سنين
وردينه لهلنه هدومنه تنكط محبه وطين .
يغنيدة امس ياحلوة الحلوات، صار العمر طوفة طين.
وغفينه ولكينه الدرب والسماك وقمر الدين .
نتختل وره النسوان والشياب
وندك المحله الحلوه باي اباب
يا أول جرس أرعن نتل فرحة وكاحتنه
كبرنه سنين
يا أول جرس إنتلني ... إنتلني
لغنيدة امس للضحكه ردلي جناحي رجعني .
وتغيب الشمس خضره على محّجر الجوارين
وألمح عمتي من بعيد وتضمي بعبايتها
وحس البيت
عمه الشمس ماتت وانت مارديت .
عمه الشمس ماتت وانه مارديت
رديلي الفرح رديت .
معضد باب يبچيني وأحن حنة حمامة بيت .
أتلمس ثلاثيني وازتهن شدة امفاتيح
مارهمن ولامفتاح .
لا افتك العمر بيهن ولا افتكيت .
.....______________________________________
حن وأنا حن
و انحبس ونة ونمتحن
مرخوص بس كت الدمع
شرط الدمع حد الجفن
...
جفنك جنح فراشة غض
و احجاره جفني و ما غمض
يال التمشي بيا ويا النبض
روحي على روحك تنسحن
حن بويه حن
حن عمي حن ...
..
..
عيونك زرازير البراري
بكل فرحها بكل نشاط
جناحها بعالي السحر
و الروح مني عوسجة بر
ما وصل ليها الندى
و لا جاسها بقطرة المطر
وصفولي عنك يالنباعي تفيض
و تعليت ليلة ويا القمر
وصفولي عنك كل مسامة تفيض منك عطر
يالحسنك نهر..
تنزل بصدري ويا النفس
و بدمي غصبن تنعجن
و أشهق و اصعدك للسما
بحسرات و بعنة حزن
حن.. حن بوي حن
..
******
شفافك ولا كولن ورد .....
عنابه معكودة عكد
تمتلي بكد ما تنمرد
لا هي دفو ولا هي برد
أنا بوصفها راح اجن
حن بوي حن
***********
سكتاتك تشكل خواطر بالقلب ...
مالي عرف بيهم كبل
مبروم برم الخياط يا ريان
و الخوصر خصر لف العقل
كل كلمة منك ...
نبعة البردين .. بالدلال ...
ما تحمل ثكل
وصفولي عنك
وردة من قداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حنو طواريز ولحن ...
و حنة حمامات السجن
حنة إلي ...
و حنة إلك ...
واللي يعجبه خلي يحن
حن بويه حن
*********
آنه من أشوفك
يمتلي الماضي الجدب
زهرات بيض من الوفه
وروحي سواجي من الحنين تصير
وأتنبه وكت بيها غفه
يا محجل إن مريت بيه ردود
أرد أردود بالعشرين ....
من عمر الجفه
وأنصف عمر منك
فما أنصفت إلا بالهجر ...
والهجر منك ما كفه
حتى الهجر يا روحي
منك ما كفه
وكلبي عله هجرك دوم يحن
حن ...
وآنه حن
وأنحبس ونه ...
ونمتحن
مجبور أرخصك على الدمع
شرط الدمع حد الجفن
.....______________________________________
مالَه أحٌد شغُل بيه.. جرس عطله
حيل أدكَ نوبات وحدي !!
أبجي وحدي .. أحجي وحدي
آخذ المدرسه عُرض إبطول وحدي
أطفه وحدي بلايه أحٌد وأشتعل
جرس منٌي وبيٌه وحدي أشتُغُل
كَِلتْ أكَضي الظلٌنْ إمن أيامي
أتفرٌج
إمنْ الشباج عالدنيه وهلها
ولَنْ بالشبيبيج الكَبالي إتِلَجلَجْ
كَامَه من بَلوٌر
شِكلَتني إمنْ عيوني شَكِلْ!!
غَمٌضيتْ إبربع جَفٌي
وبثلثْ ترباع شفت الدنيه مزروعه كُفُر
مشمش حلو ..
ورمان ...
وفَر بيه الخِصِر فرٌة حِجِلْ !!
صِحِتْ سبحانَك شَكَلٌكْ ؟ ؟
كُفُر .. وجَنٌه .. وشِتا
وصيف .. وربيع
!! إبجَسَد واحد
مِنْ سمَعني المشط من إبعيد
إتمَركَص إتمُركَص عالهَوه
وعضٌاني ..
بسْ عضٌة طفل
عَضْ بعَد .. عَض بعد
يابَعَد روحي
تلفَنتْ للجنٌه من شبٌاجَك الجدٌام بيتي
وبالغَلَط فَرٌيت رقم النار بيٌه
فُر بعَد .. فُر بعَد
بس فُر عَدِلْ
مالَه أحٌدء شغُلْ بيٌه
جرس عطلَة صيف ومتاني المدارس
أدِكَ وحدي بلكن إيكَطعَنْ العطله
ويشتِهَن دكَاتْ كَلبي
كِل كَصيبه إتكَلٌك آنه
وكل خصِر محبَس عرس ويكٌَلٌك إلبَسْ
وإنته نازع نفسَك إمن إزمان
وتلملم سَكتٌكْ
جيت للدنيه نزِلْ .. ومسافر ألله وياك
للسلطه نزِلْ
ياجَرس يالعِشتْ وحدَك
ساكت إمن أيام ماواحد يسمعَكْ
تعَبْ ؟ ؟ لو مَلٌيتْ
لو رنٌاتك الحلوات
ماعادَنْ بنات التكي والزعرور يلتَمٌن عليها
ياحسافه ياجرس
كل ساع رنٌاتك عرس
بس الوكت كلٌشْ نحس
كلٌشْ نحِسْ
كل شهگه التشهگهه بصدري
تدگلك عشره
يالساكت والتحچي طيوفك
وأتدافع انه وكل گلبي نريد نشوفك
واشبع منك؟
كون الطير يشوف الماي
ويشبع منه
كون الترفه
تحل گذلتهه
وما تفتك بيبان الجنة
وكون اتمنه
وكون اتمنه ومامش حدر گليبي عريضي
شجرن گمرات الصبحيه
وعط الچول بنفحة عنبر
وانه الما نيمني عيوني
كل ليله ولنك گالبني
وكاسر ماي الظنه بروحي
وماتنزل وتبور ظنوني
ونزلت للشط كل مكحله
تفر الجرفين بطرتهه
وشبعانه سوالف ومشابگ
ليش انه بعشگك سياحه
وكلهن طابگ
موش حلفنه وگلنه نموت
وما نتفارگ
چا ليش بساع تفارگنه
چذاب امشينه مزعلينك
جادلحكنه...
نفكلك كل بيبان الجنه وفوك الجنه وفوك الفوك الفوك الجنه
.....______________________________________
ياماي اتوچىبجروفچ
انجوم الليل
والگمره خذوها إبعيد الغراريف
يا نهران أهلنه
وياما العبنه عريانين
ما نعرف ولا ندريش
يا ماي العروس إتوكح اسواليف
يا نهران أهلنه
ذيچ الليله ختلنه دفو الگمره
مثل كل ليله
يا احبيب.. ولا ندريش..
ولن بالظلمه، ما مگصوده يبن آدم!
لگينه الدفو توه ايريد يدفع
والصدر توه فرش دوشگه للعريس
ومن ليلتها يبن آدم!
من ليلتها ما مش فيّ يكفينه
وحچت بينه حچيها الناس
سمعنه العسل بشفافه..
لگينه ابچفه طعم الخاصره..
وسرعة نفسها الحار!
شفناه اعله شفتها!
دخيلك يا علي الشرجي لگيناهم
ولك ما تنحچي السالوفه يبن آدم
وگعنه إبحلگ الغراريف.
سالوفتنه حطاها السلف وردة شذر
بخشوم المشاحيف
حته الگفه فرت بيها
بشطوط البعيده وسوت سواليف
ومن ليلتها يبن آدم!
وسطة ماي وما ضاگت جرف لليوم روحي الترفه يبنادم
تجر جرفك عليمن؟!
آنه سويتك جرف يفلان يبن آدم!
ابن آدم
عله ابنادم تكبر
ليش يبن الليش يبن آدم!
يا نهران أهلنه
وها! وصلنه
ولن خبط ماي العروس ابلا سبب،
والتموا الشمات لامونه وبجوا،
وعيونهم تضحك شماته
حبيبه يا نهران اهلنه..
وصفطوا احجايات واحجايات!
وابنچ شمرت إليالي الغرب كل الشبچ فوگه
وايرافس چنه كوسج موت
شگ الشبچ، لاچن گلبه من اسنين،
طگة إخياره طگ ومات
مرات العمر خفّگ.. وفرفح وانذبح مرات
يا نهران اهلنه السچه عدت والجسر مر فوگ البساتين
شايل كل حزن تشرين واشرناله
يمكن شافنه.. وما شافنه
وفات وبعد ما فات
گعدنه انطش بختنه، والحزن والليل والحسرات!
گلنه: الگمر گفه ليل تنگل ذهب للبصره
گلنه نجمة الغبشه اشتهت نهران اهلنه
او صبّحت خضره
گلنه ابنادم الخلينه كل العمر بشليله
نفضنه وراح لهله إيمشط ابشعره
ورجعنه اچفوفنه اتصوفر امن العالم
واهد ليلتهه يبن آدم
وسطه ماي وما ضاگت جرف روحي الترفه يبنادم
تجر جرفك عليمن؟! آنه سويتك جرف يفلان يبن آدم
ابن آدم عله ابن آدم تسودن.. ليش يبن الـ .. الليش
يا ابن آدم؟
.....______________________________________
نهران اهلنه
قصيده الشهيد ابو عليوي
لشاعر
#مظفر_النواب
راجع..
بطرگ المواجع
حیل ادگ راسي
بشبابيچك..ندم
ضايع
وادور على ضايع
اركض امسودن بالشناشيل
وعيوني دماية كحل..وازنابير
مايع
حلو مايع
وبكل برائة
وعلي الشرجي
من اجيسك
عنبر بوسط الاصابع
طويرني...ويسترها ربك ...خطف
والدمام يرگع
والعطش...سد الشرایع
راجع...
بطرگ الدمع عیني بالوشايع
ادك باب البيت ...واسمع
كل وطنا...
ايگلي ما قصرت .
.واحچیله الصوافن والسمایع
راجع
احط دوخة راسي بسكوت..اعل چتفه
نخجل سویه..بناس تتسمی طلایع
ویفتهم...لیش اسکتت
کلهن امسامح علیهن...الا المنابح وراي بغرب
واتچبح...اتچبح
والشماته ما بین الخناجر
مرة اشبن واني واگف
مرة اشبن واني ..واگع
کلهن لخاطر...عیونك..
الا...المصافح..سچاچین الذبح
کل یوم
عن سوله وطبایع..
راجع...
بساعة الحملة....واشوفك
ولك راجع
.....______________________________________
اعزائي محبي القديس مظفر النواب يسعدني اليوم ان اقدم لكم هذه الجوهرة من شعر النواب والتي عجزنا عن تفريغها سابقا لسوء التسجيل وقدمه وعدم الوضوح حصلت عليها هذا اليوم منشورة على جريدة قديمة ناطقة باسم الحزب الشيوعي اسمها ( طريق الشعب ) عام 1974
قصيدة سالوفة أبو سرهيد كاملة
كامت هيبه يابو الليل
وخيوط العشك
طرزن وراك اخبار ع المكشوف
ياخنجر ع المياسر
عليه اسم الحزب معكوف
يموصل مكاتيب العرس
للماوراهم غير الفناجين والديّان
وسالوفة وكت غزلوا عليها العمر ريحة صوف
يمسوي الجلاج الخيزران أنهار من لون البنفسج
وانتَ ساكت
وحدك السكان والشادوف
يلوحدك من تسولف
أشوفن كل حرف منك مشط ياكل سبع طلقات
وكل ركزة ذهب
والشين حمّالة صبر وسيوف
اسولف لك سوالف ليل وحصيني نفط
واحزاب اجاها الموت
طرك الله وكرسي بالوزارة ولبست النفنوف
خل يكعد فهد ويشوف
اجاها الموت جبهة شعب
تفكس عين المجذب
وخل يصبر ثنائي عامر وصدام
وخله يشوف
يغاتي بغيبتك كام الشكنك والبثل والزبل والخريط
وانت تكلي لو خيط الفجر بين
الزموا الخيط ولتعوفوه
ماجذبت
لكن كلي وين الخيط ؟؟
اجيتك معتني وملكيتي قوطية تتن وشماغ
يالعيناك بالظلمة الثجيلة وجاغ
كلهم كل حزب بالجبهة يتلون جذب باوصاف
ولو طك الفشك دنياك ماتنشاف
أكلك آنه أعشي
لو أشوفن ناس بين الاس ماهي ناس
عد الله علمها وجرة الترباس
وأشوفن آنه واوية التزيّه بحرص ع الجبهة
وأظنها مدولبة وكارصهه خيط افلاس
وأشوفن آنه يوم الله الجبير يكشف الروس العليها كرون
وأشوفن ناس تكشف الها بيها
ولسه ياسرهيد
لسّه ماوصلها الماي والصابون
أوصيك ابن ابني
لاتخش بماي
ولاتغتاب شعبك وانته بالغربة
تراهو الشعب يعرف منهو ابنه ومنهو ابن الزنا
ياسرهيد .....
بالك يبني تجذب عله شعبك
واته ايدك وره ظهرك تقبض حساب الخيانة
الها يوم الايد تتجرذم وتشهد
ذيج أدوَن إيد .....
طعمتك جبدتي وكبريتك
تاخذ بحوبتنه من كل المذابح والتهايم والمحاكم
ولك .....
ضيم الله وطراكيعه
ولاوكفه بقفص محكمه
وكلسا واحد يكلك ....
ولك فلاح وتنظيم وسياسة ....
ولايهمك هذا شرطي واسمه حاكم
يوليدي أكلك
من تكف بيها ويكولولك خلك فلاح
إخزرهم خزر
وتنومس بكبر الشعب
مايبقى ظالم
أنا للما يرضى
كلّه فلاح ابن فلاح ابن فلاح
بمعزّة
وكله شعبي وحزبي سالم
.....______________________________________
ياريحان..........
أشكد نده.....
نكط على الضلع
نسيت أكلك يمته
أشكد رازقي ونيمته
وأشكثر هجرك عاشر
ايام الهوى وما لمته
إنت سحنت الليل
بكليبي
وكلت موش أنت
****
يا مه التراجي مرجحن
حسك الصافي وغفه
ويامه سفحتلك بليالي ادموع
جانت ترفه
ويامه الدمع ضوع سواد
العين وعينك صلفه
وتدري تنيت الدفو
بلهفه ورده
وما جيت ونيمني الثلج
والشته كله أتعده
لا بالمحطة رف ضوه و لاخط جانه من البعد
لا ريل مر على السده
والشته كله تعده .. كله تعده
و أعلكنه للصيف اليجي
روازينه السمره
شمع
من ينزل أول الدفو بنيسان
يهتز نبع
يمكن يخضر الضلع
يمكن بعد بالروح , يا ريحان وصله تنزرع
والكيظ أجانه و أنكضه ورد أنكضه
ورد كيظ أجه
والزلف هجرك فضفضه
ورد فضفضه
وما مش رجه
****
ولساع من همسه تجي من بعيد
يخضر ضلع
كل نسمه ترفه من تفك الباب
يخنكني الدمع
لساع ... ولذتنه أنكضت
أهجس على الكصايب شمع
وردود أكلك ... يمته؟؟
أشكد رازقي
ونيمته
أملني يسمر بيك
كل عمري أنكضه وأملته
حته خيالك بالحلم
خايف يجي وأمنته
****
كل لحظه من هذا العمر
وعت حسافه بكلبي
يا أول الريحان يلعطيت
نوبه بدربي
ي أخر سوجي حنيني وحبي
من يوم طيفك هجر نومي ما نمت
حنية يا جذاب منك
ما شفت
من ظني كضك بالحلم
عنبر فحت
من ردت أجيسك جست روحي
وفرفحت
أترف من أجفاف المهر
قندون ...ما ضايك شكر
يا حلو ياجرت كحل
ياحلو بوسة سهر...
يا حلو ياليجي قهر
شيضرك ... بكل شته الولهان
لو صحوة مطر؟
والشته كله تعده
والكيظ هم أتعده
شجاب العشك؟ وأشوده؟
لا بالمحطة رف ضوه...
لا خط أجانه من البعد
لا ريل مر على السده
والشته كله تعده كله تعد
*
.....______________________________________
قصيدة : درج
شايل قواطي ودرج فضة صيف
گال النا :
صبغ البيوت كلها البارحة ...
وماظل صبغ ... ماضل ولا شوية صبغ
حط القواطي ابابنه ...
ووصانه گلش بالدرج ؛
گالنه انتوا ان شاء الله عام اليجي ...
جم عام مر وجم شته
مطرت علينه اسنين ... وانترست قواطيه مطر،
والدرج من البرد والايام للماضي نعوج ...
ياصيف ريتك لاتجي گلش عتگنه ...
وبعد مانسوه صبغ ...
خلينا من حجي القواطي والجذب
عشنا بقواطيگ عمر ...
لاتعتذر موش الهضيمة على الصبغ ...
بس الدرج خدام ... صار اخشاب بين الناس
الله يسامح الي نزلنا ..
خرگة خشب ابسوگ الهرج
.....______________________________________
نكضني النهد
شايل ثكل
شامه
وبمي الورد
غركان
شامه
شنهي الخصر هذا
ابحبس خزامه ؟
نكضني النهد
نكضني . نكضني
شهكة عرس ، يا اسمر
يا منابع طيب
كشمش عجم
مطك يا شراب زبيب
كلبي اتلوع
بعد ميطيب
نكضني النهد
نكضني..نكضني
لابد من زغر فهمه
بدفو العنبر
ضيفي الهيل ، وضيفني
أبشيم شمر
شك الزيج . يركشني
ركش خنجر
نكضني النهد
نكضني ...نكضني
ريك الورد،،نداك
يا رابي برغد
خصر الترافه بضيك
كطعت الصدف
كلل. تتل الزيك
نكضني النهد
نكضني....نكضني
.....______________________________________
قصيدة النواب بعنوان فوك التبرزل...
ودّيت جفن الكحل،
مشحوف ناكل حِسِن
ناكل حنين العشك
شهكات ليل وحزن
لاوجَّه ليل،
بوصل..!
لاطيف!!
كلك دفن
وأمَّيتك لَذِّتي..
وفوك التبرزل طَعُمْ.
أشهك..
لَوَن احضنت خصري..
بذبح منجلك
ويدور حَز العشك..
داير مداري..
فلك
مابين نهدي،درب قداح ياأسمر..
الك
واميتك لذتي.. وفوك التبرزل طَعُمْ.
أفيش..
شمني..
بشهيك الروح،
شكة طلع
فُوج بحنين الصدر ،
طوفان دَك ورصع
ليش آنه وانته بعطش!؟
موش أحنه،
نبعه ونبع
وأميتك لذتي ..
وفوك التبرزل طَعُم.
مابين شهكه ونِفَس،
ليلتنه..
هودج عرس
تاخذنه..
ونِرِد
الشفاف تنكط دبس
زقني..
بلذيذ النِفَس
كطْعِ النِفَس
للشمس..
واميتك لذتي..وفوك التبرزل طَعم.
أمس..
الهواجس خذن مشحوف روحي .. بدجن
ما دكّن بهاجسك..
يا اسمر
معاضد حِسن
ردّيت جفن الكحل،
مشحوف..
ناكل حزن
لاوجّه ليل،
بوصل..
لاطيف..
كلك دفن..
وأميتك لذتي.. وكِل التبرزل طُعُم.
.....______________________________________
وتروح وتجي الايام
ألوليك بكل الرازقي الميت
على شبابيچ أمس
والدنيا تمطر ليل
اگلك ناااااااام
مامش كلشي بالشباچ
غير الريح
وطير بعيد
مايرظاش يحط ببلاد
طير مصوب بگلبه الصغير
ومشتهي بغداد
أميرة كل مدن الله
أصبررررررري
تسلحي بكلشي
تراهه الدنيا بيد اوغاد
يحبيبه توضه الذيب وصلى
من چذب لله
ولبس لحيه
وزرع حقده قنابل بالمدارس
عود أله الجنه
وتنطره سباطعش حوريه بالباب
وترووووووح وتجي الايام
بغداد ابخطر كلش
يگلبي هُمدّاك تنام
بغداد التحبهه امتلت طاعون
وأيتام الظبع وأيتام هتلر
والثلثتنعام
ماخلوا وصخ يعتب عليهم
لچن الله چبير
الله والشعب والشمس
واهل البيت جبهه
وجبهة العفنين للحمام
ديچ أبو العرفين
ومحجّل حِجل حُبي
علامه
يفرش الجنحين لو شافچ
من الفرحه
ويشمر الشوگ گامه
امگابل أنه ديچي
يا حبيبه
نلگطچ شامه .. شامه
آنه يا حبيبه
فحل
وأعرف سواليف الفخاتي ..)
.....______________________________________
قصيدة جمبدة محجايها ربك
گطرة امية نداها اليل من قداح خصرك..
وانه ضبة بخور خلصت بالوسافة
وظلت العطابة..دخانة وعود
كبل ما شوفك وشيش بروحي يزعل
اعرف انت...وخيمة النعسان ما آلها عمود ..
فرد نوبة بالسماحة...انطيني من زودة حلاتك..نفس راحة
اني گاتلني المسچ..... مشمشه بنص بگلب خدک
ادري عنبر ..وادري عود الياس صدك
يا سمح كلش سمح ليش الصدود
سطري ضايع..مثل عصفور الشرايع.
..والفكر متخلبص بحزني وشايع..
ارتعش حيل من اشوفك..
مثل تكية المامش..نفضاها اليل فوگ النبي هود
روحي عيدية مطر..جايه لمراجيحك اتعيد.
حطلي بيها بالچذب بالعيدیة ..صم چذب
سماکه.. فصمة تمرة عود
على ياهي اتلوم ..والوردة اجت فوك النزيزه ...
وانت نهدك جلجل ازغيرون ..يلعب على ريزه ..
لاحني بچفه اعل خدي ..بنص عذر مسقول ..علمني الحدود
روحي عيدية مطر..جايه لمراجيحك اتعيد.
حطلي بيها بالچذب بالعيدیة ..صم چذب
سماکه فصمة تمرة عود
امني..نومة ليل ..وانطر..
فوكي يتراجف جفلها..
يا خشلها يا تبارك...
يا عرس اية اعل اية..
يا عنگ ساحة مرايه...سنيني راحت بيك..راحت چنها جایه
اصعدت ارکض وامدلك باية باية..
والحسود بعینه عود
لا تحط شمعة افراك اعل المخدة
..احنا شدة....
احنا كطرة ماي..وكطرة ليل ..
تتلاكه اعل وردة..
احنا قصة تين وشهكة عطش..
تتلاكه بمودة..
وننعكد كون الله بينا
من المدينه للمدينه..
بجاه كل بوسة اعل خدك لا تكلي اني احبك على مود
تراها الدنيا تمطر..والكلب درجاته مرمر..
وين جيدك ...اني خايف كودني بريج المسچ ..واعمیني عنبر .
وين ماشي وگلك امچلچل علیه مدري ماشي مدري راجع .
هيجت كل المواجع..
حبة الحنية يحبيب...لذوذ
چن جناجل تصهل بذیچ الاصابع
شابگک واتگلي اشبگ
وابتعد چذابي عنك ..ارد اسمعك بذني هاي اتكلي عود ...
انت شايفني رحت خاطر اعود .
شبيدي گلي ...اني ما اكدر عليه..
خصر خصرك لو تقية.
لو محابس ليلو شامرها الحسن ملوية..
والشمسه طشت واهليه
افيش ..يا شهكة حلاوة مستكية
..بخنصر الايام اضوگك..انت اكبر من اديه...
واني شككت الدفاتر فرد مره.
لكن الايام .طفيرة كمر والروح خضرة...
اشاااااه .من حطيت ثلجي اعل النهد..نيران كبره..
وجاوبتني بكل برود...
يا وسافة ...يا وسافة..
ما شفتني..وعطبيت من الوعود كون ابوسك نفس واحد
للسواجي للمعاتب ..
ليلة هاجت ..جنبدة محجيها ربك
للضليلة
اختنك بيدك واصبح بالجليلة..
بجاه كل عصفور ضايع لا تروح اوياي كلش...ضيعت راس الشليلة..
وغصن تفاح اعل ساجيتك .....
.....______________________________________
البارحه فرغة هذه الابيات من احد الامسيات طبعا لم تنشر وحتمال جديده عليكم.. يقول مظفر لازم انطور الموارد حته يظهر الابدع ونغير ماهوه شائع الان بالغنيه والقصائد فقدم هذه الابيات للحداثه والتطور
يابيت وحدك
كاعد بهل ليل
مرو غجر
من نوم وريحت مسچ
ياريل گطفو ورد
من خد حديقه
ومشو
من كثر ماسافرو
شالو معاهم نجم
.....______________________________________
ماله احد شغل بيـّــه
أصفن بشحة غماماتك
سطح متحملك صيف وشمس
والليلة گالولي مطر
وتحضرن لشگوك لبگـلبي اخَضِّر
وارتعش بمَّيتَك
وارگـص لالله الليلة سامحني گـمر
ونبلل الجيران وقداح الحديقة لغاد من النوم
أشمّك مِن غَميجك
فوگـ أشوغ بطعم ريتك
وانزل مضيع إبّختك كل صواب
محجل وناسي البشر
والصبح يلگون سكته ومادري شنهي ومشط ومراية
بوسطها اثنين ضاعو بوس ومامنهم خبر
ماله احد شغل بيـّــه
جن جرس عطلة وادگـ نوبات نص الليل وحدي
احجي وحدي ووحدي اطفى
ووحدي ارجع اشتعل
گلت اگضي لظل من الايام اتفرج من الشباك عالدنيا واهلها
ولن من الشباك الگبالي اتلجلج شيشة من بلور صيني
مبوخة عنبر وتوها جايه من الغسل
سوكرت .. سديت نص عيني بربع جفي
وشفت شمسوي الله بخصر يتداور حجل
زحت اصبع وصعدت لي فوگـ
واصبع ورا اصبع لنه نافش روحه گـدامي شرس
طافح حليب اللوز منه و عَ لبعد عضاني
بس عضة طفل
عض بعد .. عض بعد
يلتلفنت للجنة من شباجك لـگـدام بيتي
وبالغلط فريت رقم النار بيــّـه
فر بعد .. بس فر عدل
ماله احد شغل بيـّــه
جرس عطلة صيف ومتاني المدارس
كل گـصيبة تگـلك آني
وكل خصر محبس عروس يـگـلك البس
وانت نازع نفسك من زمان
وململم سكـتــّـك
جيت للدنيا نزل
ومسافر الله وياك للصنطه نزل
.....______________________________________
يا طعم......
يا ليلة من ليل البنفسج
يا عذر....
يامامش بمامش واحبك
طبع بگلبي
من اطباعك ذهب......
ترخص اغليك واحبك
أنا متعلم عليك هواي
يا سولة بسكتي
ياطواريك من الظلمة تجيني
چانن ثيابي علي غربة
گبل جيتك
ومستاحش من عيوني
وعلى المامش حنيني
وچلمة الهجران زارتني
گبل حبك ياغالي وولمتني
على المامش علمتني
قبل ھجرك
آنا هجران الليلي غلباني
وگبل حبك
آنا حب كثير
گبلك ذوباني
لگحت بعيوني
كل الطلع گبلك
وانت توك
عوگك يا أشگر
عوگگك كلش زمانك
عن زماني
شلون أوصفك
وانت كهرب
وآنا گمرة ليلي
دمعة بليل ظلمة
شلون اوصفك
وانت دفتر
وآنا چلمة
ياللي ما جاسك فكر بالليل
ولا جاسك سهر
ياللي بين حواجبك غفوة نهر
ياللي جرى الما بعينك
خاف أفززها من اگلك
آنا احبك
مامش بمامش
يا ميزان الذهب وتغش واحبك
واگلك طرني حسنك يابنفسج
وانت وحدك دوختني يا بنفسج
وعلى حبك آنا حبيت الذي
بحبهم لمتني
يا طعم ياليلة من ليل البنفسج
يا عذر عذرين يا شنهي وأحبك
.....______________________________________
حمام نسوان القراه الثانيه
ترجف ايدك بالجريدة
چنك إدور وطن
مطر والشارع مغوش حچي
وريحة ناس مالك شغل بيهم
ترجف ايدك بالجريدة
چنك ادور وطن بالحچي الفارغ
آه ... من كسر الوطن ماينجبر
ياحسافه ......
اشگد مسحت گزاز من شبابيچ بردانات عمرك
بلچي جيتهم اشوفك
اجا اول امس واحد ....
مسح جاماته الضعيفه
حيل دحج بيك كلش
مثل شرطي جديد يبين مايعرفك
يمكن احسن لو يعرفك
من زمان تريد تحچيلك بواحد
من زمان الناس تكتب
والحكومة ( الكحبه )
كل يوم بمدينة
بس ياگلبي اشكثر تلهم بالصبر
تحلم بحمام وريحة مستحه ونسوان
بين افخاذك يدورن على الصابونه
ويصبن نهدهن والمسچ فوگاك وطاسة ضحچ
ونت بگد الاصبع
يبدن شويه اصابيعك يفهمن
يلعبن بالصابون ويحبن تمر
يبدن اشويه اصابيعك يفهمن
يلعبن صابون وتحب التمر
كلش يبيضنك من جديد ويوسخن صفنتك
حييييل ينشفلك افخاذك حيل
وتگلهن شنهي الصابونة من جديد ضاعت
يضحكن ساعات
ويشوفن مثل عصفور خايف بالمناشف
وانت كلسه اشوف جدهِن تجدح عيونك گمر
تحلم بحمام للگهوه يجيك
تمسح الشباچ بردانات عمرك
بلچي جيتهم اشوفك
يجي شرطي جديد بالكاغد
يبين مايعرفك ؟
يمكن احسن مايعرفك ؟
تلتفت ليغاد احسن مايعرفك
تمسح بخرگة جريدة دمعتك
تلگه وطن حدر الدمع
تلگه گربه مسيسه لله وحدها
گربه كلش
لكن اشيل الوطن فوگ البحر زفة شمع
وإن من الهوى ما ليس عشق إنما سبل
وشاغلتني محجلة ببيت في العراق
علائم فيها الفم العذري
إغفاء شديد الوصل بين الحاجبين
تمائم مكتوبة للنهد
نصف شراسة في الحلمتين
أطالة في الخصر ما طال الهوى
خصر وحزن توأمين
وطقس ليس يعتدل
.....______________________________________
قصيدة گلي هم آني اريدك
شهوة الغبشه إعله خده
تگول غيمة ورد
والشامه ملخص بوس
ورده تناغي ورده
منين ما شمه بنفسج رازقي وجوري
وعطر ما ينطي إسمه
لچن يفوح بمودَّه
بالجزر ياخذني جوَّه بعيد ...
وأشهگ
خايف اغرگ
على حد الجزر
يصعد يضوگني مدَّه
مد جزر يطويِّب وكلش لبيب الروح اريدك
گَلي هم آني اريدك
نزل دف للگاع گلبي
حچايه ما سامعها من شفافه
مُدَّه
غابلت طلعت علينا الشمس
گبل الوگت
عرگانين عله البردي
وعرس نِفّاش يتطاير علينه
وآنه من طعنات نهده
عاضِض شفافه
واگله بجاه خدك
وحده ... وحده
جفل ...
چن مهره رشگها المطر
والنهدين گعدن ...
عله غصن الهوى الاخضر
غرَّدن تغريد يا بو فلان
وآنه عيوني تلهث
شنهي هذا الطول ؟!!!
والصرَّه سكون
بنصها رشفة هيل وشدَّه
والشفاف تراجفن نتلاگه باچر
صحت ما عنديش باچر
آنه هسَّه !!!
ونزل كل الطول فوگي
وآنه فوگ الطول صاعد
مدري شنهي الصار بينا ؟!!!!
ثغبرة قداح ... حرگة صيف
لچن گلبي ندَّه
نتلاگه ريج بريج ...
وداوينا عطش صحرا بعيده
صار يمسحني الزمن
والزمن يمسح
لچن اتركنا عله أمية الحزن والبردي ...
ورده
شگد غريبه الدنيه
ناس تعوف شوكه وناس ورده
العشگ ماله حدود
لچن زعل من نسَّيتْ روحه بطارف لساني
ودفعتي بطيب خاطر
گَلي هذا لسانك يبين وكح
وتلَزِّمه حدوده
گتله ورويسات نهدك هذا حدَّه
شگد غريبه الدنيه !!!
ناس بناس لحمه وسده وروح بريج
وبعض الناس ...
يستر الله بس ريش المخدَّه
.....______________________________________
جاي من بعيد احبك
أنطر شويه صِدگ
الأيام جَدبه
فطَّرت روحي واگلك
وإنت تسگيني عِطش
چفَّك وحدها إميَّه عذبه
عطَّشتني بماي حُبك ...
خاف ربك !!
إنطر ... إنطر
وآنه ازهِّرلك مثل متريد
حِنه وبوس وگرنفل بدربك
مدري وين آنه وگفتلك
بلچن الله وتعبر الشارع
وأگلك دير بالك ...
جاي من بعيد
أحبك ...
وإنت چن صفنة عصافير الثلج
ضَليت واگف عَالرصيف تجاهلتني
لٰچن نهودك إنتبهنْ ...
غرِّزنْ ...
فكَّيت حِزني
سكَّتتهن ...
سكِّتتني
إشااااااه ... وحده
وبعد ماگولن لَحد ...
دير بالك
جاي من بعيد
.....______________________________________
بعد 18 شباط 1963 بأيام الشاعر مظفر النواب والمطرب عبد الجبار الدراجي يترددان على بيت الرفيق عبد الجبار وهبي " أبو سعيد " في آخرة الليل ، على الرغم من إن الشاعر النواب مطارد من سلطات الحرس القومي البعثي بشكل معلن !
يعتقل الشاعر مظفر النواب ، ثم يرحل الى (نقرة السلمان) ويكتب قصيدة ناقصة في حق الشهيد وهبي ، ومطلعها يقول :
عودتني .. إشلون أحبك
وأرسم على الأيام موعد
وعودتني العيد يعني الناس
ووياهم أعيد ..
ثم يختتمها :
لكنك سافرت من غير رجعة
وعلمتني إشلون أهواك ..
وعلمتني إشلون أنساك ..
علمتني إشلون ؟!
إشلون أحبك !!
.....______________________________________
فغناها صديق الشهيد الدراجي ..
مطر
مطر ما يسوه المطر ..
آصفن سنين العمر ..
ما مطرن آيامك عليّه ..
و من چريب اتعلميت الناس ..
سميتك " مطر " ..
ﻣﺜﻞ ﺍﻟﻤﻄر
ﻟﻤﻠِﻤﻴـﺖْ ﺍﻟﺮﻭﺡ ﻗﺪٌﺍﺡ ﺍﻟﺤﺪﻳﻘﻪ ﺍﻟﻐﺎﺩ ﻣﻦ ﺍﻟﻨﻮﻡ
ﺣﻈـٌﺮﺕ ﺍﻟﺴﻄﺢ
ﻭﺑﺪﻣﻌﻲ ﺟٌـــﻮﺍٌﻧﻲ ﺍﻟﻤﻨــﺎﻃـَﺮ
ﺟـَﻨﻬﺎ ﻣﻄﺮﺕ ﻣﺜﻞ ﻛﺬﺑـﺎﺗﻚْ ﺃﻣﺲ
ﺯﺧـٌﺎﺕ ﻣﺎﺑﻴﻬﺎﺵ ﻳﺤﺒﻴٌﺐْ ﻣﻄﺮ ﻳـِﺴﻮﻩ ﺍﻟﻤﻄﺮ
ﺷَﻜَﻜَﺖْ ﻛﻞ ﺍﻟﻜﺘﺒﺘﻪ
ﻭﺭٌﻗﻴــﺘﻪ ﺇﺑﻌَﺬﺏ ﺭﻳــﺠَﻚْ
ﺩﻓﺘﺮ ﺇﻳﻨﺎﻏﻴــﻚ ﻣﻦ ﺇﺯﻣــﺎﻥ
ﻣﺎﻳﺮﺿـﺎﺵ ﻭﺍﺣﺪ ﻏﻴــﺮﻙ ﺇﻳﻮَﺭٌﻗﻨﻲ
ﻣﻦ ﻛﻞ ﺍﻟﺒﺸــﺮ
ﺻِـﺪِﻙَ ﻣﻄﺮﺕ
!! ﻟﻜﻦ ﺇﺣﻨﻪ ولاﺭﺫﺍﺫﻩ ﻭﺧﻀـٌﺮﻳﻨﻪ
ﻭﺑﺎﺟﺮ ﺇﻳﺸﻮﻓﻮﻥ ﻓﻮﻙَ ﺍﻟﺴﻄﺢ
ﻭﺭﺩﺓ ﻟﻴـــﻞ
ﺳﻜﺘـــﻪ
ﻭﻣﺪﺭﻱ ﺷﻨﻬﻲ
ﻣﺸﻂ .. ﻭﻣﺮﺍﻳــﻪ ﺇﺑﻮﺳﻄﻬﺎ ﺇﺛﻨﻴﻦ
ﺿﺎﻋﻮ ﺑﻮﺱ ﻣﺎ ﻣﻨﻬﻢ ﺧﺒر..ْ
.....______________________________________
يا رايد الريك مزموم الشفايف مسك
عنبر ورد كذلتك وانفاس خدك مسك
مسكيتك من الخصر بس لا تعيد المسك
أشجيك للي مزج بيك الخمر بالذهب
الماز خدك ضحك بدموع من مي ذهب
كلما شبابك يجي آنه شبابي ذهب
تتكلب اعله الهوى يا طير من المسك
من تصفن الروح يرويض اكول انطفت
تفن على ايام من ظلن غبيه انطفت
الطيب بيهن غرك والجيفه بيهن طفت
عافاك الله زمن كلش خسيس وغبر
تطرب لناس تنك وتكلي وكتك غبر
وك أنه نهر العشك وسكيت صبخة وغبر
وتكلي وين التمر والدنيا مني انطفت
.....______________________________________
متوزرة بالماي
لمحت ظلي بين الگصب
ظنتني آنا الخضر
شهگت للفخاذ
يا مولاي أرجى الستر
وتوزرت النوب وزرة ماي فوگ الماي
زاد الوزر
لن غطت الجيد
بين ساف فوگ الفخذ
وان غطت الساف
صار الساف جقة وشبر
.....______________________________________
شنهي اطيب من اذيتك ؟!
عندي ورده زغيره كلّش
بين شدّات الورد ترضه احطها بمزهريتك
عندي بذرة وركضت مثل الصدكَـ
طشيتها بواسع محبتك
ضحكو لكَضو عمرهم بالبذر
كَالولي كلش على نيتك
عندي سكتة وكلش اترجاك تسمعها
واحب جفك
اريدن افتهم منك سكتّي
وتفتهم منّي سكتّك
شاورتني بوردة بيضا وانه اعاند
جن طفل روضة وغلط غلطة
تركته يشيل ايده سنين
يامطول عقابك
حتى لو صوجك اكَول الصوج صوجي
جني التذ باذيتك
شني اطيب من اذيتك
لكن الليلة اجيتك كلشي ماعندي
وامد لك رعشة ايدي بخجل
وانه دموعي مدري بيا مكان تريد تمطر
شوفني .. ولك شوفني وما اريد منك شي بعد
راضي بمشيتك
.....______________________________________
وركة ياسك
بگت ورگة ياسك ابستاني والباگي بحياتك.
. بگت الطوفه.. وحياتك..
أخذف مخاذف صگر مگطوع بالثلجه
وگرب ليل العمر وانتَه.. ورضاتك .
. سولفن عنك أميرات الفخاتي
گالن: النگار بالزعرور ما يوصل حلاتك!!
چنت أتانيك بمحطات العشگ
ليه منزلت؟؟
عَدّن فراگينه الصبر.
. والروح منذوره كلبدون.. لعباتك
يا بعد روحي.. شحلاتك!!
يا بعد روحي.. شكثر زلفك بريسم؟؟
أهيس لمن أشوفك گلبي..
وردة ماي تشهگ بچفي..
تشهگ..
أهيْس لا.. لا على بختك.
. رايح أغرگ گلي..
چم غرنوگ مات بحسد يتلع..
يا الخطايا ابرگبتك مالي روح
آنه أجيسك لا يظل طبع إيدي فوك الخصر.. حاير!!
ابجي من شدة حلاتك
ابجي من واهس لساني بطاري طعمك
مو بديه عاد وحياتك
ماعرفتك زين الا من ضيكه من ضيكات خلكي
وزينه من زينات ذاتك
احلف بفنجان صرتك ظلت من أيامي..
شَفّه وبيها..
كل الهيل.. عاد.. إنت.. ووگفتي..
ومستحاتك سنين..
سنين ربيتك.. على محاچي الثلج يا وسفة..
الوسفات شحيت.. برباتك!!
شوف حالي.. شلون بلوطة شهيگ..
بمگبرة.. وتعوي عليّ..
دروب عمري وانطر الصد..
برضاتك يوم حادي افراگ عشگك حدى..
والتمن عليَ..
تخورست.. چني لگوته!!
واعتلگن شموع الشماته على..
الصواني ولوَن.. تدري.. شلون يتگلب.. بگلبي العتب..
وأنت النار ..
وسولفني.. زماني للي مايسوى..
يبَو الكلفات..
وسولفني زماني سلميت عليَ..
من طارف چلمتك..
لا ولك هاي بنادم عليَ وحشم الها..
بالسواني!! حبه.
. من شفتك.. حشمها.. تردلي روحي.. وروحي طيره.. مثلجه..
وعلگتلك.. بين روحي..
وبين.. ترچيتك..
جناجل.. عتب.. ومعاتب.. وهلهولة.. رجه..
الاّ.. ما ظنك.. بعد من حبك.. رجه ..
.....______________________________________
يجي يوم ونرد لاهلنه كامله
..
يجي يوم ونرد لأهلنه
يجي يوم إنلم حزن الأيام
وثياب الصبر
ونرد لأهلنه
يجي يوم
الدرب يمشي بكيفه
ويردنه الوطنه
يجي يوم
أنفرّگ الغربة على العالم ملبس
والحزن طاسات حنّه
زغارنه يعرفون
ألهم ظهر بالدنيا
ومدينة وناس
وجيران و گرايب
ما يگللهم طفل: غربة عراقيين
ويموت اللعب بيهم
ياطفل الناس مانعتب على اهلك
كلنا غربة
لاچن احنه نشوف كل الحزن يحبيب حبايب
يجي يوم
زغارنا يعگدون خيط الشمس بدرابين كل الناس
بلچي هناك حي الله طفل عن اهله غايب
تجي الدرابين
تاخذهم للبساتين
يلگطون الذهب خستاوي ذايب
يجي ذاك اليوم
لاچن انه خايف گبل ذاك اليوم
تاكلني العگارب
يجي يوم
الفرح ياخذ كل مساحي الحلم
يحفر ساجية
ويسگي العمر
ونگله ياعمي فرح
راح الربيع
ظلت افطرة حزن كل يوم اخذها لمحطة
چم محطة چذب مرت ....
وشكثر سواق چذابين ياعمي فرح؟
والناس تتشلبه على الفراگين
وزعاطيط وزعاطيط افندية
شگـلّـك چطلة
ويخشون بعيوني ويگولولي سريع
والله چطلة
والك چطلة
والله چطله
ولك مخدوعين
چطلة
واصعد ويه الناس
هذا اليشتري وهذاك اليبيع
كل بشر يوصل محطة
ويشبگ اهله
وانا اشوبح من شبابيچ الفراگين الحزينة
انطر احد ... مايجيني
انطر الدمعتها چانت
نجمة تتلالى بجبيني
انطر انطر.
وارجع ردود لمچاني
وينزل بگلبي الصگيع
السچچ خلصت... ماوصلت
ومشيت وحدي بلايا سچة
ايه ياعشگ الماله سچه
ياوطن
يا بيك
وبلياك اضيع
يجي يوم اركض
بالدرابين اتلعگ بالشناشيل
ابوس البوب الحياطين
الشبابيچ ورجلچ
وانه اصيحن اهدي يابغداد
اهدي الغربه ربتلي عله
وسمع حچي يسم البدن
وسكت اكولن شحچي يحبيبه
الوكت گواد..
اخذيني السواد اليل اسمع طوشه توكع
وگعد صغيرون كلش
حدر تينه
مثل متزهر ازهر
واسمع زريزير يزرزر
على كيفه
ودجله هناك ليغاد
اخذيني وحگ عيناچ
عَگرَّني الليالي ودنجن
من شافن اسمچ على راسي
وبيّه طن عناد
يگلي فريخ
توة يهذري
مااعرفچ ... لَوّن رديت
اذا مااعرفچ آنا
الدنيا ماتنراد
يجي يوم نلم حزن الايام
ونرد البواچي للگلب
مثل الشبابيچ بأيام المطر
يجي ذاك اليوم
لكن خايف اتعب
گبل ماأحظنك بأيدي الاثنين
يا كلش نهر
يجي ذاك اليوم
وأن ماجاش
إدفنوني على حيلي
أشبح لنيرة هلي
رايحه لبغداد
اعظ الچفن
واركض وره النيرن
جاي يابغداد
حي ميت اجيلچ
بالگمر جايچ
وبلايه گمر
.....______________________________________
ارد اشري جنجل والبس الليل خزامه
وارسم ابدمع الضحج نجمه وهوه وشامه
وياحلوه بين النجم طباكه لحزامه
وهودر هواهم ولك..حدر السنابل كطه
مظفرنا
المقطع هذا غير منشور في الطبعة الاولى بمجموعة للريل وحمد وقد اضافه الشاعر في الطبعة الثانية التي صدرت عن دار المدى
.....______________________________________
زفة شناشيل
زفة شناشيل مرت بالعكد
والدف يرفرف فرح
والدشداشه كمره
وكلبچ جكليتة تمر
والحنه تركضلچ
اكبالچ تفرش السجاده خضره
واحنه عصفورين لمينه الوكت
حجرت عرس
والنومه يمج دفو حضره
اشكثر زخت هم امس
وركضلتج شمسية عشگ
اشكثر دكت ايدي
بنهيدچ البرحي
نار بمرايه اشيكمشچ
من اجيليج
انطبچ انه
ولهيبچ نحترگ
طعمه يابريحة الله
وعنگج معيبر كمر
وانه فارش حضني انطر
بلكي نسمة ليل تلعب بيج
وصيرين حصتي
گبل ما تملي شليلي
وگلبج ايام المطر
زفة شناشيل
وانه وياچ ختيله بحجرت النوم
ومخاديم ودواشگ وظلمه الظلمه حلوه
الظلمه ما تترك اثر
والتكمش حلو يحبيبه
وذا لكيتچ اظمچ
ورجع من اول اكمكش
انه يعجبني لتكمكش
انه يعجبني ادور علكمر بالغيم
ما احب الكمر كلش كمر
ياعمر كلك مطر
يافرح چنك قهر
مين اجيسچ
تاخذ الختلات روحي
الگه عنبر
الگه مشمش
الگه غرنوگين يصلن
الگه شي ساكت مثل فرخ الحبر
الگه شي ضايع نهر
دشداشه كمره
اثنين بالمشمش
وذا العصفور يزقزق
فوگ نسحب البستان
نَتغطه سهر
سنطه الشناشيل
سنطه العكد
نام الدف عله مخاد الجوارين
وحصان العمر مسرع وره الكمره
عبر كنطره وماي وكمر
كنطره ونوم وعثگ جاس النهر
كنطره جانه المطر
.....______________________________________
قصيدة : عرس الدم (حكم المنجل)
تفگة رارنجيه تنسّت ...
واتوحم مخزنهه بصليه ... تشگ الدوله
وشگت شگ الما يتخيط
تلم الدنيه اتوافي الدين
حطينه العين بمجراها
لگينه الفرضه من سيول الطلگات إميله
لا فرضه ... إنيشن بالعين
ثنتين تخون بصاحبهه
الفرضه العوجه وقايد الاعوج
يتلولح بين الصوبين
عند الناس وعند الدوله
إشلون يصير عله الميلين.....؟؟؟
ما نرضاش إسلام العوجه
ويلصاع نرده بصاعين
من هوسات العشرين إحنه
رصاص إمفتح ما يرمش
كل فشگه بثنتين
لكواغد ما تذبح ظالم
وانتم كلش كاغتكم يحچي بوجهين
خنجر مستفتي الگرعاوي
(مگابل) طعنه بنص الظيم يگاوي البين
خنجر عن الحگ إحچيلي
خل يزمخ للنجمة عرانچ
وإنتي دنجين تسديلي
من حلگ التفگه علساجي .... تبوسيني
وكليبچ بشليلي
وديرني بساعة المنازع
لگليبچ وحده يضويلي
وحيدچ گلبچ ما وَصَّلْ واحد فانوسه
يصعد صعدت راس البرنو
من تتشامر فوگ الهوسه
ذرينه وردينه نسولف
بالشمس الحمره إعل الخطه
وفختيتين بعبچ يفلن
لولا بثوبچ ريحة حنطه
وحگ الله وحسنچ
والدنيا وهاي الگرطه
كل طاغي إنشف منخاره
لابد يوم الشعب يضرطه
(دير) الحي وگاوي الباغي
بتموز شظل من الطاغي
يعراگ الله شحدك تمحل
والمحله تنث بغيرتنه
ويمطر دم احمر يشماغي ... ياهو اليدنه
يلعندك حل ... حد لا تتجدم
من چعب الدوله لگوگتها
من الرگطه گبالك تتهدم
اجعر يبن إمي بكل حليك
واليتگسم ... خل يتگسم
يم إعران المعرض نيلي
لگبر رياض البكري وگولي
حي ميت ... منك نتعلم
وشوي وتموعين بحسنچ
ونگلچ وي ورور فشگة
تراب الميت حي يتلملم
مد المد ... السنبل يلهث
والسمره مدنگه بمنجلها ...
وزوج إگطاطي يريد يلگطن
لولا يفززهن جنجلها
وثث نجمات بدنچ الليلو
ونجة محدره بنص كاحلها
لو سمعت فشگة من مشرچ
هوست ... عز الله الدنيا نزلزلها
وإعتذرت والعزم إمضمر
چن نزلت من ظهر الخنجر
واتهوس بالشيله السوده
بظلمك ياظالم ما تكبر
تل إچیاسك هلشدة
باللگامه ونفط الرده
وملح الفاسد چن والمها
وعاشر مطره ... وطلگ حَدَّهْ
لابد ناس بنار الملحة
تعرف الله بضد الدولة ... وتعرف ضده
وما جدت وإتوسلت وأخذت..
وجه إعل الحاكم والغم
ولا عگدت خصرها بخنصر ينگط دم
إتحط إصبعها بعين العرسي
وتگلعها ... وتكتب بالدم
حكم المنجل ... شرط المنجل
شغل إيدينا ... خال وعم
يفلان الگاصد ليغادي
عبرني بهيبه بكسريتك
لزيارة حزنك والحره
نذرين بعاتگ ترچيتي
ولابد يوفي الناذر نذره
گص راسي ولاهبط راسي
ولا رفت وإعتذرت شعره
وهلهولة ما جابو إسمك
وإگبال البريغ أردسلك
عذر الله مگعدلك صدره
ناس الچنه نهوس بيهم
صارو ربع الحاكم بأمره
المايسند راسه لكسريته
مكرَّمْ گدرك يوگع گدره
شلحووو لاچن ... عیب انگلك
الحساب إمجير ... لي بره
ياما كتبوا ... ياما مسحوا
لچن لا كتبه ولا طره
طوگ الموت إیطوگ المهجة
ومنطينا بطاري من إذيالك
وهساع إحنه وي عدوانك ؟!!!
وتباهى بخنجر چتالك ؟!!!
لهنا وصلت ؟!!!
لهنا ... لهنا وصل علمك؟؟
يا نيالك ... يا نيالك
من اول (مص) وركضها
طلاع الروح وما طلعها
وعوضناها الگطره بعشره
وما نفعت ... چي سطر البيها
والم من جوه ومن بره
لابد ترجع للأجدها
وكوزها بنار الله الكبره
وكلشي يرد لأصله وطينه
وطينتنه من الاول حمره
لماينزل للطين الحري
يتخمر وي طينه وصبره
ذاك انت الوزرته ولا يبني
سچية العمية ولا عذره
يثگل عذرك لا تتكلم ... لا تتعده
جينالك من باب الكاظم
يلمالك واكف بالسده
بعنالك كلشي وبايعنا بكلشي
وكفه ووجه مخده
ومستوزر بالدوله بخنجر طرگ اليده
شمالك ترول ما تتعلم
تتلگانه عيون الديره
وكل حديثة وكل محزم
اول ما حبيتك انته وبعدين انته
وبعدين الناس وما تغزل
وان غِزلت وانته بلا مغزل
مرفوض الثوب من الاول
ونصيِّح :
ننثر كِنّه
ونزرع كِنّه
ونحصد كِنه بحكم المنجل
لو ... لا ... فلسفنه الدنيه وما بيها
الما يخجل منك .... لا تخجل
.....______________________________________
اجيتك .....
والسلف نايم
على رويسات اصابيعي
سريرك دخن أبروحه
أنفضحنه ... بريحة العطاب والعنبر
دخيلك ...
هود النيران .. يامخلوگ
صاحوا ناس
حچي مايلبس فوگه عگال
كل الصار .....
دخانه صغيرة
غيمت من جاسني حزامك
لگوا ....
حتى العشب محروگ
ماعدهم شغل هل الناس
گالوا ....
شافوا البوسات بالمضبوط
حلفوا ....
بالخصر .. بالثوب .. شگد جديد
چذابيييييين
من اسنين ثوبي من النهد مشگوک
ماطول الحچي الماصخ
يضل ماصخ
عليش انبوس بالمفرد
خلينا ....
نتباوس كله بالمشمش
واذا ... كلش توازينا
فواكه بوس بالصندوگ
أگلك ....... هاك اخذ
ألگاك فوگ الهاك
أنته تبوگ
.....______________________________________
حجلين الجمار مشذر وگصايب
طول السالوفه مر بيه يستر برموشه
وسافين مگصر نفنوفه
ويتلاوه ملاوه من المحزم
چتفه وچفيته وترچيته
وحنتنه اتهلهل بچفوفه
ويعيوني تفرگن عالوادم
داير يامندار نشوفه
ولو دنچ دربونت مشمش
تفضح ضبيين من اخشوفه
مريگهن زبده وحنيه وزهديه
البارح مگطوفه
من شفافه وليجوه المحزم
حيل مرسم وشوي ويموع بحنتيته
ويستر ربك حسنه ويلتم
متغاوي بحاله ومااشايف
غير ارداشه
وضحچات چناغه ويه السنبل
شگيت الغراف العالي بروج محجل
تتشامرني امروج الفلفل
چفيتي مهوسه اباب الله
وبرنو نص اليل تهلهل
وكلاشنكوف ازرگ طنطل
عابس مثل اليل معصل
بزمور اتفكنه انوازنها
ونعدلها وفنها الماتعدل
جايلچ لليل محزم
انه وچول الله ومطراته
وعطات الريحان اتنغم
لوثارن اسبكهن كلهن
وشريلچ من ضحچت
باجر ثوب مقلم
وتموعين بطارف چفي
ويستر ربچ حسنه ونلتم
اصدور الخيل امراية حنه
وتتحمه من النار البيهه
الديوانيه
وفوك الديوانيه اولايه
الديوانيه
وفوگ الديوانيه امرايه
وشعلان امطوفح ع الغبره
اذياب اعيونه
ها صكرين ابتالي الدنيه
وها صكرين ابتالي الرايه
وها صكرين بتالي الدنيه
وهاصگرين براس الرايه
ويجدح حافر يضوي الدنيه
وينزل حافر
چن الدنيا ابهل حافر كلهه امغطايه
ها يرميثه الكوه الكوه
انطگ اخشوم اطواب الجايه
وفول بواشط عند الله اتكله اجوارينك
حزت لندن حز مايبره
وخلتلك مرزين وثايه
وفر ذيلي وكوكش بذياله
مشكول الذمه عله الفاله
يرايد تعلب ذوله احنه
وخنصرنه ابورور وعداله
ويلگلك للموت نهابه
امسابك نتسابك خياله
قصيدة مظفر النواب حجلين الجمار
.....______________________________________
صلاح
المنايا الماتزوك زورها
خطوة التسلم ذبايح سورها
طافح عله الريح عينه يدورها
املخ من ترابها.. وناعورها
صكر.. البيده تعز صكورها
وبأثر جدمه.. تلوذ كل طيورها
وسفه ما حظنت صكرها
وسلمته بليل عمت ناطورها
.....______________________________________
اخذني يابحر
وافرش رحمتك والسوالف
والصريخ البين گلبك والسواحل
والنهايات الزراگية الحزينة
خذني خشبة
اتفسخت ذيج السفينة
خذني والبحارة لو نشدوك گلهم . .
خشبة السكان هاي الخشبة
عاشت عمر طيب . .
واشتهت كل المخاطر
عاندت .. لمن كسرها الريح
لچن ماكسرها
وصارت تسافر وحدها
بلا اتجاه
ونوبة ياخذها حنين ايام الاول
تتجه
واشعل عليها شموع
وتشوغ التجارب
تطفي سالف سالفي
وارجع احط خدي على خدك
يابحر
خشبه وبحر
خشبه خلاص..
حنينة وكلش حزينه
خشبه لچن حيل
أهيب من سفينة
.....______________________________________
ياديرة هلي
خذني عله ديرة هلي گبل اليل
گلهم ارد اشوف النخل
دچ بيه العشگ
ياحبيبه ياديرة هلي
ماطحت حته بماي
ذباني العشگ
مشتاگ ياديرة هلي
مشتاگ ياديرة هلي
مشتاگ
واكتب على الحيطان
ياديرة هلي
وتشمشم النعجات
واخذ بيدي ساجيتچ
واگول افيش...
.....______________________________________
صفنت ياملثّمْ بالموْزَرْ
والغارهَ تـگودك للغاره
ولا بيرغْ إيدي على الصفنه
ولو گامت ريح تطگ ناره
وصفين الدگ بعضدينك
مشطين تزّتْ العبّاره
مودّعْ بالبارود العنبرْ
يلعينك شـگ الله بخنجرْ
وحزامك عل الگش الماطرْ
عربيد مناطر عل الورورْ
ومروز الريحان تهمهمْ
لذيالك حته الذبلانه
حتّه المكسور بخاطرها وعطشانه
تـگلك عطشانه
وزناد الكسريّه يتوّزْ
وتظگك بحزام المرعز
يلممشاك بهونه وتردس
عزبه وشباچي من ارداسك
وحده يعرّس
هونك .. هونك
كلش هونك
عدوانك بالزور إنطاره
فييني بصدّات عيونك
جيتك أركض للدغّاره
خذني بچفينك للمفرگ
أشبع موت وذبني حجاره
صدّاتك شذراتْ المحزمْ
والخزره بريسم وبشاره
وتسهرلك كسريّه تهلهلْ
بعيون المخفر هدّاره
ومن ديره لديره نوصيلك
وزلام بذچرك تتباره
وعيونك تحله بلا هدنه
وريجك طعم خيار الشاطي
ورشّة مزنه
وتتشدبطلع الزهديه
من تشوفك ظك مشابگنه
وتتنده سواجي المهجوره
وثوبي تلف عليك طيوره
وتستعجل روحي المديوره
وظگني الجمره بظك الدله
وطعم الهيله يـگب بچفّك
والشمامه وورد العلّه
وعرس أمك وأمو يتلاگن
والسبعه يذبن ميتهن
بالگمره وخشلك يلهاون
والگمره بميّتنه تغرّزْ
واظگك بحزام المرعز
گمرات ثلاثة ولا بيّنْ
طارش منك نمشي لناره
وخزامة عرسي على الشرچي
تشمشم بارودك وأخباره
وأهجس كسريتك بالحندس
گللي بچم كسريّه معرس
هونك هونك
كلش هونك
عدوانك بالشط انطاره
خلي الشبگه بعمر الورده
وشبگه النوبه
وشبگه النوبه
وحد ما نذبل حدر الغتره
وسچّة كحلك دگهه بعيني
يموت حسابي
وتطفه العبره
وكل شهـگه التشهگه بصدري
تدگلك عشره
يالساكت والتحجي طيوفك
وأتدّافع آنه وكل گلبي نريد نشوفك
واشبع منك
كون الطيره تشوف الماي وتشبع منه
كون الترفه تحل گذلتها
وما تفتك بيبان الجنه
وتفتك چفوفي وتدعيك
ورگة خبازك تتحنه
وحين أتمنه
وحين اتمنه
حين أتمنه
وما مش حدر گليبي عريضي سكتة ظنه
تظك شفافي وتلگط من شفافك حنه
وألبس خزامه من دموعي لنخل المفرگ
وانتظرك ما بين دموعي
وگدام اسمك أحيا وأغرگ
وأنشد من أهل العباره
وأنشد طير الماي الأسود
وأنشد لك درب الصد ما رد
وأنشد صبّي
وأنشد دخان الگيّاره
وكِعْد النجمه وچف الگمره
إهنا يالشاف اللهبه السوده
وغيبة الهلال ويّه الحافر
ونجوم بطيات الغتره
إهنا يالشافك
يالتبرج وشلون نشوفك
يالتمطر وشلون نعوفك
يالشايل حضنه عله إچتوفك
تمرگ بالحلوه بنومتها تصد عيونك
وآنه آنه موصيتلك بعيوني
بياديها ومامش من چاره
هونك .. هونك
هونك .. هونك
كلش هونك
روحي من خلافك محتاره
شجرن گمرات الصبحية
وعطّ الچول بنفحة عنبر
وآنه المانيمني عيوني
كل ليله ولنك گالبني
وكاسر ماي الظنه بروحي
وما تنزل وتبور ظنوني
ونزلت للشط كل مكحله
تفرّ الجرفين بطرتها
وشبعانه سوالف ومشابگ
ليش انه بعشگك سياحه وكلهن طابگ
موش حلفنه وگلنه نموت وما نتفارگ
چا ليش بساع تفارگنه
چذاب امشينه مزعلينك
چا دلحگنه
نفكلك كل بيبنان الجنه
وفوگ الجنه وفوگ الجنه لفوگ لفوگ الجنه
نوب توهدن وياك هواي توهدنه
لو رديت أعلـگ دايرنه
وجياتك أفرش بيديهن
ضحچه وحنه
وافرشلك بالعتبه شليلي
وثوبي الأسود
يفتك حزنه ويفرح نيلي
وتخضّر الرزه من دموعي
وضحچه وبچيه تطگ بعيني
لو رديت انته وذاك انته
وكسريتك فوگ تفیلي
أتبلل واتفتفت بيدك
وبتالي زبونك المطرّز
امسح ضحچاتي وبشليلك
موش مصدگه وموش مچذبه
وموش اگدر أگدر احچيلك
بسّنچ بسچ يا روحي
وهمانه وما مش من ردَّه
تظلين حبيبه عل السدَّه
تظلّين تـگلبين عيونچ
بالعبّاره وباليتعدَّه
وقداحچ يتناثر منچ
والليله طويله ومطّاره
هونچ .. هونچ
كلش هونچ
للشامت يضحك مشواره
وللمامش يضحك مشواره ...
تعليقات
إرسال تعليق