ديوان اغاني الدرويش
ديوان اغاني الدرويش
_________________:________________________
#كؤوس_الألم...*
خطار عدنه الفرح أعلگ صواني إشموع
خافن يمر بالعجد رش العجد بدموع
ياگلبي وين الحزن ،، حدر الحدر مدفوع
دومك توّن ونتك تبچي إبدمع مفجوع
طيفك أمل چذاب فوگ السمه مرفوع
بالك تصيح إبحزن صوت الحزن مسموع
خطار عدنه الفرح أعلگ صواني إشموع ..!
شگبان ليلك غضب
بالك تفر باليل
دافن بصيص الأمل سهر نجوم إسهيل
والريل فات إوجزه ،، مالك شغل بالريل
حط إلنه ،،،
موگد جمر ،،،
زوّد سعير الويل
ذوب شموع الوصل فرهد حبابي الهيل
بس لا يبوگ العمر ،، طيف العمر ملسوع
خطار عدنه الفرح أعلگ صواني إشموع ..!
لملم ،،
سنينْ العمر
نعثرها ليل الظبم
فارشها فوگ الهضم طرزها لون الغيم
مشتال عمرك ذبل ،، ماحن نثيث الديم
والگيظ
إجاك إبثگل
بصرك تظل إمجيم
خيال حلمك مرگ شتگله ،، عيب إنهيم
يبست أنهار الأمل ،، أنتظر روحي إتموع
خطار عدنه الفرح أعلك صواني إشموع ..!
بدموعي ،،،
طيفك غرگ ،،،
إمسح دموع الطيف
شمسح جزاني الوكت ،، راح الحلم يا حيف
گمريه مامش بعد ،، ليش إحنه موش إبصيف ؟
ظلمة ،،
إو دواشگ حزن
لا تظن روحي إبكفيف
غرّب شراع الفرح ،، أهلاً إجانه الضيف
حسبالي يسوه العتب ثاري العتب مرفوع
خطار عدنه الفرح أعلك صواني إشموع ..!
الشاعر عزيز السماوي
بغداد / شباط / 1965
_________________:________________________
#لاتنتظر...*
لا تنتظر...!
يزي إكبرت...
والدنية صارت موش إلك
إو راحت مشاحيف العمر تفتر فلك
عيونك على إدروب العشگ
عصن الصبر ظل ما يطگ
لا تحترگ...
يلزارع الآمال بسنين الوهم
أثمر ورد مصبوغ بجروح الندم
شليلك ثمر چذاب ما بي كل طعم
إتأسف على أيام المضت
مامش بخت
رديت تمشي إبلا كلب
وفراگ دنيانه تصب...
حبك صعب...
بيدك مجاذيف الضوه اوثكلت إهمومك من زغر
ماندري دنيانه تظل بس ليل ما بيها فجر...!
لو طلفح گليبك صبر...
لا تنتظر...!!
إسمع سواليفي إشكثر
جرني النفِس للگاع.. وك مابيّ أجر
بدموعي مَوّت الضوه.. والدنيه وحشه
إبلا بدر
مو فاضن إعدول الصبر..
مامش فجر..
ومشيت سنطه ابلا حچي
بطل يدلالي البچي
إتعكز على إوعود الترف
والليل تدريبه كلف
ماظن يعف...
وضلوعي هزهزها البرد
حسبات تاخذني إو ترد
گضبة عرد...
حصلنه من تالي العشگ.. گضبة عرد
إو ظليت أشد بجروح عمري إشگد أشد
إبذاك البرد
شديت كسر البضلع.. ومشيت ودموعي تهل
ومشيت متعني الترف..
طلعولي وضلوعي اتخذف..
وشعندك إبتالي الليل
نام النجم.. نام إسهيل
والشوگ راح إويه السيل
والخيبه تعصر بالگلب
رديت ما عرف الدرب...
وك يا گلب...
غفله الدموع إتموع برموش الجفن
ما ندري تالي الشوگ بس ذلة إو حزن
مخنوگ مابيّ أسولف للخلگ
وأيامي شجرة ضيم مابيها ورگ
ماي الفرح بسكوت بحلامي مرگ
رديت بوشالة عمر...
وك يا عمر...
والضحكة ماتت بالصدر..
رديت مهضوم السوالف تترس إسنين العمر
دمع الخواطر هالطفح.. والسهر هدّم كل كتر
صدمات بدروب الگبر
مو طلفح إكليبي صبر..!
بعد الهجر...
لا تنتظر...!!
الشاعر عزيز السماوي
بغداد 1965/8/11
_________________:________________________
#سيوف_الثلج...*
علّمني أبارز والسيوف إثلوج
علّمني أضحك والگلوب إتلوج
يا ذلة الزلم من تنزع التوج
إشلون أفوجن والشواطي إثلوج
والحلم مشحوف والمردي ضوه
والحرف حزنان بلساني إنطوه
علّمني أمشي والجروح إكبار
راويني طيفي بلچي أنسى العار
دوّار .. دوّار .. هذا المرض دوّار
يعمي السوالف ويجمد الأفكار
إو لاتظن ذاك الضوه يبگه ضوه
ما طلت بالمردي والمردي التوه
كبرت السنطه والحرف عطشان
سحگوا الچلمه .. إبجدم حيوان
لثّمني .. لثّمني .. إبهوه إو دخّان
ركبني حلمي ... لگطع الوديان
سوّيني فارس والخناجر دوه
علّمني أحصد من سنابل هوه
علّمني أهوس والقوافي إتموت
ترعش إچفوفي إو مايحن الصوت
مامش صوت ... مامش صوت
يذبح السنطه ... إبحناجر موت
إو لاتفز وتخاف لو صوته دوه
يكبر الصفصاف والخطوة سوه
سوّيني خنجر والجتيل الضيف
خليني ألمع من سراب الصيف
وگرابي الضلوع إلما تعرف الكيف
يندهني طيفي .. المنذبح بالطيف
إكتل الأحلام واليقظة سوه
إو لا تظل الروح نجمة ابلا ضوه
يزي السوالف والگلوب إشهود
شيفيد العزم والحرف ظّل مشدود
ومضات السوالف بالعيون إتزود
طرشتنه يتيمه إو لو نرد إردود
ندفع المشحوف والمردي سوه
بلچي...
ينبع ماي...
وإيغرگ الضوه...!!
الشاعر عزيز السماوي
بغداد 1967/12/6
#العاصفة...*
وج إسنينك بنهار أظلم
وضلوعي إلهم جسر إمحصّن
تعبر أطفال وفختايه
وبچفهم نجمه إمحنايه..
حني البيرغ
صعد البيرغ
بگليبي اترف ميّة رايه
إنسوي إهلالچ " رام الله " گوز النشابي إو نشابچ
وإبدي تكتب كل عهودي نيشان إيظل فوگ إترابچ
تتزارگ نجمات إبلادي
شبچه إتصير إبأرض الوادي
واحضن كل إهمومي إبگلبي
إو ماملن لو يمتد دربي...
آنه الشايل جرح إجروحي .. هاكم روحي
هاكم روحي...
إو ماملن من شد إجروحي..
إو لاملن من شيل الراية
إلا اوصل صوبي إو محبوبي
خل خفگ الراية إيلثمنه
والضحكه إثرية اتغازلنه
بعزم الايام اتحزمنه
وإهلال أخضر ضوّه الحارة
عزم الشبان يهب ثاره
وأعلن .. وأعلن
وأعلن للوادم للوادم .. آنه الماتنذل افكاره
وجروحي إگليبي الماتلتم..لأشهگ وفضح كل اسراره
وأحرگ ليل المحنه إبروحي
إچفوف الحنه إمن إجروحي
أفكاري بيارغ للنجمه
تمحي العار...
وتكسر فحمه ..!!
غسلني إبدمع إمن اطفالي..
إو لا عار إيظل إسمه إبّالي
من أصرخ مايرحم صوتي..تطلع نجمه إبصف إهلالي
تحمر النجمه إمن الواهس..عفنه الشاطي إنريد الچالي
يلغادر آنه العيب أنذل..
بدروبي إتضيع أو ما تندل
هذي إبلادي..
أرض أجدادي
إطلع ليدفنك وادينه
إطلع لا يشهگ بسنينه
هذا الوادي..
اشراع إتراب يمر بينه..يحمل ثاري إو ثار اجدادي
لو وجّن من شهگة روحي
يبگه إرمادي
نجمه ابوادي
إتضوي الگيعان إسمانه
تمسح دمعاته إو احزانه
وك ذاك آنه
وك ذاك آنه
بيرغ نجمات ايرف آنه..
أنحر ليل الظلمه ابگوه
يلخايف من شوف العلوه..اوصل بالفرحه العطشانه
غمض لا تعمه ابدخانه .. وك ذاك آنه..
خيّال اگطع دربي ابومضه..
ومضة سيفي إعيون الفضة..ودروب الفارس ماترضه
من ردس إحصانه إو دخانه
وك ذاك آنه .. وك ذاك آنه
لا تعرگ همتي ولا تتعب
وتظل امواگف للمطلب
لو يتعب مجذافي إبظلمه
بچفوفي أنحر شاطي الظلمه
ها نوصل شاطي الحريه..وانصعّد بيرغ من روجه
لا تنشد عن جرح الماضي إو بارز بسيوف الماترحم
وج اسنينك بنهار اظلم..
وإظلوعي إلهم جسر إمحصّن..
تعبر اطفال إو فختايه
وبچفهم نجمه إمحنايه ..!!
الشاعر عزيز السماوي
بغداد1967/11/23
_________________:________________________
اضحك دغش...*
إضحك دغش للوكت لو ثگل بيك اللوم
وإهذي بسوالف چذب .. وادِمنه اخذها النوم
بيع الضمير إبفلس .. لو عليك السوم
وإكتل نثايه الشرف .. خاف إتحمل فد يوم
دنياك خزرة نذل .. طاف ابسماها البوم
خل تنشد اهل الصدگ.. وين الحميّه إشلون
غمض إعيون العرف .. لو گالوا .. اشيگلون
شاعر ، طفل ، مجنون ..!
إبوجه الأوادم
ندم
يلدنيه شنهو الصار
تدري بگلوب التين .. طافت بثر تيار
عمرك حلم مرتخي.. غرگان وسط العار
رحمه المشي
إبلا گلب
نسّاني اخذ الثار
لو وج مضيف السلف.. شعليّه غاد النار
دخان عمرك صعد.. مذبوح ما يدرون
غمض إعيون العرف.. لو گالوا.. إشيگلون
شاعر، طفل، مجنون..!
أحچي
ابسوالف عطش
وشفافي صارن بيض
والريه تيبس غفل.. مايك لغاد إيفيض
گلبك سفينة غضب.. تدوي إبحور الغيض
بسكوت
مات الشته
والگيظ شايل گيظ
تجري بحروف الشرف.. نهران دم الحيض
إنگل سوالف صلف.. وإمشي إبدرب مسمكون
غمض إعيون العرف.. لو گالوا.. إشيگلون
شاعر، طفل، مجنون..!
ماتت
إوجوه الخجل
صوت النثايه إيصيح
مكتوب معنى الشرف.. برمال اخذها الريح
بالگصه ما ظل عرگ.. والغيره نگطه إتسيح
العر لف النَفِس
ماتسوه
خلها إتطيح
چذب السوالف طفح.. ما ظل مچان إنزيح
صافح إچفوف النذل.. للدنيه ظل ممنون
غمض إعيون العرف.. لو گالوا.. إشيگلون
شاعر، طفل، مجنون..!
الشاعر عزيز السماوي
بغداد/آب/1966
_________________:________________________
#حلم...*
أموتن..
من يموت الشوگ
الگلب طيره تفرفح فوگ
تظل روحي بحلم مخنوگ
واسمك...
والهوى العذري يظل مچتوف
دمك بالعشگ مديوف
صِك العين بلچن طيف يخطف خطفة الملهوف
اظل مچتوف
إو نظل إنطوف فوگ الغيم
إو بجفون الظلام إنجيم
جناز اليتامه يهيم
يذبّل شتال الدديم.. عيب إنهيم
عيب إنهيم...
وأرد المگبرة دنياي
نطرب لو يون الناي
ندوّر من يبيع الداي
نشري الداي
نشري الداي..
الشاعر عزيز السماوي
الديوانية/آذار/1966
_________________:________________________
#بكائيه_للسياب...*
إهتزت إدموع الگلب .. طارش شمسنه إيغيب
الخوف حدر الدرب .. عين السراب إتصيب
الدنية ترعد غضب .. والليل يلمض .. شيب
زخ المطر ينشتل .. يهتز ... سنابل طيب
جور الليالي ثگل .. كف السوالف .. عيب
وحشه إو دمعنه سوه
مخنوگ شمع الهوه
ذل وإنحنه وإلتوه
وإنت .. إبمشاحيف الحزن .. تنگل هضم عنه
جرف الشواطي إنهدم.. دم .. الماي يوصلنه ..!!
إطروش موت
أگبلت
چنهم عِبر دخان
صوتي اليتيم إنچمد .. مات الصدى الولهان
ماي الخليج إنطعن .. ظل النجم .. سهران
صعّدني
عج الألم ..
ذبني إبفيافي احزان
أوگف على إرگبيّ واشگ ثوب الفرح قربان
نحيل إو من يشد ضلعي
صوت إقبال هز دمعي
على غفله طفه شمعي
إو شيطان شعري رجف .. تاه إبشدّة المحنه
ثگلن إدموع الحرف .. چف القافيه إتحنه ..!
هودج شبابك
فحط
تاه إبرمل هيمه
والنوگ كام إتعثر..كلمن..ثگل ضيمه
والعطش حزّ الگلب..ما ظن.. تمر غيمه
إحدي..
إبسوالف هضم
زرعك رحل ديمه
وآنه ابطيوف العمر..أنصب..الف خيمه
ها..بلچي إنتلاگه وياك
واكتب بالحلم ذكراك
هالدنيه تضيّع إدواك
وعيون وادم حجر..تنكر.. شمس فنّه
السياب هالة شعر.. هيبه إو فرح حزنه..!!
ايوب
فزّ إو بچه..
من سمع شمعك ذاب
وشموع أهل الأدب..ذابت بثر عطاب
أفگد إنجوم السمه.. نجم الشعر شو غاب
تاهت
إعيون الضوه..
ريت الخبر چذاب
ترجف إدموع السمه.. تنشد عن السياب
ميت صديج المطر..
الگمره موت الگمر
امشي إعله دگات الوتر..
مطر..
مطر..
نايم إبحضن الموت..ماشاف كل حنّه
والشاف هالگد هضم.. شيسوي بالجنّه..!
الشاعر عزيز السماوي
بغداد/ايلول/1966
_________________:________________________
#سفرة_الروح...*
إمشي..
إمشي.. امشي والدرب تاه إو تطوّه
أمشي مابين الخناجر..
بالدرب خطواتي رخوه
هاك...
هاك گلبي المرتخي.. دوّر إبكتاره نخوه
گلبك..
گلبك إبحلاته عجبه.. وره كل موته إيتقوّه
شنهي هوه...؟
گلب حصوه..
من تطگ إجبال يقوه
إو بالمحنّه إيذوب نشوه
شنهي هوه...؟
هوه سالوفة عشگ تمرگ إعله شفاف حلوه
گلبي حالوبه چبيره..
يدفه بچفوفك ضميره..
إو لو فرح.. تفرح عشيره
بس تهوّس يصفه غنوه
گلبي لو يجفل غفل
تمطر الدنيه وفر.. وأزلك إو تزلگ العلوه
شنهي هوه..؟
گلبي لو يفرح صدگ.. يطبگ شتاي إعله صيفه
ابوس إچفوفك الترفه..
ردني..
ردني سالوفه إبضيفه
إمشي..
إمشي.. إمشي والدرب درفعني خطوه
أصعد إبعجه وأطيح إرماد.. يهوه
جفلت ابروحي السوالف..
والنفس مجرور گوّه..
گوّه.. گوّه.. والعرگ سبحني توه..
إي وحگ هاي الجنازه
والعيون التهذي بلوه
آنه مجرور إبدربهم..
خذنه عّج الخوف بترابه إنتطوّه
گوّه.. گوّه..!
مو جرح جفي المصافح والضماير سحگ نخوه
روحي تعثر بالزغيره..
والدرب عثراته علوه..
وارد انخه المراجل.. تمر بالعين لمعه
إو روحي إبظلمة إغيابك..
تذوب..
إتذوب..
ترجع تعتلگ..
وإتذوب..
تنزل..
للگبر..
شمعه..!
يمضيّع إسنينك تضوّي إگبور
مو خلصت ايامك شمع وإنذور
من يجبر گلب مكسور..
منهو إيشد أمل منحور
دوك..
ودك اغسل إگليبي إبعرگ شجره..
روحي ملّت الكافور..
وادفنّي إبگبر ثلجي..
واشريلي مناخ أبيض
أظن يبرد عظم محور..!
إمشي..
إمشي.. إمشي والدرب حزّم سمانه
إحنه بچفوف إو مساحي إسباع من ندفن ضوانه
چنه متسودن نهاري.. والزمن غير مچانه
إو تفيض الدنيه أحزانه..
نهر أسود..
يشيل إنجوم غرگانه
إو تمر إسيوفهم غفله.. مشاحيف إبنهر أظلم
إو عيب احچي الحرف مجنون مايرحم
رگص الغجر ما غزّر
مشوار الزلم تركض
تحلم بالنجم خنجر..؟
ولا نخوه..
نگّاط العرگ ثلّج علي الگصه
ومض نجمات يتراجف على الگصه
عرگ رجلين زلگني إبدرب علوه
إو بمراية الطيف ما واحد بعد يسوه
ولا نخوه..
جا وينه اليزيل الخوف..
وايسوي الگلب حصوه..؟
الشاعر عزيز السماوي
بغداد/ آذار/1968
#اغنية_الجراح...*
مضيفك والفشگ نجمات
عالحزام إبغنج.. تنشّد
إبفيّك ورّد العاگول.. طوه جذره إبفرح وإرتد
يا ناي الزلم.. ونس.. عمر حزنان.. عمر اسود
إو طيفك لو يهل بالنوم
تفيض الروح بازود مّد
إو تجيك أمواج شبگاتي.. دواوير بيض ما تنعد
وإموت القوافي انخاك.. ترگص بالوزن وازود
بعيونك شعرنه يفيض
ياوزن القوافي البيض
شياطين الشعر غاضت وإنتَ إمن الشعر متغيض
يا وزن القوافي البيض
عطشان..
أموت إبديرتك..
وآنه ابسواجيك نبع
چا شنهي روحي إمسودنه.. إتفرگ على الوادم دمع
سيف آنه بيدك كل وكت.. والگمر لمتونك درع
ياريت..
تقبل شبگتي..
گبل الصواب إتشد ضلع
روحي الك أصفى نهر.. وبمايه اسيّس لك شمع
ياريت اعاشركم عمر.. حبكم بساتين إو زرع
بعيونك شعرنه إيفيض
ياوزن القوافي البيض..
شياطين الشعر غاضت.. وإنتَ إمن الشعر متغيض
يا وزن القوافي البيض..
طوّل يطيف إمحبتي
خل أترس اچفوفي لمس
خايف تجي اليقظه غفل.. ونرد جنانيز إبأمس
يا فيّ بساتين الصبح.. عاند إوكع عين الشمس
خلي النجم چنباره لك.. دگ وإترس إگليبي ونس
حزنان اجيت إبلا شمع.. بين الضباب أفرح وأهس
واسمعني..
بعيونك..
شعر..
يرگص على اكتار النفس
بعيونك شعرنه إيفيض
ياوزن القوافي البيض..
شياطين الشعر غاضت.. وإنتَ إمن الشعر متغيض
يا وزن القوافي البيض..!
الشاعر عزيز السماوي
الدوانية/كانون الثاني/1969
#أسرار...*
أطيحن ذلة بچفوفك..
إو ياخذني الغضب ليفوگ
ليفوگ أشبّن غضب..
وأنزل إبنص البرد فوگ الثلج
نجمة
صبح
من
دم
إو تظل إمناحر إويه الروح..
تريد الحلم..
ما تحلم..
إو ياخذها فلك أبيض
وايردها فلك أسود..!!
إو لو جاها الحلم خطار تظن بيها الصبح يحلم
واديرن وجهي بچفوفك..
تعرگ إعيوني..
إو تصير الظلمه مهر أسود..
يركض إلشمس الصبح خاف الخجل يبرد
إو يشب كل الجسم بالراس
ولك مامش حَكَم بين الجسم والراس
حزين..
إو تلتم إچفوفك على چفوفي
وميض إمن الفرح.. غيم إو رعيد
هيبه الجرح من يصهل مهر گبل النزف ترديد
هاك إخذ گلبي ربابه إبين ايديك إنتَ نشيد
كل العمر ذلة إو مواعيد
كل العمر ذلة إو مواعيد
تدري الغربه بعيوني
غيوم إمن الفرات
إعليك..
مذعورة.. مطرها.. إيزيد
الفرح.. شمعة إبدرب أظلم.. بعيد
وميض الشيب بالظلمة.. حمام أبيض.. بعيد
الجرح.. منك يهل إهلال للعيد
إخذني إعليك مجنون الطبع هايم عنيد
خصرك فرات إو گمر ما أدري وين إيريد
خمري إو ياخذ إچفوفي فرح.. ويزيد
هايم.. حنين الصدر.. عالي النفس.. تنهيد
گمرة.. إبين إصابيعي حرير.. الجيد
وردة.. الشفّه من تحمر غنج.. ترديد
جمرة.. إشفافيبالظلمه حنين.. إتزيد
خوفي إيزيد
كلش.. يشد الأيد بالأيد
جنون إلياخذ الرغبة عليك إوياك گمرية إو حنين
مهرة.. إتهيم مذعورة.. تريد.. إلوين
إو ياخذني الرگص عالصوت..
وايردني العرگ للموت..
تلگاني.. ضوه إو ظلمه..
تلگاني ضوه إو وظلمه..
تلگاني إجيتك سيف روحه إتعارچ الظلمه..
ويدور السفر بيّ جنون
واظل آنه...
جمر عالماي..
حِزَن طول الفرات إو خِدَر وسطه الماي..
واتفرني الدواير غاد..
فوگ الماي..
أوج الماي..
أوج الماي..
أجيك ألوان..
أجيك ألوان..
تاخذني إو تردني ألوان..
أوصلّك صلاه واشموع
عرگ كل الجسم يمّه إو نگع لون القميص إدموع
إجيس الظلمه بچفوفي
أطيحن سكته بچفوفي
تطيح الرغبه بچفوفي
الصدر خمري الفرح.. ريان گوه إيلين
هالة الروح من تحضن صدر دافي إو حزين
إمنين أجيس الفرح ما أدري أجيس إمنين
ولك صدري إعله صدرك گمر بالماي
ولك گمره الحنين إعليك بالماي
ولك ميت عطش وآنه إسمي الماي
مشحوف إجاك الجرح عنّاي
ولك جيس النبض بهداي
وياك ما ظل راي
ناعم.. يهيم الصدر.. ياخذني موج إو سبح
كل ضحكه منك صبح
كل شبگه منك جرح
مجنون إو عليك إنتَ إنذبح گلبي ذبح
نحلم..نصد..أبعد صبح
روحي گمره..
تلتم الخصرك مضيف..
إچفوفك أسرار إو برد
تكبر الوحشه وأجيك
تخضر الگمره وأجيك
إچفوفي بالگمره نزيف
إو صار تاريخك مسافه
خطوه..
والشبگه
الخصر دافي..
النبض دافي..
إو تاخذني العواصف غاد.. أوج كل المسافه إتراب
خصرك الموتي فلك
الشمس بالشبگه تدور
ريحة الحرگه بخور
إو ياخذ إچفوفك خدر..
تضوي ايام المضت بين الحلم والنوم..
تاخذنه صلاه وإندور..
ويردني خجل ازرگ..
حنين الروح
غاد إيفيض
يلتم عالرمل
لهناك
چبحة ماي
ماي ازرگ
حزين.. الغيم.. بيها أبيض..
ويطير الصحو إبجنحين..
تعرگ إخيول السفر.. ويصفن إبجلدي الجنون
البرد ياخذني.. خطوه..
إبعيد..
وحشه وإعيونك وطن
إنتَ من تحزن وطن
وجهك الخوفي وطن
سولف وإطرد الوحشه بعيد..
غفوة إعيونك حچي..
أجيسك..
والسوالف ناعمه إلحد البچي
وإترس إگليبي فرح
إنتَ الفرح..
سكته إو حچي..
ألمن كل نعاس البيك
أسير للنجوم ألوان..
إيتلگاني الصبح سكران..
إو أرد وردة فرح.. جمرة
إو على إركبّي..
اصلّي الذلة بچفوفك
إو تبرد إبروحي الشمس
إو ياخذها البرد خطوات
كل خطوه.. نهار إبعيد
* نهار أسود..
غريبة إسيوفه تصهل دم
* نهار أحمر..
گمر بالماي قطعة دم
* نهار أخضر..
إبهيده إيفزز الذكرى..
فرح..وأخدر
إو يصير الماضي..عمر إجديد
حچت إمي عمر..ما ادري..شنهو إتريد..؟
إو يطفه بعيوني النهار..
واتموع الليالي البيض..من زخ المطر أسرار
تجري أنهار..
كلها أسرار..
ما ادري لوين إتريد.؟؟
ولك مامش فرح وإعيوني بچت عاگول..
إو تدري السكته..كلشي إتگول..
اعيوني يمك..
والصلاه بالروح
السكته خضره والسيوف إتلوح
عمي إحلم..
عمي إحلم..
بس تحلم.. اجيلك طيف
إو من تظلم ليالها..
أجيك آنه ومض للسيف
عمي إحلم..
عمي إحلم..
غبّش حلم الملاگه إو لا بعد نلتم
إو تجي كل الشجاعة إو چفي يضوي إبدم..!!
إو أطگ كلّي نزيف إهناك
أكسر الذله..
إو أگف دخان..
وأشهگ..إبطولي
وأطيح إرماد
وإشهگ..إبطولك فرح
وإلتم..شما بالدلال الوان
وإسهر الوجه الصبح..
نجمة فرح..
زرگه..!!
الشاعر عزيز السماوي
بغداد / شباط / 1972
مشاحيف السفر
• الى شعبان كريم . .
• لتكن قادراً على ان تولد في اللحظات الحاسمة
«لاوتسي»
____________________________________
• ثانياً :
ضميره السيف والفاله التسولف عالجرح والثار
هاك ..
هاك إقره إبعرگ گصتي مذله إوعار
أوج وتلگه روحي النار
وأهيمن لو عرگ گلبي
وأجيلك سيف للدم حار
وطيحن عالدرب خطوات ..
خطوه إدموع ..
خطوه أفكار ..
أو خطوه إبعيد ..
ياخذها الضوه الوصلك تفل أسرار :
ضمير السيف من يشهگ
صهيل إحصانه نجم أزرگ
إوبالنوم الثلج .. يعرگ
إو نشوفك بالحم مرات
إو نصليلك سبع مرات
نبض گلبك يدگ خطوات .. كل خطوه صبح بالراس
كل خطوه شمس بالراس
ثگلان الحچي بالراس
ثگلان الحچي بالراس
يا عابر الدنيه إبعطش وإجروح ..
ها غمج العطش بالروح
. . .. . . . . !!
إلطيفك صلَت إجفوني او يمر ذكرك
نهر يجمع سواجي الروح
ها غمج العطش بالروح
إو نصلي إردود . .
إو طيفك من بعيد إيلوح
إو نعرگ من سواليفك . .
إوياريت العرگ من دم . .
نصفن ..
تغبش الدنيه ..
إبنهار أظلم
وأجيك إعيون عطشانه
تضوي الدنيه لو تلتم
وأشهگ وأطبگ إچفوف . . رمح لچفوف ماترحم
إويدخن گلبي چم مره . .
وأگله شبيك
مامش واهس إمسليك
يگلي إحنه . .
إبنگيصة دم . . ! !
__________________________________
القصدة في ديوان :
( أغاني الدرويش )
__________________________
#أغاني_الدرويش_رقم_1
اولا
أريدك گمره تضوي الروح ..
وإتحدر مشاحيف الحلم بالروح ..
وأجيك إبحسبه . . حداري . . وأرد بين الگصب مشحوف
إويطگ مني . .
الضمير إشراع . .
للوادم سفر . .
إو لعيونك أمر بين القوافي صور . .
مطر . .
مطر . .
زارگك يلتم إبروحي إويظل جيسة برد للصيف
ترس روحي العطش والملگه صبح إوطيف
أريدك . .
أريدك ساعة الغربة حبيب إوسيف
أريدك طيف . .
وإبنومي تفيض إدموع . .
ولو حزني ثچيل إو ما تبرده إدموع . .
مو گلبي عراق التنبض انهاره حزن وإشموع
اوتلمع عالقميص إدموع . .
وأحزن . .
يضحك الصفصاف . .
ولك حزني ظلام إولا درب ينشاف
أخاف . .
أخاف . .
أخاف حتى من روحي . .
انه إبلياك
سيف إيعارچ بروحه . .
انه بالياك
أرگص . .
يرگص إخيالي لهب عالگاع
أگعد . .
يشهگ إخيالي عليّ إبساع
وأسولف للظلام . .
إهناك . .
يلمع للحچي وإيموع
اذبّن روحي فد خطوه . .
وأسولف . .
للظلام إيموع
إبكل خطوه . .
اسولف . .
للظلام إيموع
وأجيك آنه إبدرب مظلم . . كل خطوه الحچينه إتموع
إوصدّگ لو رجف گلبي . .
يوج ليل . .
الشواطي إشموع
إوتلمع عالقميص إدموع . .
وأرگص . .
يرگص إخيالي لهب عالگاع
وأگعد . .
يشهگ إخيالي عليّ إبساع
وأطيحن لك . .
جمر يبچي الثلج ويّاه
إو لو نهر فرات إتغيّر إبمجراه
يعرضله ضميره إو يرجع إبممشاه
يوگف للحزن . .
وتفيض أهلنه إدموع
إولمض بالكوخ ضي السيف . .
إو مامش للمضايف ضيف
إوتموع الليالي إبنوم تنطر للصبح فد طيف
إويضحك للهوه الصفصاف
أخاف . .
أخاف . .
أخافن حتى من روحي :
آنه إبليّاك . .
سيف إيعارچ إبروحه . .
آنه إبليّاك . .
أجيلك بالحلم تبگه الليالي اوياك . .
ياخذني الصبح يبگه الحلم ويّاك
آنه بلياك . .
سفر بين الثلج والنار . .
جرح حنّه السيوف إبعار
ميت خنجره الاسرار . .
آنه وياك . .
عرگ حَن للچفوف إوجاك
إبليل السفر وياك
أموت إهناك
إبليل السفر وياك
أموت إهناك
أموت إهناك
إو ماهزك صبر روحي . . إولا سولف ضمير إوياك.
أذوب . .
أذوب . .
أذوب إمن الصبر مشوار . .
إو دمنه هناك عالجرفين
إو مامش للصبح أنهار . .!!
نساگيها . .
نساگيها . .
من ماي الخجل أنهار . .
ثانياً
روحي إلما لگت بالبچي . .
أسرارك . .
لذيذه وبيها طعم الموت . .
أسرارك . .
غميجه وماتعَرف الگيش . .
أسرارك . .
وأسرارك . .
أسرارك . .
أبروحي إوتلمض أسرارك . .
خناجر من ذهب تضوي
أو چم مرّه . .
إو چم مرّه . . أجيلك بالحلم . .
وأرجع . .
وأجيلك بالحلم . .
إومامش أثر يضوي . .
إو ياثگل ذاك الحزن . .
كبر الخطوه . .
إو رجع لسنين
ظلّت بالتراب إذنوب
سوِلفت ويه الصخر حَن للصخر أيوب
لابي تطيب النَفِس . .إولا روحي منّه إتوب . .
حيرة . .
حيره . .إو دربنه إلتوه . .
إتمنين أحطك حچي وبين الدفاتر ضوه
ملّت إدروب السفر . . إو مامش الروحي دوه . .
سافرت روحي إلك . .
إبكل خطوه . .
ظلمه إوضوه . .
خضره الشمس بالحلم . . اسودگمرها إيطوف
والنجمه تربة وضوه . .
وكت الصلاه إتشوف
سيف الذنب بالنفَفِس . .والروح چيحة دم . .
صلو إبكلبي چذب
باعوا عيوني إبتبن . .
دير الفرح بالحزن . .
إوخلي الليالي إتدور . .
وجهي الماي والناعور . .
إوصاحوا . .
إوصاحوا إبكل العمر . .
فد . .صو . .و . .و . .ت . .
يحمَر الثلج . .
گبل الغضب بسكوت
اويشب قوس القزح خطار . .
رايات المذلة إتفوت
إوياخذنه الحلم خطوات . . ولك بينه النِفَس وإنموت
ياسيف الثلج يلما خذيت الثار . .
ولك ظلمه . .
إوضواك العار . .
ياسيف الثلج يلما خذيت الثار . .
إومن يسمع إو يهتم . .
نهب روحي دبيب الخوف . .
يَمه الراس طوبة دم . .
شو تلتم . .
شو تلتم . .
سواجي الناس
من يدبي دبيب الخوف . .
عِمه عدنه السمع . .
والشوف
صوت إيجفل الميتين . .
نعارچ والرمح من طين . .
نعارچ والرمح من طين . .!!
إوتصطف الروح إبحيل تبني إمن النِفَس فد طوف .
حنينه الروح وكت الخوف . .
إخذ طولي جذع للطوف
إويمر الخوف . .
يمر الخوف . .
يمر الخوف برد أزرگ يلم روحي زمن ويطوف
ياخذني إبعِد ماجيت . .
وإيذبني گمر ما شوفة . . !!
وإبهيده . .
إبهيده . .
يدب الخوف . .
بالرجلين . .
يصعد عالجلد ليفوگ . .
يطگ جنح ابجنح ويطير
- ردتك . .
ردتك تجيني ضوه جنحان إلي وإنطير
اخاف الرس نسر إيصير
يطگ جنح إبجنح وإطير
وأكمش رجفة إعيوني . .
إبدربها إتحير . .
. . أجفل وأخاف إمن الجنح . .
جر النِفَس سيف إو جرح . .
آنه العطش گلبي ملح . .
غمض ولك
بالحلم مشحوفك صبح —
ويدور الزمن بالدم
يلم روحي شبگ للگاع . .
وأگوم إبساع . .
يلم روحي . .
وأگوم إبساع
أرد ألتم . .
إوكل شبكه تظل عالگاع . .
كوخ إمن الزمن والدم . .
وأشهگ بالدمع . . ليفوگ . .
كل شهگه منارة دم . . !!
گوه ألتم . .
گوه ألتم . .
خرابه الروح تتهدم . .
ولك گلبي حمامة وإتخاف من جيس البرد تلتم
إعيونك تلمض إبليلي..
إو تسهر للصبح سچين..!!
خطواتي گبر ميتين..
أوف..
أوف..
زغر راسي..
برد راسي..
هاك إيدي.. إخذ منها الفعل للطين..
إو ذبني إعله النعاس.. إسنين..
ذبني..
إعله النعاس..
إسنين..!!
*ثالثاً
فز قوس القزح بالروح..
هِدم نومي..
إو وگف خطوات..
للممشه فرح..
ردت أمشي.. دفع روحي..
نبض مجنون
سواني خوف إو فرح
ذبني إعله چفك دمع
إو ياخذني ليل السفر.. وياك سيف إو درع
إو رديت آنه المشي.. إبرجليه صار الموت
وحشه إشكبرها صرت..
كل خطوه لون إيموت
إو لگيته إهناك..
بعده إيعارچ إبمامش..
نجم..
دگ البُعد غايه
يظن بيده الشمس
قوطيه للچكليت
إو حچه إسيوف تفتح بالسمه إولايه
إو سعدي<١> السنطه بعيونه.. تعبر للحچي إمرايه
إو روحي إتصير گبل الموت..
گمرة دم..
توج وتطيح..
گمرة دم..
فوگ الثلج..
گمرة دم..!!
إو تتلگه السيوف إبليل وتغيض العدو إو تفرح
يوج بيها البرد مرات وإبماي الخجل تسبح
تشهگ إبطولي..
إو يرد بيها..
الجمر حالوب..!!
إو تشهگ إبگاع الثلج..
رمحين..
تصلبني واموت إذنوب
أتلگه وجه الصبح.. بلچن تموت إذنوب..
ولك دوم الشمس.. مليانه ندم وذنوب..
لو عدها بخت چا نامت إلها إبفيْ
عليمن هالسفر والضي
ندوخ إو مانعرف إنتوب
وحدك إو گاع الثلج بيها الضباب إهدوم
إلكل رگصه يرهم لبس إو لمّن تموت إهدوم
آنه الرگص للصبح..
وإنتَ الفرح بنجوم
وأرگص والثلج يلهب
من حدر الجدم للروح
ولك وج البرد بالروح
گبل الموت بلچي إتلوح
وأساهر للصبح بعناد وجه النوم في أزرگ
إو حلم خاتل على اكتاره..
إيتمنه الراس من يعرگ
واطيحن عالثلج فد نوب..
يسولفلي..
وأعرگ..!!
وأمي إتگول:
مو غنيت وإرتفعت إچفوف الناس
بالظلمه كتب..
آخ..
آخ..
لو راس المغني طرب..
وأمي إتصيح..
إو ينبت صوتها المهجور..
إنجوم إعله الثلج من دم..
يمّه إگعد
إبني إگعد
بچه إحصانك خمس مرات
والسته مضيفك.. وج..!
إنتَ السيف..
وإيموت الضوه إبدمك..؟
دمك سال
ولك فوگ الثلج.. دمك
إو شفت عالدم..
إهلال إمفطر إبحزنه
بخت لطفالنه إبكل عيد
إو مهر عنده رجل وحده
إو بعيونه السفر ترديد
او شمع گبل العرس ذايب..
مات إو ما لمس كل إيد
إو خيط إهناك للذلّه..
إيتحرك والضمير إيحيد..
يمّه إگعد..
إبني إكعد..
أحشم كل بنات الناس
تهلهل..
للضوه اليلمض
وحگ شيب السفر من يعرگ إو يلمض
نموع الثلج بالدبچات
يسيٌر..
للصبح انهار..
إو دمعنه هناك..
عالجرفين..
يتلگه الصبح شمسين
شمس تضوي الفرح.. للناس..
إو شمس تخبز عليها الطين..!!
<١>سعدي: هو القاص والكاتب الدكتور سعدي السماوي
الشاعر عزيز السماوي
كركوك/آذار/1971
_________________________________________
#أسرار...*
أطيحن ذلة بچفوفك..
إو ياخذني الغضب ليفوگ
ليفوگ أشبّن غضب..
وأنزل إبنص البرد فوگ الثلج
نجمة
صبح
من
دم
إو تظل إمناحر إويه الروح..
تريد الحلم..
ما تحلم..
إو ياخذها فلك أبيض
وايردها فلك أسود..!!
إو لو جاها الحلم خطار تظن بيها الصبح يحلم
واديرن وجهي بچفوفك..
تعرگ إعيوني..
إو تصير الظلمه مهر أسود..
يركض إلشمس الصبح خاف الخجل يبرد
إو يشب كل الجسم بالراس
ولك مامش حَكَم بين الجسم والراس
حزين..
إو تلتم إچفوفك على چفوفي
وميض إمن الفرح.. غيم إو رعيد
هيبه الجرح من يصهل مهر گبل النزف ترديد
هاك إخذ گلبي ربابه إبين ايديك إنتَ نشيد
كل العمر ذلة إو مواعيد
كل العمر ذلة إو مواعيد
تدري الغربه بعيوني
غيوم إمن الفرات
إعليك..
مذعورة.. مطرها.. إيزيد
الفرح.. شمعة إبدرب أظلم.. بعيد
وميض الشيب بالظلمة.. حمام أبيض.. بعيد
الجرح.. منك يهل إهلال للعيد
إخذني إعليك مجنون الطبع هايم عنيد
خصرك فرات إو گمر ما أدري وين إيريد
خمري إو ياخذ إچفوفي فرح.. ويزيد
هايم.. حنين الصدر.. عالي النفس.. تنهيد
گمرة.. إبين إصابيعي حرير.. الجيد
وردة.. الشفّه من تحمر غنج.. ترديد
جمرة.. إشفافيبالظلمه حنين.. إتزيد
خوفي إيزيد
كلش.. يشد الأيد بالأيد
جنون إلياخذ الرغبة عليك إوياك گمرية إو حنين
مهرة.. إتهيم مذعورة.. تريد.. إلوين
إو ياخذني الرگص عالصوت..
وايردني العرگ للموت..
تلگاني.. ضوه إو ظلمه..
تلگاني ضوه إو وظلمه..
تلگاني إجيتك سيف روحه إتعارچ الظلمه..
ويدور السفر بيّ جنون
واظل آنه...
جمر عالماي..
حِزَن طول الفرات إو خِدَر وسطه الماي..
واتفرني الدواير غاد..
فوگ الماي..
أوج الماي..
أوج الماي..
أجيك ألوان..
أجيك ألوان..
تاخذني إو تردني ألوان..
أوصلّك صلاه واشموع
عرگ كل الجسم يمّه إو نگع لون القميص إدموع
إجيس الظلمه بچفوفي
أطيحن سكته بچفوفي
تطيح الرغبه بچفوفي
الصدر خمري الفرح.. ريان گوه إيلين
هالة الروح من تحضن صدر دافي إو حزين
إمنين أجيس الفرح ما أدري أجيس إمنين
ولك صدري إعله صدرك گمر بالماي
ولك گمره الحنين إعليك بالماي
ولك ميت عطش وآنه إسمي الماي
مشحوف إجاك الجرح عنّاي
ولك جيس النبض بهداي
وياك ما ظل راي
ناعم.. يهيم الصدر.. ياخذني موج إو سبح
كل ضحكه منك صبح
كل شبگه منك جرح
مجنون إو عليك إنتَ إنذبح گلبي ذبح
نحلم..نصد..أبعد صبح
روحي گمره..
تلتم الخصرك مضيف..
إچفوفك أسرار إو برد
تكبر الوحشه وأجيك
تخضر الگمره وأجيك
إچفوفي بالگمره نزيف
إو صار تاريخك مسافه
خطوه..
والشبگه
الخصر دافي..
النبض دافي..
إو تاخذني العواصف غاد.. أوج كل المسافه إتراب
خصرك الموتي فلك
الشمس بالشبگه تدور
ريحة الحرگه بخور
إو ياخذ إچفوفك خدر..
تضوي ايام المضت بين الحلم والنوم..
تاخذنه صلاه وإندور..
ويردني خجل ازرگ..
حنين الروح
غاد إيفيض
يلتم عالرمل
لهناك
چبحة ماي
ماي ازرگ
حزين.. الغيم.. بيها أبيض..
ويطير الصحو إبجنحين..
تعرگ إخيول السفر.. ويصفن إبجلدي الجنون
البرد ياخذني.. خطوه..
إبعيد..
وحشه وإعيونك وطن
إنتَ من تحزن وطن
وجهك الخوفي وطن
سولف وإطرد الوحشه بعيد..
غفوة إعيونك حچي..
أجيسك..
والسوالف ناعمه إلحد البچي
وإترس إگليبي فرح
إنتَ الفرح..
سكته إو حچي..
ألمن كل نعاس البيك
أسير للنجوم ألوان..
إيتلگاني الصبح سكران..
إو أرد وردة فرح.. جمرة
إو على إركبّي..
اصلّي الذلة بچفوفك
إو تبرد إبروحي الشمس
إو ياخذها البرد خطوات
كل خطوه.. نهار إبعيد
* نهار أسود..
غريبة إسيوفه تصهل دم
* نهار أحمر..
گمر بالماي قطعة دم
* نهار أخضر..
إبهيده إيفزز الذكرى..
فرح..وأخدر
إو يصير الماضي..عمر إجديد
حچت إمي عمر..ما ادري..شنهو إتريد..؟
إو يطفه بعيوني النهار..
واتموع الليالي البيض..من زخ المطر أسرار
تجري أنهار..
كلها أسرار..
ما ادري لوين إتريد.؟؟
ولك مامش فرح وإعيوني بچت عاگول..
إو تدري السكته..كلشي إتگول..
اعيوني يمك..
والصلاه بالروح
السكته خضره والسيوف إتلوح
عمي إحلم..
عمي إحلم..
بس تحلم.. اجيلك طيف
إو من تظلم ليالها..
أجيك آنه ومض للسيف
عمي إحلم..
عمي إحلم..
غبّش حلم الملاگه إو لا بعد نلتم
إو تجي كل الشجاعة إو چفي يضوي إبدم..!!
إو أطگ كلّي نزيف إهناك
أكسر الذله..
إو أگف دخان..
وأشهگ..إبطولي
وأطيح إرماد
وإشهگ..إبطولك فرح
وإلتم..شما بالدلال الوان
وإسهر الوجه الصبح..
نجمة فرح..
زرگه..!!
الشاعر عزيز السماوي
بغداد / شباط / 1972
تعليقات
إرسال تعليق