النهر الاعمى
هموم عراقية
إلَك جبت الشمس ، والنار أقواس
إلك صلّت سيوف إمن الفرح تنباس
إلك واهس يعدل الفكر بالراس
جرحني إعله طولي . فرح . لا باس
ورده إتطكَ همومي ، أو ترفع الراس
ولو جفّك حرير ، إو خاف ينجاس
ولك جيس الورد ، يتلون الياس
أهيّس جرحي بجفوفك . جمر ينباس
خيط الدم يروح إبعيد
يمتد إبطول الفرات إبعيد
يلمض براسي غضب ، ويعيد
هاله إجفوفنه ، إتعاند ولا تنداس
او صهيل اعيونج ، ايورد حلم ينجاس
عيب الناس تمشي ، إبذلة الناس .
إلك خضره الأغاني ، اتفيض أنهار
وإلك سر الغميج اليشبك أسرار
رجف طولي رمح ، يتنطرك ثار
أعبدك ، ريح من تلعب لعب بالنار
لو دار الزمن ، بالموت إلك نندار
فاض الدم
بيديك
إجروحي أفكار
مدري الزمان اختلف . مدري اختلفت الناس
وديّت النذر شمسين للعباس
كَمره : الصوت من يصعد فرح بالراس
يدكَ هذا الضمير ، إبذاك
أو يخلي الدم ، يشدّ الناس للناس .
الحزن نجمه تطيح إبطارف العين
بجت أمي عليك ، بصدري مرتين
ضحك يبج بيديّ أو وَجّت اسنين
هاله او كَمرها انداس بالطين
أشوفك بالحلم ، تضحك بساتين
ذبحني السر عليك ، او دمي صوبين
مصلوب اعله بابك . منهو أنتَ ، منين ؟
من تلمض تفكَ . تعركَ جفوف الناس
رجف بيدي الحنين إلشوفتك كاس
ولك فرّ الحنين إو وكَع الوهواس
إو خلّي الدم ، يشدّ الناس للناس .
أحط دمي إعله جفك ، يعتلكَ موال
روحي الخيل من تصهل ، سيوف طوال
إعيوني من الفرح ، طارن حمام أشكال
ويّاك يمشي النبض . مشعل بجف خيّال
دمي إبدفترك ، وردة إو رسوم أطفال
الشاعر لو بجه دم إو غضب . جتّال
طوله يصيح
يصعد أغنية إو ينزل
كَمر بالريح
يصلّي إعله الجرح . تضوي الخيول
إتصيح
إو يصلي النوب . عكس الريح
لا . ما أطيح
يفز غبشه الجرح . كلّش يريد إيصيح
من تلمض تفكَ
تدمع إجفوف الناس
أويلي إيرف بيديَ ، اشجم نهر حسّاس
إو بجه كَبل المشي
عَطّب بكَلبه الحجي
إو غص النبض بالناس
يا مشعل يجيب الناس للناس
حزيران 1980
_____________________________________
نشيد الريح
صهيل إيوج حنين الخيل بالظلمه وطن
إو صهيل الياخذ إحفوفي اغاني الريح بالكَمره وطن
إو صهيل إيوج قميصك – شوُف – لعيوني وطن
إنتَ الوطن
كل الجروح إستاحشن
وطن
وطن
دّخَّن دم بصابيعي وطن
مهر مجنون ياخذ كل اصابيعي وطن
رياح الموت , تاخذ كل حلم ، بيك إمتحن
اصابيعي على ترابك
جمر يضوي إو حنين
الحلم غبشه إو نبع جرحين
الخوف – مامش حجر – يلين جفي
ساعه إو ما يلين
ولك ليلك صخر . يتنفس الميتين
دم يابس على النهدين
النفط جوع ، إو خبز طين
صراخ ، إيهز ظلام الليل . كَمريه . لوين ؟
إليموت إعله الجبل ، يمشي بضميره إو ما يلين
إيديك إتفك حزن كَلبي الحزين
إيديك إتمس ظلام الروح
مذعوره
لوين تروح ؟
كَمريه أو صهيل الخيل
هيبه إو يعدل الخاطر ، وأحنّ
خايف عليك إو ما دريت إشلون أحنّ
خايف . بردت جفوفي حزن
إنتَ الوطن
إنتَ طول السيف . بالروح إندفن
حزين الماي بعماقه
نذَر روحه لعراقه
إو وَجّن إجروحه البعيده إهناك بالظلمه . حصن
إلك صوت اليجي إمن بعيد . يشعل أسراري وأحنّ
أوف . الجروح استاحشن
وطن
وطن
وطن
دَخَّن دم بصابيعي
ياهو إلعَلَّم انهارك على الذله
غضب كلّش فراته . إو دم صرخ دجله
كَبل الغبشه ، مهر الليل يخطف بالدمع كحله
علّمني ليش الهجر . وكت الوصل يحله ؟
أحلم بيك وتسله
ذكرتك يا علي 1
إبثكَل الليالي السود
ها . لَنَّك حنين الكل فرح منشود
كل الجروح إتهيم بجفوفك فرح و ورود
بس ذاك الجرح
آخ . إنتَ ، إتعرف ذاك الجرح
عنيد إيصدّ ظلام الريح كَمريه فرح خضره إو يعود
هايم يوّج بالنزف
مهره إو رسن مهدود
كل ليله أبات إعله الجرح مشدود
آخ . لا ظلمه تضحك بعد
لا . ولا ليل الديوانيه . كَمرها إيعود
مذعور الشَعر درويش عنيد إو ياخذ الظلمه لهب ويزود
عالماي إنكتب اسمه . عزيز . إبكل حلم موجود
يهيم الصوت بجفوفه . اغاني إتفز عليها إنهود
إو يطيح ردود
نزيف إعله الرصيف
إو نهر ممدود
كلما بجيت إعليك تحله
ياهو إلعَلَّم انهارك على الذله
وطن والدم . إلَك شعله
يا ظلمة الموت
يا جمرة اصابيعي
يا ريحة الدم . يا زمن مهجور
يا وحشة ليالينا على إجفوفي جثث وكَبور
يا حِجرة أمي – الحزن بيها – كفر ونذور
يا شيبج حزن من نور
يا هيبة كَبر – شاكر 2 – بدر تحزن عليه إبدور
يا مشحوف واكَف عالثلج ناطور
إجفوفي ياخذها النزف كَمره إو حزن وطيور
عد عيناك
نجيب الكَمر للنهرين . كَمريه إو نثور
نحط الشمس بالظلمه بخور
يخضر الجبل ، من يهتز الهور
وَحَكَ آخر نفس
يهين إعله الوطن منذور
أبد والله
ما يطفن لياليك ، على إجروحي . سنين إمن الجمر
والريح
صوت أوكَع بيديك إو ما أطيح
الريح ، دم للريح
أهيم . أحضن لياليك سفن وانهار
تتشابج معانينا ، ذبح اسرار
أصير إمن الفرح إنتَ
وأشتَم روحي خاف إتكَول
هذي الكَمره ياخذها الحزن للدم .
نهر أزركَ أخذ مشحوف عليك إو بيك يتحَلَم
عليش الناس ما تلتَم
إو عراق الدم
شهيد هناك عالرمحين . سابح بالنزف والدم
نهار إبعيد بعيونك غَيّم . بالحزن دَلهَم
يطيح الدم
كَمر عالكَاع يضوي الدم .
لمضة دمع الحمامه إعليك كل دمعة صبح أظلم
وحشه إو صدرك يدخن حنين إو هَم
ميت تلمض جفوفك تكَول
السيف من يشهَكَ يطول
مهره يعركَ بالفضول
من هور الجبايش ما وصل طارش شهم مرسول
كلّش بعيد الدرب . وحشه إو كَصب مسلول
ظلام
إو هامن إجفوفي
كَمر
مهره
إو شهيد إبفالة الأنذال مقتول
نزيف إيهيم بالظلمه ورد . وَجّ باللهب مغسول
يفز جوع الليالي إبكل طفل مشلول
إجفوفه تموت وعيونه بعدها إتكَول :
ذاك إنتَ
ذاك إنتَ نهار إبعيد تلمض من وره الظلمه إو تجول
أمد روحي درب مجهول
هايم
وجنّ إجروحي
مشاعل تدوي كَمريه إو تصول
عراق
عراق إنتَ
إو أغانيك لصهيل السيوف إخيول .
__________________________________
قصيدة : عطش صحراوي
الشاعر: عزيز السماوي
ديوان : نهر الاعمى
____________________________
لاتبچين
غيمه إنتِ توجينَ
إو على آخر جرح بالروح بچفوفچ تحنين
تجيبين الليالي إلما تجي إو كـَمره تجين
نهر يشبكـَ نهر .. للموت
ونهودج عطشها إسنين
يلين الحزن .. بچفوفي .. وخصرها إيلين
النهر دافي إو حزين
الضحك كـَمره إو بساتين
صدرچ مهره .. مذعوره
توّج الروح بالچفين
تصهل إبليل
إو ترد
هاله خضره إمن الحنين
صحراوي هذا العطش يحلم بالنهر چفين
يرف لون الخصر كـَبل اللمس: جنحين
خـَطف.. ياخذ حنين الروح
عليچ إمن العطش نهرين
إصابيعچ اغاني الماي
تتلون غنج واسرار
گـَميره إمن الفرح واسرار
إصابيعچ ورد من نار
تجيب الكـَمره للظلمه .. إو تفل اسرار باسرار
إصابيعچ برد من نار
إصابيعچ ليالي إطوال
إصابيعج توّج گـَبل اللمس ذكرى إو جمر تذكار
أحلم بطولچ نهر .. توّج خضره البساتين
مهر ياخذ إصابيعي إبصهيل إو يشعل الصوبين
علميني المشي عالماي
علميني الركـَص بالنار
أسهر إلأبعد صبح .. هيبه إو كـَمر واسرار
ويهيم الحنين إعليك هاله إمن الحزن واسرار
علميني أجيس الحجر ينطوي بچفي إو يلين
علميني ..
علميني ..
اخ
أدوسن عالجرح صوبين
درويش الاغاني ما فرح طوله الحزين
يتلكـَه النهر جرفين
إو يفيض إمن العطش لو رفت العين
إو ماتدرين
عزيز إيعاند الغربه إو يرد إمن الفرح كلّش حزين
يهيم إخيول مذعوره ماتعرف تريد إلوين..؟
نزيف إعيوني ياخذني.. العراق إمنين....؟
يجي منك جرح أفرح .. يجن جرحين
صحراوي هذا الحلم يمتد للابد ماشين
ماأدري إنت ِ من ياصبح مهره تجين
النفَـِسْ ورد البساتين
إخذيني..
إخذيني..
أصد الخوف من يعرض تجين إو ما تجين
الجمر يخضر من تجين
الگـَمر يكبر من تجين
يالون البرد بچفوچ الحلوين
تزيد إمن الحزن كلْما فرحها إيزيد
ياخفگـَ الحمام..
إو لهفة التنهيد
مذعور الصدر
دوّخ إصابيعي..
إو حّير النهدين..
سرب إمن الحمام ايطير .. مدري الوين..؟
كل عمري يمتد نهر .. يفيض ايضيّع الجرفين
أموت إمن العطش
لمن تجين .. إو ماتجين
أمر برد الصبح بچفوفچ إتحلمين:
شمس تاخذ إصابيعي نهار الغبشه الماشين
إنتَ منين
وآنه إمنين...؟
جرح يجمع عذابين
تحزن .. اشوفك
كـَمر
يغركـَ
بالنزف
ليوين
حـِزين الگـَمر.. بچفوفي .. ليالي إينوح
ياصوت إليهيم .. اشراع .. للروح
يا.. سر... اليجيب.. الروح.. للروح
يا گـَلبي .. إلعليك .. إبذله مذبوح
إشعلي الماضي كله ابليل
إوحيل إبجي عليّه شما بالنـَفـِس من حيل
إخذيني ظلام إو خوف
لميني نزف ما شوف
داويني كـَمره الوطن
يهيم إعيون لَشـّوف
إخذيني نهر أزركـَ يفيض إمن الفرح ويشوف
يلمض الليل إو يفز : خيل إو شمس وسيوف
حـِزين النهر يتلمس بيديچ إطيوف
يوّج برد الاصابع من حنين الخوف
ويهيم غبشه الصدر .. لچفوفي كلي.. إنشوف
مذعور الشـَعر بالريح .. مهره إبلا رسن وطيوف
إخذيني خذاني الخوف
إخذيني نزف شاعر يطيح إعله الورق ملهوف
إخذيني قصيدة هور تدوي إبكل حرف مشحوف
إخذيني ..
إخذيني ..
كـَمره إو حصن وسيوف
أريد إلما تريده الناس وأحلم بالظلام إيشوف
أهيم إمن الحزن وأوكـَــف إبطولي اشراع
ولك ماي النهر كل عمره بس .. إوداع
الوطن بين الاصابع ما يمس الكـَـاع
أفرح يموت الفرح
أحزن
توّج اسرار
أسافر بالدمع مرتين
. مره حنين الصدر ياخذني مدري الوين..؟
. ومره الاصابع توّج روحي اغينه ابچفين
وين..
وين إتغني بچفوفك تريد إلوين..؟
يهيم الصوت بالكـَـمره عـَلَيْ : مهرين
ياخذني الصهيل إو يرد خوف إيفزز النهدين
أغانيّك حنين إجفوف بالنهدين
حمام إيطير بالكـَـمره لوين....؟
أطير ابلا جنح جنحين...!
أغانيـّك نهر تاخذ حنيني انهار
أغانيـّك سفن من نار
فرح ورد القميص إبجية الخطار
أغانيـّك .. جمر بيت الفقير إو عزة الأفكار
أغانيـّك .. تهز ليل المدينه بكـَـمرة الاسرار
أغانيـّك فرح درويش .. يلعب بالجمر والنار
أغانيـّك .. تمس جرح الشهيد بدمعة الثوار
وين
وين إتغني بجفوفك تريد ... إلوين....؟
يهيم الصوت بالكـَمره عَلَيْ : مهرين
أغانيـّك نزيف إعيون تجيب الكل صبح شمسين
دلّيني العراق إمنين.....؟
اب/ 1988
سكيكده الجزائر
__________________________________
صهيل الأصابع
خوفي مُهْره..
إتوجْني
بچفوفك .. صهيل
يهيم الطول ، گمريهْ ، أغاني إوليل
الويل من السفر ياروحي كل الويل
ظلمَه إوقميصك صبح
كل خطوه غربه إوذبح
ياخذ كل جنوني الليل
تهيم أسراري
تاخذني
تردِ تهيم
تاخذني .. رياح إمن الغضب والخيل
يلمض بصابيعي الشعِر صوت إو مواويل
طوالك ..
ياخذ إعيوني
ليالي إتوج ليالي
إمن الفرح .. گمره إو صهيل
هيبه الخيل من تضوي بدرب أظلم طويل
لون الأ صابع .. يّوج .. وردة خجل باليل
تاخذ حنيني .. إهناك
گمره الحنين .. إهناك
إنتَ إهناك
ظلمه .. إبلاوطن .. بس گلي وين ألگاك
أهِد إچفوفي .. بالغربه .. حمامه إمن الفرح .. لهناك
نجمهْ .. إبلا صبحْ .. ذكراك
وين أالگالك .. ؟
وين إنتَ .. وين ألگاك
تنزل بالدمع .. ما أدري وين أالگاك
أمشي .. إعله الجمر .. بلچن تجي .. إو ألگاك
وين ألكاك؟
وحده النزيف يصيح :
مامش وطن للريح ..
كلها إ طيح
وچفوف الرفض ماتطيح
ياخذ قميصي غفلْ .. مجنون طبع الريح
مشعل يوَج بالنبض .. عيب إبهواك إيطيح
إنتَ الويل
إنتَ ريح .. إليشعل الظلمه .. عواصف خيل
إنتَ( إنهير ) مذعور النبع والسيل
إنتَ التاخذ إچفوفي أغاني .. إويل
تخطف على الشفه شموس إمن الفرح والهيل
إنتَ سر اليشعل الليل الطويل
ليلك ..
جمر يشعل جمر
والسهر منفي الأصيل
انتَ ذاك السيف من يلمض صهيل
تخطف إطيوف الفرح
كذله
إو عليهّ .. تميل
ياخذ إعيوني الفرح ..
إنتَ الفرح ..
شوف إودليل
هذا إنتَ .. ذاك ضوه
هذا انتَ .. لعيونك دوه
هذا إنتَ ..
من ياصبح ..
شهگن إجروحي سوه
لو بيدي جبت العمر مشعل بيدك إو ضوه
هذا إنتَ .. وين إتريد .. ؟
وج طولي .. گله إو دوه
هذا إنتَ المشيت ..
إو هذا أنه إلعلى اجفوفك عمر كل العمر ميت بچيت
إشتعلت بروحي الليالي
متت جمره ..
إوما طفيت.
أتسودن عليك وأشتعل ملگه إوغياب
ماتدري الضمير إكتاب
إو ماتدري الزمن ..
زاد التجافي
إوترس كاس المودهّ إتراب
عليك الروح مجنونه تريد السيف لجروحي دوه إوعطّاب
أعبدك .. كلي تاخذني ..
ليالي إتوج
على اجفوفك .. صهيل
تطيح إعيوني .. بالگمره
نزيف
إعله
القميص
إيسيل
كلي خذني بين إديك وإمسح إجروح القتيل
كلما يفز النبض
يخطف .. بالجفن
مذعور نجم اسهيل
أهيمن ريح .. مجنونه ..
توّج ليل السفر
كمره إو مواويل
تطيح أحلامي بدموعي ليالي إمن النزف والخيل
هيبه الخيل من تضوي بدرب اظلم .. طويل
تهتز معاني إوكتب
تميل إمن الحزن
توگف .. ترد .. إتميل
إنتَ الليل
إنتَ الخوف ..
يايمَه شمس الصبح لون الخجل بچفوف
هذا الحنين الياخذ إعيوني دمع وطيوف
إنتَ الشمع .. بالنهر الحزين .. إطوف
إنتَ الشوف
لو يطفي النذل بعيوني كل الشوف
أوف ..
خوفي دوخي عليك
خوفي .. لا منك .. عليك
خوفي نتمشى العصر
خوفي كاغد عالجمر
خوفي .. وين .. إبعيد ، بعيونك سِكُر
خوفي طول اليشمر الكذله مهر
خوفي ياخذني الفرح هالة حزن مابين إيديك
خوفي هذا الشيب من يلمض نهار أزرگ بيديك
خوفي كل الناس تنشدني عليك
خوفي شاعر بين إيديك
إوتصلي الروح
بچفوفك
حنين إمن الحزن والهم
أصفن .. وأريد النوب أتعلَم
كل الجنون .. يدور بعيوني ولا أفهم
ياوردة الهم ..
ياجمر الليالي وريحةه الدم ..
تتفتح .. « غضب»
تضوي
إوترد تلتم:
ماشايف .. كمر مطفي ..
ولا شايف ..نهر منفي
لا .. ولا ..
شايف ..وطن ابطوله النزف يمشي
وين إتريد ..
تاخذني ..لوين إتريد ..؟
گمره الكوفه بعيونك نشيد
تصلي البصره للماشي إبدرب أظلم شهيد
حزِ الثلج عالصافن بطوله وحيد
تدوي المشاعل بالنبض ما أدري وين إتريد
تهيم أحلام .. گمريه ..
حنين إمن الفرح ..
تضوي إو تزيد ..
انتَ بچفوفي نشيد
يهيم الطول .. ياخذ كل حنيني .. إبعيد
هيبة المهر من يشعل الريح بصدر عالي اللهب ترديد
صهيل إيفز بصابيعي جنون إعله الصدر ترديد
عنيد الريح ..!
ومهير السفر كلّش عنيد
«حرير » .. إچفوفي تتنفس واگول إبعيد
وميض الفرح بعيونك .. عراق إجديد
عرگت إصابيعي ..
إوبچت كل الأغاني .. إومادرت
آنه لو إنتَ الشهيد ..!
صوتي يلمض .. بالشعِر .. خيل إو نشيد
تفرح إهدوم اليتامى إو تضحك إدموع «العبيد»
كل البرد مايطفي گلبي _ لوراد المشي _ يعرف
يريد
لا روحي لمها البرد ..
لا .. ولا ..
گبر الثلج يطفي الوريد
أريد .. إوما أريد .
ياخذ كل حنيني اليليل .
لابي ّ اجيس الصبح
لا .. ولا ..
شمس الحلم تخطف عَلَيْ باليل
كلما يفز الجرح .. ميت واگولن حيل
الويل كل الويل :
• لوذيب الغدر يوگف بالدرب رايه إودليل
• لو أبعد حلم يمشي برجل وحده إويميل
• إو لو هذا الوطن .. يعثر إبصوته الصهيل
والويل كل الويل ..
توّج إچفوفي بالظلمه ..
إو تصيح ..
الويل
الويل كل الويل ..
ماشفت كل العمر قاتل يصلّي إعله القتيل
خوفي وردة المستحيل ..!
كانون الاول / 1989
سكيكده . الجزائر
___________________________________
بصره
{ الى مصطفى عبد الله }
إتمنيت هذا العمر حجرة إو دمع وإكتاب
إتمنيت ذاك الكَمر ظلمة إو ابد ما غاب
إتمنيت طولك يجي هيبه إو جرح ما طاب
ريح المنافي .. نذل .. يدوي إو تصده أبواب
نغلكَ باب
تتفتح الوف أبواب
الموت ياخذ غفل من بين إيدي احباب
كاس الحزين انترس ظلمه إو جمر وتراب
لا .. ذاك يطفي الجرح ..
لا .. ولا ..
هذا الزمن يسوه العتاب
تلمض ليالي السفر .. كَمره إو جرح ..وإكتاب
لو فز الجرح بالروح
توّج كل الضماير
للجرح
عطاب
أتنفسك دم
إنهير من الحزن أظلم
زمان الغربه بچفوفك حجر أظلم
أحلم يهيم السيف لچفوفي بصهيل الدم .
أهيم براية الثوار كَمريه إو عليك ألتم
يا هو إلعَلّم چفوفي إبصهيل بعيد تتحلم ؟
تاخذ كل اصابعي منافي الدم
أتنفسك دم .
جرح الشهادة ارتفع بيرغ يوج إسنين
ليل المسافر صبح يضوي إبهمة الماشين
صهيل الخيل بچفوفي يوج رغبه إو حنين
ناعم حرير النار
ظلمه إو جمر واسرار
بالظلمه يضوي الجسم سيف إو ذبح واسرار
نزف الياخذ الدنيه مهر من نار
اليدُور إبلا فلك يندار
إليصلّي إبلا كَلب غدار
إعيونه تهيم مذعهوره . بومه إمن الخرايب عار
كل الرجال إتموت مقتوله إبحزن واسرار
بس كَبر النذل تهز بيه الفضايح والخزي والعار
ظلمه الليالي إنجوم واسرار
يهيم الصوت بچفوفي رفض واشعار
ومض المعاني إعيون ثوار
بعيونك حزن ذاك العراق إو هيبة الاسرار
مهره الغربه بجفوفك شعر واسرار
توّج كَبل الصبح
صوت ..
وشمس واسرار
غيمه توّج بصابيعي حنين إمن الدمع واسرار
سر الياخذ ظنوني
لوين يدور ..
اندار ..
هيبه النهر
يصعد حنين إو يرد
يصعد ليالي إو يرد
حزين من السفح . دايخ حزين
هيبه إليكتب أيامه . حنين الماي عالطين .
ياخذ جفوفي النهر . يمشي بغنج ماشين
أهيم من الفرح
ياخذني حنين . لوين ؟
قميص . يهيم بعيوني . نزيف من الهموم سنين
إهناك يضوي النزف . مشعل قصيدة ، إو دين
أعمى وأحس الدرب ، هذا إنتَ وادري إمنين
هيبه السيف من يلمض حجير إوتلحين
ليل الأغاني
جمر صافي اللهب
أخضر حزين
ادور إعله الجمر عمرين
قميص ، الياخذ الظلمه نشيد . الوين ؟
شيخ المنافي لو بجه بحضن الصخر
صدك يلين
يخطف بروحي الحزن . خايف أكَول إلوين ؟
صلاة الناس
من يطفي عمر ذاك الحزين
آنه أدري . ما تدرين يا بصره الطيبين
يهيم الشيب بجفوفج عواصف من نجوم . إلوين ؟
صهيل الياخذ الظلمه نهار . إلوين ؟
أوّج كلي دمع ازركَ . حزين
آنه أدري ما تدرين يا بصره الطيبين
يا صوت إليهز غفله الدمع بالعين
ما سامع حلم بالدين
ما شايف عمر بالدين
حسره من الجمر يا عزة الطيبين
يا بصرة الطيب
يا ماي الزلال إو لحظة الترحيب
إسمج بالمنافي حرز يصد العين خاف إتصيب
يهد روحه الرجل . كَمره إو فرات إو طيب
تفز روح النذل . عَجّه إو ظلام إو ذيب
بس الذيب
هذا اليوم
ياكل لحم اخوه الذيب .
يا بصرة الطيب
نزيف الناس بعيوني . نزيف إلما إله ترتيب
تغيب الشمس كل مره إو ترد إتغيب
وميض إيفز ، عذابي بليل تعذيب
كلمن يريد السفر
تروح إبعيد اسراره
صهيل
إيوّج كَبل ريح المنافي . إكتاب
صدر الحلم إنجوم وإكتاب
إو صدر اللئيم إكَبور وتراب
صدري الياخذ الظلمه . صهيل من القهر عطّاب
مذعور فز الصبح
يخطف مهر عالجرح
ياخذ إجفوفي بعيد . إبعيد
غيمه من الحزن
ذاك المهر غاب
إيتلكَه الريح صدري إكتاب
هذا المهر من يفز . نجمه إو فرح واكتاب
يظل نجم الشهاده ، إلكل جرح عطّاب .
كانون الثاني 1990
___________________________________
شموس في ليل الملحمة
الكبير عزيز السماوي
-----------------------
فزيت كلي جمر مامش وطن بالبيت
نسيت إسمي إوضوه إعيوني إومدري إبيا حلم
ظليت
كل ساعه أطفي الجرح... مل الجرح.. ملّيت
ظلمه.. إوتصفن إچفوفي
گمر أزرگ..
إلك حنّيت
أهيمن كلي بالگمرة اغاني إمن الحزن واسرار
يطير الشيب گبل الريح إلك.. اسرار
ورد القميص يهيم بچفوفي جمر واسرار
آخ.. أنتَ الفرات التشعل إظنوني اغاني إونار
خيولك ريح مذعورة توّج ليل الحزن گمره إونهار
هيبة إوصهيل.. أيامك إخيول
بيرغ يشعل الريح.. إويصول
جرحين أعله طولي
إبجيتك
ودّيت
واحد خذاني إلك
إو واحد للوطن مشعل نزف وجيّت
يخطف وطن بالجفن مهره إوسنين إتغيب
صافي الگمر بالنهر.. ذكرى إوحنين إوطْيِب
يامن يودي الجرح.. مشعل گصب ترحيب
إذكر زين..
النذل :خنجر نذل
والطْيِب :گمره إوطْيب
رف الحنين ابضلع مكسور
چفي حمامه إوتظل كل السنين إدور
إخذني أنتَ الفرح و لبيتك إتعنّيت
أچفوفي نار الرفض
ظلمه
إوإلك.. صلّيت
ردتك صهيل الياخذ إچفوفي اغاني إودم
ردتك بصرة السيّاب.. فهمني.. أريد افهم
مشاعل بالبيوت أتريد.. تتكلم
مهره إتهيم بچفوفي گمر يحلم
زلم بالجوع تتلثم
يطيح الخوف يتهدم
يتحرك الدم
ثوره إتوج ظلام الموت
گمريه..
إبنهار أظلم
حزين إوتغبش انهارك فرح
چفك حنين الكل محب منك عليك إنجرح
صدرك يهيم إويحضن
إجروح الشهيد..
النازف
إبطوله.. سبح
ضميرك مهرة العباس
لو فارس
وگع..
منها إنذبح
نهار أظلم على اسيوفك بچيت
يوج جمره الحنين إمن الحزن
لا..
ولا.. مره
إنحنَت روحي
ولا ذليّت
أذكر من يجي إمغتر يطر ليل الگصب والهور
صهيل إوگمره بعيونك.. تعدل الخاطر المكسور
بين الفاله و الفاله.. شهيد.. إمعلگ إومنحور
عراق إنتَ واجيت إمنين
إخذ إچفوفي إلك جرفين
هذا آنه نهر اظلم حزِين إوبارد الجرفين
إخذ الروح بچفوفك لهيب أزرگ خفگ جنحين
أتوسل بيديك
إوأعبد انهارك
إخذني اوياك إلك جنحين
تهيم الظلمه بترابك اغاني إمن الحزن ظلّيت
تنوح إمي.. عليك
إوتحزن انهارك
ليالي إبلا صبح
آخ.. چم غبشه حزِينه
إبلا وطن صلّيت
كل ثوره تبدي الصبح.. آخ.. إنت تبدي إمنين
ما تدري كوخ الگصب.. ظلمه إو حلم شمسين
سيفك طويل إويلمض إبليل السفر.. ليوين..؟
طولك فرح.. بالمشي
إحصانك حزِين إو يضوي بعيونك بچي
ردتك حنين.. إتوجني..
بچفوفك
گمر..
حتى الصبح.. غنّيت
صديق إنتَ
حنين إنتَ
حزِين..
إوتلتفت گمره..
صهيل الطول..
ياخذ كل إصابيعي
جنون إمن الفرح.. وجيّت
صدر الفرات إرتفع شايل هموم الناس
غطى الجثث بالدمع.. بين الورد والياس
يشرب تتن للصبح.. جمره الشمس بالكاس
حزِين النهر يتلگه الجثث بالليل
حزِين إوخايف الجرفين ظلمه إوويل
حزِين..
الموت بعيونك و لا وصيّت
أعرف ضميرك
گمر..
يشيلك مد. حنين
الياخذ إچفوفي
شراع اول سفينه
إمن الفرح.. وجيّت
شيب إمي ليكم غُبَش حزن إوفرات ازرگ
إچفوفج ليالي إوجمر.. گمره النهر.. يعرگ
خيل إتوج على الجرفين لو شافت گمر.. يغرگ
ردتك صديق إووطن بالروح
ردتك سفينه إوگمر ما أدري وين إنروح
تهيم إجروحي..
بالظلمه..
بيارغ من لهب.. وجيّت
أصيح إبصوت تسمعني و لا ردّيت
شيبك يهزه الريح..
مذعور..
إوعلى اچتافك..
نهار إمن الجنون.. يهيم..
ويطيح
خلّي السبحه و الفنجان..
ما تلگه البخت بين الخرز تسبيح
مهرك صهيل إودمع..
سيفك حزِين إويشع
وإنتَ إبعيد..
لا غيم ضميرك
لا..
و لادمعة حزن هلّيت
وحدك حزِين إعله الثلج كل العمر ظلّيت
يا حيرة الناس..
يا نعش الشهيد اوريحة الياس
يا نهر الحزن - مامش بخت - للناس
على الجرفين
بچفوف اليتامه إشموع إلك ودّيت
هذا الياس مغسول ابدمع إمي إلك ودّيت
يانهر مايك حزين
يانهر ذاك الورد خايف حزين
يانهر صار الوطن دمعة طفل مسكين
يانهر شيب إمي ريح إويلمض إبليل الحزن.. ليوين..؟
تصيح إبصوت تسمعها ولا ردّيت
تظل إتصيح
إلك..
خايب إلك
كل الزلف گصّيت
أطيحن صوت عالجرفين إلك ذليّت
گمر ناصي عليك إمن الحزن وجيّت
آخ..
تغص بيك الجثث و إنتَ إمن الجثث غصّيت
الكبير عزيز السماوي
أيار/ ١٩٩١ لندن
_______________________________
جبل الأحلام
صلّيت الحلبجه إو وَجّن إجفوفي عركَ من نار
حزين الجبل يتنفس سموم العار
كل شهكَة طفل . صوت إو ذبح غدّار
صراخ الناس بالظلمه ، إمن الغضب والنار
خردل يوّج بالصدر . موت إو لهب وحجار
تطيح عيون مذعوره . صهيل إمن النزف ظلمه
إو فلك دوّار .
أبداً ما يموت الريح
يهتز ضمير الحجر ويصيح
كل المدينه تصرخ بالنزف وتطيح
دَخّن هذاك الكَمر . أظلم وكَع بالريح .
وينك يا عراق الناس
ياليل المحبه إو للمحب كاس
يا دمعة صديق إعله الوجن . نجمة صبح تنباس
أعرفك ترفع الراس .
صهيل أول حضاره إو شيلة الراس
سومر . بابل ، إو آشور
خيول إمن اللهب ، بين الكتب تنباس
توّج إجفوفي إلك كَمره
هذاك إنتَ الحزين
إتغني إو تهيم
أويلي إنتَ
أويلي إنتَ
صديق إليشعل الظلمه
أغاني
إمن الشمع والياس .
زمان أزركَ حنينك . لا . كَمر ينجاس
أغبش أشوف الوطن
دمعة حزن بالكاس
إذكر يا عراق الناس
كَلكَامش اغاني النار .
صهيل ابعد حنين إو هيبة التذكار
يهيم الوطن بجفوفي حمامه من الجمر والنار
هبضز لي زلم ثوار
توضج هيبه المشاعل للغضب والثار
ترد الموت كَمريه
هلاهل من فرح ورد جبلنه . انصار
أعبك يا جبل بس كون إلك أنصار
الجرح وردة نزف . دخان
الجرح صدر الحمامه إو خفكَة الجنحان
الجرح . طولك يهيم إو ياخذ إجفوفي نهر حَلمان
الجرح . آخ الجرح
لو رف القميص ألوان
أهيم كَمره بجفوفك وأرد من الفرح حَزنان
الجبل ظلمه إو صهيل الياخذ اجفوف الزلم
شعلة غضب . نيران
الجبل يهتز للطفل لو نام جوعان
الجبل اخضر بالمنام
الجبل جمره التّوج . ليل الوطن كَمره إو ظلام
هيبه إنتَ إو صهيل الياخذ إجروحي حمام
ريح إنتَ تشعلني كلام
إنتَ الحلم كَبل المنام
قميص إيوّج اصابيعي أغاني إمن اللهب . أحلام
الجبل خوف إو حرير
الجبل دمعة اسير
الجبل صحوة ضمير
الجبل صدر السفينه الياخذ الظلمه . نهار
الجبل يمشي بضميري إلآخر المشوار .
نيسان 1991
:________________________________
تعليقات
إرسال تعليق