النهر آه النهر
_________
((وكالنبع الذي يلاحق النهر الى
حيث يفكر ، هگذا علي ان رحل
واتبع اليقين في دروب التشرد))
هلدرلن
____________________________________
اگدر أعاند بالمشي وجه الريح
وأگدر اشوفن بالحچي . . الوان اتصيح
وگدر. اتنفس حجر . . بارود
روحي اتمس حنين الماي . .
ازرگ يصير الدمع . . مايفعل ايطيح
أگدر أنامن عالخناجر . .
للصبح . .
دمي ايسيح . .
وگدر أعاند . .
وأقر جرحي الغميج . .
هناك . .
ارده اهلال . .
ويباهي السنين البيض . .
گمره حمره . . ايصيح . . !
أصل المشاعل لهب . . تضوي بحنين اسيوف
حاجيته بيدي الجمر . .
خذني . .
سفن . . بطيوف
جست الزمن بالنبض
سبحه الزمن بالنبض
كل خرزه نجمه اتشوف . . !
وتطيح النجمه . .
عالجمره . .
- طفر وجهي . .
ضوه الروحي ..
گمر ثوره -
أگدر أسوي الفحم . . ورده
وأگدر أسوي الجسر . . دنبوس . .
وما أگدر أعدل الراس لو سكته انكسر ناموس
. . . . . . . . .
أگدر أصيّح . . بالحلم . .
صوتي نهر . . بالحلم
أخضر . .
تسبح بمايه . . النثايه
يتغنّجن . . يتلوّن . . يدرن عذابي اهو ايه
كلما أجيس الشمس . . يثگل ظلامي اهو ايه
وأهد روحي . . نجوم . .
ازغار . .
تتزارگ خطوط . .
اوتحن
عدل تهتز . . او تحن .
وكت . . الرگص
للكذله . . لوفه . .
اوتحن . .
بالك تهز گلبي غفل . . مهره وتغيره اهو ايه
بالليل جست الحلم . .
« دف»
وحنينه امر ايه
وما اكدر اعاند . .
لوشفت . .
لوفة . .
رصيف . .
أگعد ابچي اعلى الرصيف . .
ُُ گلبي فنجان بمضيف . .
گلبي فنجان بمضيف ،،
يرگص بطرف الاصابع . .
نجمه حمره . .
لونزيف . .
تلتم اچفوفك علي ّ . . هاله خضره اعلى الرصيف
بردت اديّه
اوغيّمت روحي . .
وضحك سنّك ضوه . .
واركضت ظلمة الرصيف . .
اركض وظلمة الرصيف . .
وتشهگ الريّه مشاعل . . تترس الشارع نزيف
. . . . . . . . .
. . . . . . . . .
ما أگد اعاند لو شفت . .
خطوه . .
متنوسه وتزل . .
- يايمّه . . ويّه الخطوه . . اذل -
لو رفة ضوه . . وخفگة جنح
ولو گذلة ذهب . . تهتز بالرگص . . گمره.
اخاف . .
وتنزل . .
بابعد . .
جرح .
جمره . .!
ظلّيت . . أصيح من الگلب . .
شفت . . الحلم
عشر اخيول . .
تدنگ . .
بالدمع للگاع . .
يضوي بديّه . . « الصبح »
ويشهگ بجلدي
نغز عاگول .
ما اگدر انيمّ بالحلم
اجمل طول
اكدر ادبچ . .
عالجرح . . وانزف حيل
ويرگض حنيني ضوه . . أطول . . ريل
بالليل يضوي . .
ويطرد الظلمه . . الريل . .
هاك . . اخذ هذا النزف . .
وتلگّه . . ذاك الضوه . .
وشدني بديتك . .
سيل أخافن من سيل . .
اذا ر _ ١٩٧٥
عزيز السماوي
تعليقات
إرسال تعليق