مشاحيف السفر
عزيز السماوي مشاحيف السفر
اولا/
تظل تفتر نواعيرك
تجيب النة العطش ، واتنوح
ومشاحيف السرت بالطيف
تصبح بالكرامة اجروح
وين انروح؟؟
ياخذني العرگ والدوخة وين انروح؟
ويظل السؤال اسنين
خنجر ملتوي اعلة الروح
وين نروح؟
وتهب الريح
عجة خوف وأرماد الشمس عالگاع
ولك عمري سفينة اتروط ،
وإنت الريح وإنت اشراع
ويهزني الخجل ليفوگ
عرگ طولي يصل للگاع
وتمر الدنيا بعيوني
واشوفك وحشة ماتنباع
يغط گلبي بظلامك أوف
اجي ابهمة واردن خوف
اوف ، اوف.
اوج بهيدة ألك فدوة
واصيرنلك ضوة واشموع
اخذني ادموع لچفوفك ، اخذني ادموع
بچفوفك بچيت اسنين
ولك وج المساحي انضوي درب الطين
من يقرة البخت مكتوب
افطور من العطش بالطين
دنيانة اتحمل كل حين
تجيب النة حلم عطشان
يغفة اعلة الرماد اسنين!
ثانيا/
ضميره ألسيف وألفالة ، ألتسولف عالجرح والثار
هاك أقرة أبعرگ گصتي ، مذلة وعار
أوج اوتلگة روحي ألنار
وأهيمن لو عرگ گلبي ، وأجيلك سيف ، للدم حار
واطيحن عالدرب خطوات
خطوة أدموع
خطوة افكار
وخطوة أبعيد ، ياخذها ألضوة الوصلك تفل اسرار
ضمير ألسيف من يشهگ
صهيل أحصانة نجم أزرگ
وبألنوم ألثلج يعرگ
"ونشوفك بألحلم مرات"
"ونصليلك سبع مرات"
نبض گلبك يدگ خطوات......
كل خطوة صبح بالراس
كل خطوة شمس بالراس
ثگلان ألحچي بالراس
ياعابر ، الدنية ، ابعطش وجروح
هاغمج العطش بالروح!!
ألطيفك صلت اچفوفي
ويمر ذكرك نهر يجمع سواجي الروح
ها غمج العطش بالروح.
ونصلي اردود
وطيفك من بعيد أيلوح
ونعرگ من سواليفك
وياريت العرگ من دم
نصفن
تغبش الدنية ، بنهار اظلم
وأجيك أعيون عطشانة ، تضوي الدنية لو تلتم
وأشهگ واطبگ اجفوفي ، رمح لچفوف ماترحم
ويدخن گلبي چم مرة
واگلة أشبيك؟
مامش واهس امسليك
يگلي احنة "بنگيصة دم"
ثالثا/
يظل دربك اثر خيال
صفنة وللعجاج يحن
سنطة خوف ياخذنة
دمي اعلة الثلج يصفن
ون ، ون
يمر بيني لبينك موت
إنت الريح واني الصوت
انزل للگلب بس صوت
وإنت الريح
تاخذنة ونرد اشعار
وي خفگ البيارغ والشموع اسنين
"تمس وجه الظلام ايلين"
وتصعد بالفرح نجمات
والشمعة گمر بالطين!
وندوخ ، اندوخ
ياخذنة النظر لبعيد
لحدود السفر واندوخ
بالوگفة مشينة اسنين
نطب بيت الشعر وانطوف
نرسم بالظلام اعيون
يطگ بيها ألضوة وانشوف
صفنتنة كواغد بيض
جسن بالرياح ونين
لهفة ابعيد تاخذني ، واصابيعي جمر بالطين!
جنون اعيون
دمع اسرار
تضوي امن الگلب اشعار
تصعد بالظلام اسرار
وتنزل عالنهر موجات
ياخذهة البرد واتوج
وج
وج
دواير من لهب واسرار
دواير من فرح واسرار
دواير من حزن واسرار
دواير بيض كلها اسرار
إلك اسرار
وعلى عيونك تمر اشعار
ياخذها الحچي واتهل
بس تحزن اجيك إدموع
وعلى ارموشك اموت إدموع
بس تحزن
يمر ظلمة حزين الماي
من دون الخلگ روحي
توج او تنطفي اعلة الماي!
حزني وياك شمع انذور
نحدر بالفرات انذور
نمس وجه الظلام ابنور
تصعد بالظلام ابدور
إنت النور
وانة ادموع
اذوب كل سنيني اشموع
وأنزلك دمع بهداي
انة انزل دمع بهداي
يالوصلك شمس عالماي
ولك مو تعبن الرجلين
والخطوة تفز عالماي
من دون الخلگ روحي
توج
وتنطفي
اعلة الماي
انة الصوت ، جرة ناي
وإنتة الريح
تلتف عالشجر يعرگ
يطگ أمن الخجل نجمات
وبالنوم الثلج يعرگ.
ويمر طيفك
يشيل امن العرگ فد مد
رجف گلبي ، سمانة ازرگ
ونظل بين البراري انفوت
بس مد السواجي يموت
نظل للدوم نتفارگ
انت الريح
وانة الصوت
انزل للگلب بس صوت
وانت الريح
تظل اتدگ جبل واترد
چنت وياك حدنة الموت
نفووز سنطة الچلمات من ترعد
خلهة اتون
نسودنهة شعر واتون
ولك درب الشعر حزنان
ظلمة وللسيوف يحن
ون
ون
اقرة او دممع اعيوني ثواب الكم
"واشماله القرة اچفوفي بچة وغنه"
1970
تعليقات
إرسال تعليق