عزيز السماوي بصرة

3 – بصره

{ الى مصطفى عبد الله }

إتمنيت هذا العمر حجرة إو دمع وإكتاب

إتمنيت ذاك الكَمر ظلمة إو ابد ما غاب

إتمنيت طولك يجي هيبه إو جرح ما طاب

ريح المنافي . نذل . يدوي إو تصده أبواب

نغلكَ باب

تتفتح الوف أبواب 

الموت ياخذ غفل من بين إيدي احباب

كاس الحزين انترس طلمه إو جمر وتراب

لا ذاك يطفي الجرح

لا . ولا هذا الزمن يسوه العتاب

تلمض ليالي السفر . كَمره إو جرح وإكتاب

لو فز الجرح بالروح

توّج كل الضماير

للجرح عطاب .

أتنفسك دم

إنهير من الحزن أظلم

زمان الغربه بجفوفك حجر أظلم

أحلم يهيم السيف لجفوفي بصهيل الدم

أهيم براية الثوار كَمريه إو عليك ألتم

يا هو إلعَلّم جفوفي إبصهيل بعيد تتحلم ؟
تاخذ كل اصابعي منافي الدم

أتنفسك دم .

جرح الشهادة ارتفع بيرغ يوج إسنين

ليل المسافر صبح يضوي إبهمة الماين

صهيل الخيل بجفوفي يوج رغبه إو حنين

ناعم حرير النار

ظلمه إو جمر واسرار

بالظلمه يضوي الجسم سيف إو ذبح واسرار

نزف الياخذ الدنيه مهر من نار

اليدُور إبلا فلك يندار

إليصلّي إبلا كَلب غدار

إعيونه تهيم مذعهوره . بومه إمن الخرايب عار

كل الرجال إتموت إبحزن واسرار

بس كَبر النذل تهز بيه الفضايح

والخزي والعار .

ظلمه الليالي إنجوم واسرار

يهيم الصوت بجفوفي رفض واشعار

ومض المعاني عيون ثوار

بعيونك حزن ذاك العراق إو هيبة الاسرار

مهره الغربه بجفوفك شعر واسرار .

توّج كَبل الصبح صوت وشمس واسرار

غيمه توّج بصابيعي من الدمع واسرار

سر الياخذ ظنوني 

لوين يدور . اندار .

هيبه النهر 

يصعد حنين إو يرد 

يصعد ليالي إو يرد

حزين من السفح . دايخ حزين

هيبه إليكتب أيامه . حنين الماي عالطين .

ياخذ جفوفي النهر . يمشي بغنج ماشين

أهيم من الفرح 

ياخذني حنين . لوين ؟

قميص . يهيم بعيوني . نزيف من الهموم سنين

إهناك يضوي النزف . مشعل قصيدة ، إو دين

أعمى وأحس الدرب ، هذا إنتَ وادري إمنين

هيبه السيف من يلمض حجير إوتلحين

ليل الأغاني

جمر صافي اللهب

أخضر حزين

ادور إعله الجمر عمرين

قميص ، الياخذ الظلمه نشيد . الوين ؟

شيخ المنافي لو بجه بحضن الصخر 

صَدّكَ يلين .

يخطف بروحي الحزن . خايف أكَول إلوين ؟

صلاة الناس 

من يطفي عمر ذاك الحزين

آنه أدري . ما تدرين يا بصره الطيبين

يهيم الشيب بجفوفج عواصف من نجوم . إلوين ؟

صهيل الياخذ الظلمه نهار . إلوين ؟

أوّج كلي دمع ازركَ . حزين

آنه أدري ما تدرين يا بصره الطيبين

يا صوت إليهز غفله الدمع بالعين

ما سامع حلم بالدين

ما شايف عمر بالدين

حسره من الجمر يا عزة الطيبين

يا بصرة الطيب

يا ماي الزلال إو لحظة الترحيب

إسمج بالمنافي حرز يصد العين خاف إتصيب

يهد روحه الرجل . كَمره إو فرات إو طيب 

تفز روح النذل . عَجّه إو ظلام إو ذيب

بس الذيب 

هذا اليوم

ياكل لحم اخوه الذيب .

يا بصرة الطيب

نزيف الناس بعيوني . نزيف إلما إله ترتيب

تغيب الشمس كل مره إو ترد إتغيب

وميض إيفز ، عذابي بليل تعذيب

كلمن يريد السفر 

تروح إبعيد اسراره

صهيل 

إيوّج كَبل ريح المنافي . إكتاب

صدر الحلم إنجوم وإكتاب

إو صدر اللئيم إكَبور وتراب

صدري الياخذ الظلمه . صهيل من القهر عطّاب

مذعور فز الصبح

يخطف مهر عالجرح

ياخذ إجفوفي بعيد . إبعيد

غيمه من الحزن

ذاك المهر غاب

إيتلكَه الريح صدري إكتاب

هذا المهر من يفز . نجمه إو فرح واكتاب

يظل نجم الشهاده ، إلكل جرح عطّاب .

كانون الثاني 1990