نشيد الناس
نشيد الناس
شاكر السماوي
اللوح الأول
في البدء كان العصر
في البدء كانتِ الضرورة
في البدء كانَ الاختيار
و النهار....،
ينزرع بالليل و عيون الزغار،
نجمه حمره ابكل مدار.
ينزرع غابه جديده،
بين جوع الِسنبله وأطعم الخضار.
ينزرع ع الماي صاري،
من تتيه اجروفه يِوج روحه فنار.
ينزرع بالسكته چلمه،
اوِنشره حمره، اولافته، اوضبط، اوقرار.
ينزرع خليه، فهدها...
فكره بالوجدان تنبع،
ثوره بيها الجوع ع التجويع ثار...
(٢)
... بالرميثه الليل چان انگليزي اللون،
والتفگه علئ اچتاف الِزلِم،
نجمه ناريه ِتِزت ضيها السچچ.
واليشاِمغ، غيمه فجريه حدر فيْ السَعف،
ترعد ابدمها الثواني...
( غُبشه، و يزخ الغضب)
دم اونار
اوثوره اوثار
اوهوسه اتعطُّب بالمگوار...
(غُبشه، ويزخ الغضب.)
اوجرح انثار
اوعيّار اتنخئ ابعيّار
اوشيله اتذِب الجنه اوتركض...
ع الرشاشه اتلم النار...
( غُبشه، ويزخ الغضب)
اوجفن احتار
اودم الگلبه ايرد يندار
اوشمس انباگت من غبشتها،
اوظلت ع الضيْ مرهونه اچفوف الثوار...
( غُبشه، ويشح الغضب.)
اشچَم لويتي
اشچَم هزيتي الهذا اليوم، (١)
وشچَم والد رد متباهي،
اوگلب ابنه اعلئ اعيونه اتهزهز،
شمعه يطفيها اللهب...
(غُبشه، ويطيح الغضب.)
اوچان كل شي، بين عقره والرميثه، (٢)
الگمر، والخوف، واكتار الرشيد،
والجبل، و الماي، و فياي السوير،
والظوالِم، والخبز، والجوع، ودلال المضيف،
والنواعي، والهچع، واللف، والزِناد،
والخناجر، والمناجل، و المراجل، والگصايب، والعِتاد......
يصدح إيقاعه خبب.
....................
اوظلت أيام الرميثه
أيام طف، أيام بصره، أيام صفين...
اووجهعا أيام كوفه
أيام بيها اللي يخاف،
چان ينسئ ابگلبه خوفه
أيام بيها الموت بفياي السعف،
خنجر ايحز ابضيوفه
أيام، حسبالك حزبنه، ابدمها چانت...
توها تتخلْين صفوفه.
(٣)
...، من چان المشي يرگص، و الحچي صوره اوبسامير
رسمناك ابجرحنه ياوطن كل حين
صوره امن الحلم تنشاف ع الطين
اوِعلگنالك مساحينه نيازك، والگصب غابه مزامير
اونحتناك ابضوانه اعلئ الروازين
شمس اخيوطها تنزل بساتين
ياملحك ملح، يا حنظلك حنظل،
ياعش، ياعصافير،
من تبچي... الدمع احنه
امن تچي ابتلحين،
إحنه اعلئ الصدئ منك تلاحين.
يل گلبك مسله، اونبضتك دين
يابيت الشمس، يافيْ، ياتنانير
لو مد الظلام اعلئ الفجر ليله حياطين،
نزحف لك شمس بين الشرايين.
وحگ طبعك، وحگ دمعك، وحگ شمعك،
وحگ الماي وبيوت المناشير،
صَدَّگ يا عراق، أوبيك نحلف
- و الِحلِف دين-...
نسگيه ابدمع لو يعطش التين.
(٤)
...، اولو ظلام الليل - غُبشه-
اتمطئ ع الشباچ غيمه
والَجراد اعلئ السنابل يمشي هيمه
والشناشيل الخُضِر بيها زرياب انتحر ابثاني تقسيم، اوبچئ... ابتالي جرحه ابلال، والكندي
اولو غسل هولاكو سيفه امن العطش
اودجله مايه اندار ع المنبع نعَش
والجثث غابة نخل ينتچي اعلئ الدم سعفها،
اچفوف تتمطئ رصيف يلبس الوحشه ِحداد،
بيه بغداد-الضوه اتمد جرحها، اتمد حزنها ليل جنگيزي
اووجعها اتمده ع الريح العُبَر.
والجماجم ع الرماح غابه حمره،
اتندَّت ابدمها الينِث من علئ اغصون الحديد.
اولو ِثگل بينه النعي،
والدمع بلل توالي الليل والچف والچفافي،
اوعتبة الباب اوترتيل الدَعئ،
اوختمة القرآن والوحشه اوطعم...
بوسه الرايح بعيد.
اولو ِجزَر مد البحر
والشهم خاف الشهامه
والزلم طشها تعبها ...
ع البرد و الريح والدم والمَلامه،
اوراق صفصافه ِنزع فَيهْا العطش.
والضلوع تمشي بيها اطيوف كل خايف نعش
والگلب ندمان لنه...
لسه بيه ذاك النبض.
والوريد اتحنَّط ابدِمه اوتبرئ امن الوريد...
اتظل توالي الناس طفله،
بيها كل الناس تحلم،
بالوطن حر، وبربيع ،
ينفرش فرحه اوخبر...
ابطعمه كل الناس تلتم.
(٥)
انتهئ عصر الخليفه والذهب
وابتدئ عصر الضوه اوعصر الشعب
ابزنجي يفرش لونه ع الظلمه لَهَب(٣)
ابراعي يفرش نايه ِنسمه،
-غُبشه - تغسل من الدنيه التعب.
ابقرمطي - حمداني دربه الناس وسيوفه الغضب (٤)
تحلم ابگلبه السواجي... اتحط سنابل
تحلم ابدِمه الجروح... اتحط حمام
تحلم ابجفنه الليالي...
اتحط بشر روحه تشوف.
....................
اوعلئ احدود الِشبع والجوع
وحدود الفرح والخوف
تتشابچ شمسها اويه الظلام اطيوف بطيوف
يتانيها الفجر كوفه
اويتانيها الظُهر بصره
اويتانيها العصر بحرين،
تتهادئ ابهوادجها ...
علئ ادروب العطش والماي،
كومونة سعف و سيوف.
يتهازج حديها، والحلم بالروح،
غنوه امن الخبز والروح،
بيها الحب صُح، والناس...
چف تلتم عليه اچفوف.
تتهودج شمسها اعلئ الگلب والكوخ،
طواطم بالجزيره اويه الجزيزه اتطوف،
كومونة عرب بيها " الفهود" اصنوف (٥)
اوكومونة سعف بيها المساحي اچفوف
اوكومونة غضب بيها الچفوف اسيوف،
ِتشهَد
تتهِم
تحتج...
" يكاد الفقر أن يكون كفراً." (٦)
تلتم
تنتظم
تنوَج...
"كلماتٍ تعمل واعمالاً تغني"(٧)
ش.س
تعليقات
إرسال تعليق