بيك الساعه اوبيني
بينك الساعه اوبيني
شعر: شاكر السماوي
تك...
/ الساعه بيها اتمرجحت عين الشمس./
تك
تك...
/ گلبي بيه الدگه تتدردغ همس./
تك
تك
تك...
/ جسمي بيَّ اتلولح ايلم الثواني
اسنين تطويني اعلئ كل باچر وآمس./
•••••••••••••
اترن
اترن...
الساعه دگت اتشيع الساعات بينه.
والوكت ينزل علينه
گطره تزحف ع الشبابيچ الحزينه.
والثواني الودعتنه
دگه تتلاشئ اعلئ دمنه
اودگه تتنطر تجينه
حبلئ باللي جاي بينه.
اترن...
اوهزة الرقاص مرجوحة فلك،
يطوي بسنينه علينه
تالي فَينْه ابتالي ضَيْينه.
يطوي بينه السچه والشوف البعيد
اويطوي بينه اشمايجينه امن ال...
الأماني
الأغاني
الهلاهل
البواچي
التهاني
الفواتح
الفضايح
والفرح والخوف بينه.
اويطوي حتي انتظار.
والسكوت اليحچي كل ما بينه النه،
ايعيدنه بينه صدئ
يبتدينه من جديد
اونبتدي بيه و نعيد.
اترن...
اوتالي كل دگه تروح،
بين هسه اوبين باچرنه،
اوتسوح...
رايه للموت اليچودر بالضماير
واسطوانة ماي تكبر
بالدواير صوت حاير،
يطوي بايقاعه المصاير
وي صدئ الماي الينوح
الماي ِحلْمه
الِحلْمه نجمه
النجمه دمعه
الدمعه شمعه
الشمعه شمسه
الشمسه لمسه
اللمسه همسه
الهمسه خمره
الخمره جمره
الجمره حلمه
الحلمه ماي...
الماي آنه، الماي انت
لو صدح بينه الزمان
اوراح يطوينه علئ اسنينه مصاير.
اترن...
والصدئ الشادر بعيد،
ليل بيه ارمادي ورمادك ضباب،
دمنه بيه اطيوف تسبح بالسراب
والعُطش بيها يدوَّر عن شمس ضَيْها يوجْنه
افلاك بيها الكون داير.
اترن...
هذا حس الگاع من يعبر علينه
اسنين تنسجنه دقايق.
هذا حسنه الضاع بينه:
افكار تمشينه حلم ينبع حقايق،
انت بيها صوره تمحيك اعلئ حدي
آنه بيها صوره تمحينيا اعلئ حدك
والأثر بينه يطول...
ابكل أثر يمكن يجينه،
ابكل صدئ ايردد سنينه:
- الراح جاي ابكل يجي
واليجي زايل مثلنه باليزول
واليزول، عمره بالباچر يطول
واليطول، اشما يطول...
باليجي باچر يزول.
اترن...
وآنه وانت ابكل جنون،
نصدح ابتالي الظنون
آيه تمحينه اوتخطينه...
ع الصخر
والغيم
والدم
والنجوم
والليالي، والبحر، والريح،
وإيقاع الغصون:
شوف بالوجدان يشمِس
ابرفة اجناح الحمامه،
اللي يزيح من علئ العالم ظلامه.
اترن...
والصدئ امن أمسك يجيك
ابنادم ابروحه يجيك
طيف يأخذ منك اومنه الضمير.
والصدئ الباچر يروحك باليجيك
ابنادم ايدوَّر مصيره
اومادرئ ابروحه المصير.
والصدئ الهسَّه يدوْرك
باليروحك واليجيك،
ابنادم ايظل ابمصيره : اجناح من ينگص يطير.
اترن...
الساعه تطويك، اوصداها
ايصحّي حلمك ،
لوهُ بعده ابجفنك ابكل ليله غافي.
الساعه تبديك، اومداها
ايصحي بيك الليل والشوگ البعيد
اوذاكرات السوط والشوف الجديد
اوساهرات الخوف والشك اليزيد.
اوبيَّ صحوك يجيني
صحوه مثل الكون تمتد بيَّ ودروبي تحير
بين شوفي اوبين مابيَّ يصير.
والگئ بيَّ اشما أصير:
الحيره
والغيره
ودروب البصيره
والفكره التظل بيَّ أسيره
والخيانه
والأمانه
والغافي ابزمانه
والرگصه العلئ خُصر اسطوانه.
والعباده
والسعاده
والنخوه ابإراده
والهمس والليل بأسرار الوساده
اورعشه البرد العلئ دمك توجْني،
لوهُ دمي لِسَّه بعده ابدمي دافي
اولوهُ دمك لسه بعده ينتظر شوگي يوافي.
اترن...
الساعه تبديك، اوتزيدك
احلام بالدنيه تعيدك،
بالدفاتر
والستاير
والمناير
والقلم
والسيف
وإيقاع الصراع ابحَد قيودك.
الساعه تنهيك، اوتعيدك
ماضي يدفن كل جديدك،
بالشفايف
والچراچف
والعواطف
والعواصف
والتراشف
والهمس والشوگ والحلم اليعيدك.
الساعه تحديك ابنشيدك
البيه تسمعني وأشوفك
ضَيْ نبوه اعلئ الجفون
ينده اعيوني وأكون
روح حلمانه تطوف
بين نبضي اوبين نبضك:
حس نبي ِجفنه يحوم
بين دمعي اوبين دمعك...
آيه ِتضْويني وجود ابكل وجود.
اترن...
تصّحيك ابصداها،
الينده ابدمك مداها:
- إصحئ إصحئ،
إصحئ هسه آنه بديت
إصحئ هسآني ترآني
ابتالي ومضاتك ضويت .
إصحئ إصحئ
إصحئ هسه راح يبديك الصحو
ساعه تتمرجح علئ اخيوط الشمس
دگه تتدردغ علئ دمك همس
روح تتلولح علئ موتك ِعرِس
إصحئ إصحئ
إصحئ حتى بيك نصحئ
لحظه تمشينه عُمُر بالنبض بينه تحوچ...
بينه باچر
بينه هسه
بينه امس
إصحئ، بيَّ أوبيك، هالات الزمن
تمشي سورة كون بينه
تعلگ الدنيه شمس.
تك تروحك
تك تجيك
تك تظلَّك
تك توجَّك نور صافي
بيه إيقاع التصافي
من يجيس اسرار روحك
تعتلگ كلَّك قوافي.
بغداد
1973-12-31
ش.س
تعليقات
إرسال تعليق