شهيد الحلم

شهيد الحلم
            شعر: شاكر السماوي

الئ شهيد الحلم الأكرم،
      صديقي في الجُرح و الدمع و التوق و الموقف ... العلاّق حسين.

تحيرَّت ... الجروح اكثار
          بيمَن آبتدي؟
            بيمَن آنتهي؟
             اوچابيش احچي؟...
               و الحچي بالروح ساكت...
                    و الگلب خطّار!
تحيَّرت ... الليالي اطوال
        لا لَمهِن سهر
        لا لَمهِن قهر
           ولا بيهن لگئ العيّار،
              علئ اچتافه بدل نشابهن قيثار!
تحيَّرت ... السكوت اجروح
    واحباب الوكت والروح،
       بفلاك الليالي اعلئ الليالي اتنوح،
           بالدم و الحلم و الشوف، وتروح....
           نزِف ع الروج، يحچي لليجي بشراع:
- إهناك، گبل جيتك،
       اندفن بالريح بحّار.
                 •••••••••••••••••••••••••••••
(قَالَ لي مرةً:
   - خطأيَ الوحيد
     هو أنني لا أستطيعُ السكوتَ عن الخطأ.)
               ••••••••••••••••••••••••••••••
اوتحيَّرت!...
      تحيَّرت ابوگفتي وياك ... وإنتَ اهناك،
اومِن گلبي يجيبك بالگلب ِتذكار، واسرار، اوطعم غيّاب،
اهجِس بيك يمَي،
     اومن اشوفك زين ...
                 تغيب ...
                   اوخاطري بالعين ...
                        يظل اسراب بسراب.
واسكت...
     وانتچي بالروح والناس...
          صداقه
          اودمعتين
          اوصفنتين
          اوياس ...
              والناس،
                 تآخذنه ابضواها نشوتين ابكاس،
نرشفها، والعمر وسواس يحتار
وحنه ابحيرته من حيرته نحتار...
إيقاع الشهاده والحلم والثار،
      والناس اِلتعدْل الناس...
                 لو صدفه الوكت يندار.
تحيرَّت، اويَلَن كل يوم،
    احسَّك بالگلب خطّار
    واحس الباب تنفك من ِتدكها، أوبيك،
         آحس روحي ابحزنها اتگوم وتحوم،
        بالرغبات و الحسبات...
       جنح شال الجروح اعلئ الجروح اوطار.
وآحس حتئ الخلاف ادروب، والصفنات
       تسطع بالظنون إشعار،
        تآخذنه ابضواها للهموم اهموم
        اوتآخذنه اعلئ درب الشوف والخوف،
                   ِمهماز اوخناجر...
                       والشهم بالنار هَمْ نار.
( قالت لهٰ الأُمُّ البهية:
      - لقد كُنتَ لي في كلَّ يومٍ مَخاض.
أجابها بامتعاض:
      - لا تجزعي،
        فالُحرُّ يُصقلُ في شهادةٍ
            أو موقفٍ
            أو فكرةٍ، أو...
                كرامةٍ و اعتراض.)
          •••••••••••••••••••••••••••••
بيه الگيك ...
    مثل طعم السفر والبار
    اومثل طعم السوالف والصِدِگ والناس
اوشوفك - من اشوفك بيك -
    حيره اعلئ العمر تنشاف
    اوحيره اعلئ الحزن تنضاف
    اوحيره اعلئ الضمير اتحير وتخاف...
             لا يصدي الصِدِگ، والشوف،
                لا فَد يوم يعبر ع الضوه منشار.
اومثل طعم الحلم
      - والحلم بالروح تفسير -
اشوفك شوف،
        بالسكته الجريحه والغضب والخوف.
واشوف الموت يسري بيك، ليل اطول من لياليك.
واشوفك ساعة التوديع،
     حچي امگابر يحده الموت...
          والموت اعلئ حده ايضيع.
اودمع ِعشاگ - بين الشوگ والهجران -...
                              يخجل يشتري ويبيع.
اوصبر محزون بعيون، تخاف الموت وتخاف...
             علئ ابنادم هذاك البيك،
                    تريده ايعيش بالنسيان تذكار،
يمشي ابكل زمن جاي:
     افكار، اوعِبَر، واسرار،
     تجيبك طيب،
         وطيوف اعلئ حد العين و تغيب .
اوتجيبك ليل، وشموع، اوسهر، وجروح،
        تصفن بالوجع و تفِز...
                      روجه اعلئ الشراع اتصيح:
- ِهدْ روحك سفر، دنياك...
       تصفِن من تهيد الريح.
ِهدْ روحك حلم، ينخاك...
       تبقئ له ضوه ابكل نار.
ِهدْ روحك شمس، تلگاك...
       صَح الكل وكت معيار.
       •••••••••••••••••••••••••••
( قَالَ له المحاور:
      - إنك رومانسي لحدَّ اللعنةْ.
أجابَهُ:
      - لأن الأيامَ قاسية لحدَّ الطعنةْ. )

بغداد
1979-01-24
ش.س

   
-