لا

لا....
شاكر السماوي

لا للذَّل
اولا للجوع
اولا للفاشيه ابكل نوع
واهلاً أهلاً بالحريه     و بكل رايه اتظل ثوريه.
•
لا للسوط
اولا للخوف
اولا للشوف ابنص الشوف
واهلاً بالفكره المَفديه     و النيه اللي اتصفّي النيه
•
لا للخاين
لا للمُرتد
اولا للخطوه اللي تتردد
واهلاً بالوجدان اليرفُض    اوبالكلمه اللي اتِحب و تحرُّض.
•
لا للصبر الظّل ابصبره
اولا للحرف المات ابحبره
واهلاً بالروح اللي اختارت
         اوبالدم والحگ للحگ ثارت.
•
لا للثوري اللي يتدجّن
اولا للثوره اللي تتهجّن
واهلاً باللي ايسابُگ عصره
        اوبالنصر اللي يُعبُر نصره.
•
لا للشوفينية العادت
كل انسان اوبالدم سادات
واهلاً بالأُمه الإنسانيه
      اوبالفكر اليعلي ابإنسانه.
•
لا للفرد الحاكم بآمره
ولا للحزب الينكر عصره
واهلاً بالسلطه الشعبيه
           اوبالشعب اليبني ابحريه.
                          ش.س