سفانه

سَفّانه
••••••••
لقد جُنَّ شوقُ الشاطيءِ الثاني.

سفّانه سيروا اعلئ النجِم...
نجِم الحِلِم
والليل لو طفى الشمس،
روح الشمس...
تخلق الف نجمه اونجم.
سفّانه شگوه ابعزم روج السگم،
والريح ثِلْموها ثَلِم.
مو بالصبر ...
بشراع من عقل الزَّلِم
مو بالحبر...
بزنود مرديها العزم...
سفّانه سيروا اعلئ النجم.
••••••••••••••••••••••
سفّانه خلّوه الأمل،
يزْهي اويلِم ...
دَلاّلي وگلوب اخوتي.
إهنا تعشعش رجوتي
اهنا تخضر شمعتي
اهنا تهلهل رايتي
چم مره گالت دمعتي:
- عيب الدمع ينسئ الدمع.
والحَسره خلّوها شمع
يچوي اويشع.
تتشافئ بيه كَسْرَة ضلع
ويشيل راسه المِنهضِم،
سفّانه سيروا اعلئ النجَّم.
•••••••••••••••••••••••••
سفّانه:
چَم مره ِحمَل صاري الأمل ...
خَفگه اوجزر ...
بس ماِخذِل؟!
يحيا الأمل مهما ذِبَل،
بس كونه ِهرشه ابنخوتي
آنخوتي، ابحيل اخوتي ...
شگي البحر
شگي الصخر
شگي الدهر ...
شگي لَعِد بوري نهر،
يروي الحِلِم ....
سفّانه سيروا اعلئ النجم.

ديوانيه
1965-08-10
ش.س🌹