الرجل
الرجل
شعر: شاكر السماوي
أبو گاطع
أيها الرجل
لروحك هذه الإشارات الروحية ،
التي طمحتْ أن تسمو بالشعر سمو الشعور.
حِچئ، اوحَچيه تطرّز بالصراحه
اوسكت، والروح بعيونه مَناحه،
تطوف الناس بيها ادموع موشومه ابجراحه،
التجي بيها الضحايا اعيون،
تنعئ ...
والدموع ...
اتزيد بالعاشگ نواحه.
اوحُچئ الآجل الوطن
او لآجل ذاك الزمن،
حِچئ روحه الرجل،
والگاع...
أعلئ ترتيلة سواليفه تُمُر ع الگاع،
نواعي امن النواعي اتجيب:
هلاهِل من تجيك اتشوف
راياته اوسلاحه.
••••••••••••••
( الوطن، يَبْن الوطن، ينداس بالعار
وچفوف الخيانه و الغدر ع الروح تندار
لَچَن نعرف وطن - مثلك -
ع السياده ايغار
من باعه الخليفه، الدار
مشت تحمي ابجثثها عتبة الدار.)
----------•---------
ِحچئ ابحَچي الصدگ
والناس
وأحلامه
اوصُباحه
اوسِكَت، والناس بحروفه ِصداحه،
اليدگ باب الضماير بالضماير ذيچ،
يصحّيها...
اويرِد ذاك الصِدِگ بيها
اويرد بيها المراِجل ذيچ،
مواكب ثار بيها اتشوف:
الجِدَم بالموت،
والچف ابسلاحه.
اوحِزَن لآجلي
اوحِزَن لآجلك
اوحِزَن لآجل الصِدِگ
اولآجل ذاك العِشِگ
ِحزَن گلبه الرجل،
والناس...
اعلئ ترتيلة سواليفه تُمُر بالناس،
شعب لو طفّوا اشموعه
يظل يضْوي علئ ادروبه ابجراحه .
••••••••••••••••••••
( الشعب، يَبْن الشعب، بالسوط يندار
والدم و المشانق والظلام ...
اعلئ الضمير أسوار،
شيّدها العميل
اومادرئ ابكل روح چم ثار،
يتنطّر،
- والزمن دوّار -
فَد ساعة صفر بچفوف ثوار.)
---------•---------
اوحِچئ ابحچي الحلم
والشوف
والشعب اوسلاحه.
اوسكت، و النور يغسل كل جراحه،
التظَل بينه:
دمع لآجل التفگ يصدح
اومع لآجل الدمع يجرح
اودمع لآجله شرَد بالروح،
يخاف العين تحچيه ابصراحه.
اوغُضَب لآجلي
اوغُضَب لآجلك
اوغُضَب لآجل الشعب
اولآجل ذاك التعب،
غُضَب حرفه الرجل
وحنه...
اعلئ ترتيلة سواليفه ِنرِد بالثار،
مشاعل ع الدروب اتفوت،
تُخط ع الموت والظَلمه صُباحه.
( الحزب، يَبْن الحزب، ينشاف بالنار،
خلايا اومفرزه وايام تندار،
علئ الجلاد ذاك الما ِشبَع من عار
ثوره اتمِد فجرها انصار...
من هامة جبلها الجِدْم الأهوار.)
ش.س
تعليقات
إرسال تعليق