قسم الفارس
قســـــــــم الفــــــــــــــــارس
دفنته اوجيت
كبل ماكاع بيتي اتكوم تطردني او تعوف البيت
دفنته اوجيت
ماخليت جفني ايحير وين ايلوذ لوجاه الخبر ذليت
دفنته اوجيت
وحك ضي الجدي البيه يانبي اتوضيت
دفنته اكرب سيفي اوجفنيته ابدم
وجيا آدهم
يشك الريح بعنانه اويعت كبل الفجر فجره
اويشك سجه ابسواد الليل
كل فارس عليها ايفوت من تظلم
تراني اليطبك الحدين بجفوفه
لسوي كل عصر غبشه وارد انجوم متفلشه
يسيفي سيف حك اوثار كل غاشم عليه يرهم
وله عادات من ينام ابغير اركان مايحلم
عزرايين اهواللي ايشوف كل الناس
اومامش عين بيها انشاف
وحك اتراب سومر كعبة العراف
لشك الكاع وخلي افيض نبعج أور
مثل مافاض من نفر
مثل مافاض من بابل
مثل مافاض من آشور
أريده ايفيض
نافورة شمس والكون يفترع الضوه ناعور
وتنومس
واشيل اجفان ذيج الناس بيدي اشراع يطوي الروج
ويجيب الشواطي اتفوج لانواره اوتظل اتطوف باكتاره
تعانك دفته وتزور وتخلي البياضه انذور
وتشايم .....واشوف اهناك...غاد ...اهناك
ذيج اعيون موتانه ابسمانه انجوم
تفترع الكواين من يشح النور
وهاي اكبور وادمنه اعلى جلد الكاع
وشم دكها الزمان اعلى الزمان ابدور
لهسه اتشع ...فناير تنده التايه
اوكيعاني؟ يكيعاني جرف تاريخ
بركعها السعف وعظام ظلت ع الجرف ناطور
ابحرت منها منايرنه سفن خضره
تشك ابحور من سابع سما للكاع ممدوده
وحك دمعة طفلنه الشربت اخدوده
لآجيبن له اعلى كد ادموع جفنه اركاب من اعداي
متحلف تراني اوجيت متحلف لسوي اضلوع كل عداي
سواجي اتفيض دم وتفيض من هول الصواب اصواب
تسكي اخدود عطشانات ذبلانات
اضحن من سنين البور حفنه اتراب
تبشر ياطفلنه جاك دمك شايل ابشاره هلهوله اوحلم وحروز
وحك غيمة سعفنه التمطر ابتموز
اجيت انه رعيد ايفوت شايل بالضوه ديمه
اجيت انه اشك الحوت واصيحن بالشواطي صوت
يونس موثكل ضيمه
يبحر المايريد ايموت هذا آنه مضيف الجاع
هذا آنه درب للضاع
هذا آنه الأطش الروح
ملح للسعفات للصفصاف للياس الذبل مهضوم
تراني الكل طفل محروم صوغه اوعيد
لصوغن من بيابي العين للفانوس شيشه اتلملم انواره
هذا آنه ألف جاره
وحك ماي الفرات الماحوى اكتاره
لاكت اعلى العدو فالات واعلك للشمت عارات تتشفن اوتكله
شوف موكل من تفيض ادماه حسبالك نشف لومات
سيف آنه ابثلاثه احدود دبيه موت حد قداح حد يلمض
اودرعي الموت كلي الموت بيه الموت هم ايمض؟
هذا آنه الحيا والموت
هذا آنه السما والكاع وجماله ريح آنه ايعبر والكاع
كلها اجسور وين ايروح تبراله
سجج تمشي حدر جدمه وتغوص اوتصعد ابسا
وحك ازلوف ماشمها المحب لساع
جبت لك ياعشك كله من هالة سما ابقصناع كمريه
وهلال العصر معلوك شمعة ليل فضيه
تشد اكلوب ويشد الترف ترفه
اوتطوف اجفوف عاشك شال جرحه
اوشوك يسبح والزلف جرفه
نذر لطي السرج صبحه.....الك يل طوكت سمره
وحك الحنه والسدره
وحك كل عين منتظره
وحكك ياثدي الحره
بجروحي لآشل اجروح كل صابر خلص صبره
وكل للطيف كون ايكون حين ابحين
وحك هامة علي المادنك ابصفين
لاسجن ع السنين اسنين
خضره اتشيل راسي اوراس
كل نشمي شتل كلبه ابهذاك الطين
ش .س
تعليقات
إرسال تعليق