تمثال الشمع

تمثال الشمع
شعر: شاكر السماوي🌹

غاد
اهناك
بطرف السمه و الگاع
لا طير يخفگ له ابسمه، لاورد يحلم له ابجفن، لا صوت يخطر له بهوئ، لا سچه تتباهئ ابياس،
       ولا خَطفة اخيال الناس.
ابغاد هناك،
بس رجفة اخيال الشمس، تزحف علئ اتراب الثلج،
       تزحف علئ اسراب الناس.

اولو ثبحت اجفونك علئ غاد اهناك،
يتمطئ بعيونك شبح...
بالريح، بالوحشه، اندفن
يتلالئ بظنونك شبح...
لف روحه بالسكته اوصفن
اولوصَّلك ِجدمك علئ جرف الشوف
يتراوئ كل ذاك الشبح...
    تمثال
    تمثال لبنادم شمع
    شابخ علئ روجة ثلج
    دمه شمع
    جلده شمع
    اوجدمه علئ السچه گبر
    وذراعه فاله امصوبه الصدر اليُمُر.

وهنا - علئ اخيوط السچچ - تتشاور اعيون الزلم:
- عوفونه من غاد اهناك!
عوفونه، ما بينه بعد، رجفه اودمع
وهناك - و الحايط ِستِر - تتهامس الناس ابخبر:
....... و اليخطف اوعينه تمر بعيون تمثال الشمع تشهگ اجفونه اوتنشنط. و تصير كل عينه شمع و الأم توصيه للطفل:
-... اوبالك تمر، يم ذاك تمثال الشمع!!
هذا اليبوگ امن الجفن كل رفه و يبوگ الدمع بالك تمر!
لا يبتسم لك من تمر
لا عنده لچفوفك عطر
لا يم مرجوحه و لا لعبه اوسواليف اوِنذر
                                           بالك تمر!
و تحَّير بجفنه الطفل:
(- ليش العگد بولايته مابيه لعب؟!)
وتنهدت بين الهواجس و الصبر:
- جدك يسولف بالزغر
اجوريد سواله درع، كافور و رماد الدمع
-هم جدي چان ايخاف من .........
-وكالو اعليه،
يتعافئ من زود البرد
والنور ما يرِكد علئ اعيونه و لا لون الورد
-آ.. ماما همين الورد منه يخا......
-اوكالو ابعد،
اشما هبت الريح ابعزم
ماهزهزت ِردنه و لا نفضت عن اذياله ثلج!
- الريح؟!
و الريح هم أتخاف من ذاك ال.....
     - الريح تزلگ من تمر فوگ الثلج!!

                      -٢-
نيسان شگ جلد الشته، برعم دُفر
شايل فجر
شايل عطر
شايل علئ اچتافه الخضر، حفنة صحو
اوتمثال امس، متدوهن ابگاعه المشت ويه الثلج
اوصار الطفل نيسان بعشوش العشگ:
     - انتِ الحبيبه البيچ واعدني الدُفو
     - و إنتَ گبل نيسان بجفوني صحو،
بس، بس الشمع تمثاله ليل اعله الدمع
     (دب الدُفو ابجلد الثلج...
                            ماع الثلج)
- نيسان يمسح كل ثلج
وحنه النظل بين الشته اوبين الشمع هالة ثلج.
(طاف الدُفو ابدم الثلج.....
                       ساح الثلج)
- لاچن هواجس بالگلب،
يمكن ترد گاع الثلج.
يمكن علئ اسرابه نوج
يمكن بعد.....
(فاض الدُفو ابگلب الثلج...
                        غاص الثلج،
سچة ادموع اتلالت ابجلد الثرئ
اوبيها اوعلئ اسراب الثلج،
تمثال امس...
           يهبط
            اويهبط
             اويهبط
و الثلج، عافه ابشمس
تطويه بخياله، اوعلئ سرج الهوئ....)
- شوفيه تمثال الشمع،
             شابخ ذليل اعله الندئ!
      ثاري الشمع يصبح ذليل ابلا ثلج؟!!

                     -٣-
اوتطوي الميالات الدهر، و الشهر يعبر عالشهر
و الگيض دگ باب السمه ، فكها اوعلئ الدنيه خُطر
        جايب شبابيچ الگمر
         جايب عوافي الكل نهر
           اوجاب النه تموزه قَهَر

اولمن شبگ تموز گيعان البشر،
        فاض علئ چاليها الضوه
        و الحَر تشلبه اعلئ الهوئ
اوذاب الشمع
ذاب اوفحط تمثال امس، و تلاگفه روج الشمس
ذوَّب اچفوفه اوهامته
اوچفن اخياله ابجثته
       و تگنطرت كل جثته
چيحة شمع،
      داير مداير ِعتبته

و يمر طفل ذيچ السوالف - طفلته، تعبر علئ اخياله عطر يلگئ علئ اچتاف الدرب....
                    هيكل بشر
                    من سيم زنجاره دمع
                    شاچخ وسط چيحة شمع
و الگاع بجناح السمه، جنات تفتر عالنبع
والناس - من فيض الفرح - ريش ايتهادئ اعله الضوه و اطفالهم غيمة حلم ، تمطر علئ النسمه ضحك و المحب بشر كل محب:
      -مامش بعد فاله اوثلج!
والجنح بشَّر كل جنح:
      -مامش بعد فاله اوثلج!
والورد بشَّر كل ورد
      - مامش بعد فاله اوثلج!
و الطفله خوفه اتنشدت:
       - بابا، صدگ
         هالسيم، ابوه -يگلون- بواگ الدمع؟!
        - اي بابا
          كل مره شته،
يطلع علئ درب الثلج، تمثال بواگ الدمع
اولمن يجي الگيض اويشر ضَّيه علئ اخيوط العمر،
تموز، بچفوف الشمس، يمسح شبابيچ السمه
و يطش صحو
ويطش لهب
ويطش علئ النخله ذهب
ويطش چفافي اعله الگصب
وتطگ علئ اضفاف الدرب
         مليون هلهولة عرس
و تراب ديرتنه علئ اكناره يسچ ياس أورد ،
            فرحانه خطاره الشمس.
ش.س