الكمر مسلول

الگمر مسلول
شاكر السماوي
ش.س🌹

الگمر مسلول...
غاب ابصُفره اعيونه،
شرب دخان ساعاته،
اوسَعَل دخان ساعاته،
يچِل اوتلهَث الگمره...
اوتكحّٓل صُفرته ابصُفره.

الگمر مسلول...
يتوچْئ اعلئ چَتف الليل...
ينِز، يتعثَّر اخياله ابسراب الغيم.
يطِگ و هواس بعيونه ايتراواله:
الغيمه اتبرگع الفاله!

الگُمر مسلول...
مِتدوهِن، يدولِب بيه
فلك، مِتسودِن ابحيَله،
حُفَر ريته، اوگطَع منه الوَريد، اوكَتْ...
دم فضي، اورُماد الدم
يسبح بالسّٓمه و يحُط
علئ اچتاف النخل و الشَّط
وعيون البشر و الطين.
تدوخ اميالة الساعه
تِتيّٓه: چاتفوت امنين؟
تِجِن، ترگص رگصة موتة التلحين.
..................
توّٓن الريح، وبوجْه النيامى اتصيح:
-الگُمر مسلول.
تِدِك بيبان الولايه، اوتهِز الكوخ:
-الگُمر مسلول.
ِتِشك الگاع، و تحشّٓم الِچفَن و تنوح:
-الگُمر مسلول.
ِشهگت ِعتبة الديوان،
و الشّٓباچ شگ زيجه اوصُفگ بيده:
-الگُمر مسلول؟!
السَّعف يلطُم، يخُض الريح:
-ِصِدك؟ ِشتگول؟
ِمن گال الگُمر مسلول؟
يغوص الصوت بهروشه، يصيحها ...
اوينشّٓف كل ملح بيها.
والبيدَر چفئ الدله،
اوِحرَگ چَف الِعشيره اوطاف...
نكَّس كل ِمساحيها.
و الصُفصاف ع الجَرفين
شَگ قبره، اوسِمعته اينوح،
ينعئ ابكل نواعي الروح:
-كل شيء امحسّٓبينه  اوما    حَسّٓبنه الضوه يذْبَل.
كل شيء امحسّٓبينه اوما    حَسَّبنه الگُمر ينسَل.
عَسَن ِسلَّك يسِل السل      عَسَنه النَّزِلك ينزِل.
عَسَّنه ابلا سمه ابلا گاع      عَسَنه بيه الفَلك يختل.
الگُمر مسلول يا شاطي....
الگُمر مسلول!
................
ِبچَتَ حتئ السّٓمه، ابلا صوت تَنحَب، و النجوم ادموع
ِتتلالئ ابجفون الليل، ِتترجرَج،
ِتشچيها الظنون، اوتزِرگ النجمه اعلئ وجه الليل...
چَن چيلة عَراضه اتفوت
و الهوسه ابحلِگها تموت.
و هناك، اعلئ نصُ الباب
طفل يلتاع، ِمستاِحش، يحاچي امه:
-بعد ماِمش ِلِعب بالليل؟
بعد مِش سطح يسهَر؟
اويرد ِجفنه ِكسير الخاِطر، امندّئ...
اويگل لاْمه:
-چاوين الگُمر ينباع؟
ما ِمش فَد گُمر ع الگاع؟
خَل يمه ِنِذر طارش
يجينه النه اويجينه ابساع،
خَل يمه ِنذِر طارش!
ِيطگ الغيم من يسمع حچاياته
ِيطگ اوينتحر بالطين، يدفن ضيم گطراته.
چاِشله اببگاية الروح...
مادام الگُمر مسلول، و النجمات تتزارگ،  و چماله الشمس شابت!!
..........................
يطوف الضيم، ضيم اصفر، يشتل فوگ هام الناس...
صُبير اوضحچ شاِمت،
صُبير اوصلاة ادموع.
و العشاگ: ماچَن الگُمر مسلول
كل من يختل ابليله، يدوّٓر بالرفوف اشموع!
و التيجان، ماهمها الگُمر مسلول
يلن التاج مو من ضَي گُمر مصنوع!!
اسهير الليل طار امعبعب الفرحه، يلن فجره العصر، و النوب..
ماِمش نور بخيوطه يشد جنحه.
زف ياليل بُشرئ اوفَرّٓح البهلول.
بشر كل بحر، صنطه شرب ميه،
-الگُمر مسلول، ِهنيال الحَراميه!.......
ش.س🌹