تقاسيم للدنيا التجي

تقاسيم للدنيه التجي
__________________^^^

همسوا العشاگ بخيوط الچفافي
همسوا العشاگ همسه،
      بيها چان الليل يضوي
     والسواجي ِتسرح اعلئ الگاع گمره
     والنبع بالماي يمشي....
          مشيه السحر ابتورايخ القوافي.
(- يانبع صافي ابضواك
   ليش شالت شفتك كل العطش،
   اوليش ِتذبل بالسواجي،
   اوجرفك ايخضَّر فجر،
         بيه ضوه اعيونك غٰبَش؟
مايي دودة قز، جنحها..
      يفرش الموت ابحريره
اوجرفي بدروب النهار،
روجه تفرش شطها الأخضر..
              جنه برماد الجزيره.)

گالوا العشاگ بشموع الهواجس
گالوا العشاگ ِكلمه،
      بيها چان النور يگصَر
      والمعاني بالمعاني اظنون تخدَر
     والحروف اعلئ الحروف اطيوف تفتر
                            شوف بالمجهول يعثر.
(- شنهو يملي يا ضوه نبعك صلاه؟
   فرحه؟
   سفره؟
   فكره
        لو ومضة إله؟
-الفرحه ورده امن العذاب ابكل صلاه
السفره جَنه اعلئ الضباب ابكل صلاه
الفكره ماي اويه السراب ابكل صلاه
والضوه رعشه إله بين كل آيه اوصلاه.)
ِنشدوا العشاگ بعيون الشعر
ِنشدوا العشاگ ِنشده،
      بيها چان الشوف يحلم
      والكلام ايلملم اخياله اوبالمعاني البيه يلتم.
(- يا شعرنه
  يلّي ِتزِهر بالجروح اوبالچفافي
  گلي : گلبك چم ربيع ايفيض،
         لو صارت شجر كل القوافي ؟
- بيَّ منكم، من لياليكم، ربيع ابلايه حين
  اوبيَّ من حلمي اوحلمكم اشموس خضره،
                              اتطرز الدم وردتين،
اگرنفله شفه يضوَيها الحنين
         اوجُنبذه حلمه، صعمها،
         ينْدئ ع الشفه تناسق رعشتين.)
غنوا العشاگ بسراب الفِكِر
غنوا العشاگ ِغنوه،
      بيها چان الليل يعفئ
     والچفافي ناس تصفئ
     والحلم هالة ظنون،
              بيه نضوي اوبيها نطفئ
(- ياحلم،
    بيه نُمر اوما نُمر،
       من هوْ جابك ع الشعر؟
          اومِن هوْ حطك بين ضيَّك والحبر؟
- حطني في الأغنيه ابضيكم شعِر
   حطني حس الذاكره ابدمكم سحِر
   حطني ضيْ العاطفه ابهمكم فكِر
         بيه عمركم..
ضيْ رفيف إجناح فراشه گصَر بيها العمر.)

شاكر السماوي