انسجام ذاتي

إنسجام ذاتي

عوَّدت روحي اوگِلِت: العاده شر اوخير،
عند الحچي اويه النفس، اوعند الحچي اويه الغير.
ما اگدر اگولن لا ...
وبروحي اهجس نعم.
ولا اگدر اگولن نعم ...
وبدمي تنبض لا.
أغلط، اوياما الغلط تيهني بالماريد
واصحئ اعلئ نفسي اوأرد مذنب اومو بالإيد.
وارضئ ابضميري الرضئ عني اوحماني ابخجل،
اوما خلّئ بيَّ الذنب يجترني وآجتر ندم.
اوعلمني هذا الگلب من حكمة الإنسان:
من انت تگدر تظل مثل انت بالوجدان
أشرف رساله اتصير بيك اوتشيم الناس.
والصدگ أطهر وضو تتوضئ بيه للصلاه.
اومن دنيتي اتعلَّمت أفضل اوأنبل مثل،
أهتدي بيه اويظل وياي خطوه اودرب:
النعم حين النعم نعمه تسر الگلب
والنعم باللا ظلم تاليته ِذل اوعَدم.

لا لا تصير اثنين يبنادم اوتحتار
واعلم يقين العلم:
النار محَّد ِگدَر بيها يطفّي نار!
أوسر السعاده انشتل بالتمتلي ذاته،
ابصدگ، اواصاله، اوحلم، اوحِس اعتلئ اوعلاّه.

ش.س