قصيدة فارس جنوباوي
قصيدة فارس جنوباوي تنشر لأول مرة كاملة
فارس جنوباوي
إلك، للطيف، لبنادم جديد
شعر: شاكر السماوي
چانت الدنيه العتيگه، تنزع الدم و الجرح
چانت الدنيه الجديده، تلبس الدم و الجرح
اوچانت الچيلات ترسم كوبه سچه الكل صبح.
•••••••••••••••••••••
چانت الساعه صفر
چانت السچه جِدم
چانت الگصبه عَلَم
اوهلهل الشّٓباچ والدم والحرف،
اوروجه خضره دارت اودار الجرف.
چيله راحت
چيله ردت
چيله طلگت
چيله عكرت
اوچيله عميه طشَّت الظلمه ابضواك.
••••••••••••••••••••••••••••••••••
ردت الساعه ابصفرها
ردت السچه ابجدمها
ردت الگصبه ابعلَمها
اوردت اسروجك فواتح
اورد يتيم الُمهر الأسود ابجثه تحلم بالحبيبه اوبالشمس
اوشبحت الدنيه ابفلكها،
عين ميت دفنت الوادم بعيد....
(- هذا نيشانچ يدنيه،
سيف، شمعه، ورده حمره،
اوراس ينزف لسه بچفوف الشمر!)
اوصوَّت البوم ابسماه:
- الجثه تكبر من تنام!
الجثه تكبر من تنام!
الجثه تكبر من تنام!
اوخجلت السكته ابذنبها
اوكفرت الچلمه ابكتبها
ونِكست گاعك گصبها
اونگرة الحافر نشيد
اوصورة الحافر دواير، ترسم ابنادم جديد
اوهزة ارچابك تراچي، اتمرجح الدنيه سؤال :
- وين رايح،
يامُهر اسود تشيل،
سيف، والفارس چتيل؟
••••••••••••••••••••••••••
مغرب اسود
اونجمه حمره ابطارف الدنيه بچت
اوگذله شگره، دفنت امراية عشگها،
والهمس بيها سكت.
مغرب اسود
لبسته انجومك ِحداد ، يحچي للوادم حزنها،
اويرسم الدم شهرزاد
والدموع، اتناثرت بيها النواعي
والچفوف، اتغصَّنت بيها الدواعي
والجرايد، خرسه يَم اسمك تصير
والهمس بالبار والگهوه الزغيره،
يمشي خوفين اوضمير
مغرب اسود
اوجثه عالمسحاه يغسلها الضباب
اوفاله رگطه، اتعلَك الفانوس ترچيه سراب
والسواجي، ينده ابأورك عطشها،
ياعدنها ابكل تراب
اوحيه تنعى
اوذيب يرعى
اوچيله تنشِد عالصُواب.
مغرب اسود
والشواطي چودر الحجاج بيها اسيوف تركض بالجثث
والذياب، اعيون تزحف بالشوارع،
تلحگ الدم عالجرح
والدروب، وحشه بيها البوم صَّوت،
عاليروح اوعاليرد:
- اتموت گبل الموت لو شافك ِنشِد!
اتموت گبل الموت لو شافك ِنشِد!
اتموت گبل الموت لو شافك ِنشِد!
اولملمت حدها الفلاه
والمطر رد السماه
اوتاه المغني ابغناه
اونگرة الحافر قصيده
اوصورة الحافر بيان، يفرش الچلمه جريده
مغرب اسود
وام تشيل التربه گمره ابكل صلاه
اوطفله تبچي:
- مارجع بابا العشاه؟
والورود، اثنين عشره، العَّطراها الموت والدم ابضواه، جتها من مامش مچِان، اطيور خضره، مسحت الظلمه ابجنحها،
اوحاچت احبال المشانق، اخيوط ليلو ترسم الدمعه سؤال:
وين رايح،
يامُهر أسود تشيل،
سيف، والفارس چتيل ؟
••••••••••••••••••••••••••••••••
ليل گمره
والگمر رقاص يتمرجح ضواه
ايلملم الگمره اويطشها، اعلئ السواجي
والشوارع، و المعامل والسنابل، والخناجر والمناير،
والستاير والضماير،
رايه تطفئ اوتعتلگ
ليل گمره
والُمهر جنّاز، والجثه بريد
اودمعة اعيونه ضماير،
بيها چم احسين حاير بيه يزيد
اوبيها چم حمدان بگلوب العبيد
اوبيها چم مهيار ضايع باليريد
اوبيها چم اجناح ناسيه اليصيد
ليل گمره
اوحلمه ذبلانه ابعشگها
اونيه ضمت كل صدگها
اوزنجي ياخذ ِخيره بالدم:
(- عالمناره اهلال مكسور ابضواه، ينعى
وتوذَّن سماه:
- ضحچة الشامت علئ الدم،
كفره تنحر كل صلاه!)
اوخوف يتعب
اوسنگي يلعب
اوشايب اخرس، اشما حچئ گلبه محاه!
ليل گمره
والگصب شهگة مناير، تنطر ابلالك يرد
والتفگ ينشد فشگها:
- مامش اچفوف التشِد؟
••••••••••••••••••••••••••••••
اوشعت السكته جريده ابكل ضمير
اونبعت الخوفه مراجل ما تحير
اوحبلت الگمره ابصباحين اوحرير
•••••••••••••••••••••••••••••••
اوصَّوت البوم ابصداه:
- يابحرهم، مايشيلك مد بعدهم!
يابحرهم، مايشيلك مد بعدهم!
يابحرهم، مايشيلك مد بعدهم!
اونزعت الجثه گبرها
اولبست الچلمه حبرها
اوطلگت الساعه ابصفرها
اونگرة الحافر همس
اوصورة الحافر وطن،
ناسه جيران الشمس
ليل گمره
والجماجم،
عالمشانق
عالسنابل
عالصواري
اوعالتفگ...
احروز لبنادم جديد
اگلوب ينزفها النشيد:
- هذا تاريخك يباچر،
گلب واصبع
چلمه واصبع
چيله واصبع
اولوطفت شمعه، گصبها،
يكتب الدنيه سؤال:
- وين رايح،
يامُهر اسود تشيل،
سيف، و الفارس جتيل؟
••••••••••••••••••••••••••••
فجر فضي
اوورده صفره، جثتك صلّت عليها
اوورده حمره، رسمتك گلبين بيها
اوورده بيضه، ظل ندئ اعيونك عليها
فجر أصفر
اوغيمه زرگه، غلست الدنيه ابصلاه
اونسمه خضره، غسلت انهود الحبايب
والسواجي بالحياه
اوهاله حمره، غسلت الگاع ابنهار،
اوغلست الجثه اومُهرها من نياشين التتار
فجر أحمر
والشوارع، مسحت اوجوه الخرايط،
اوحاچت العالم جديد
اولافته يركض حچيها ابكل گلب ظل عالرصيف
اوريح تعصف
اوريه ترجف
والبيانات ابحبرها اعلئ الرصيف
من چف الچف تحچي اوتهتف
اوناس تطلع
ناس ترجع
والشبابيچ ابضواها اعيون تسطع
والستاير...
چيله ابچيله تصحئ اوتهجع
اوجثه تفتر عالمنازل
اوتفگه تطلگ بالهلاهل
والچفوف، ضيْ مشاعل
والنشيد.....
باب تشبگ رايه جابت كل بعيد
اوحيه تغفئ
اوناي يصفئ
اوچيله بيها النار جنه الكل رغيف
فجر أخضر
والشموس، اتدردغت عالماي،
عالدم،
عالجماجم والزنود.....
اطيور نور، تمسح الدم والحدود
اغيوم نور، اتزخ علئ العالم ورود
••••••••••••••••••••••••••
اورَد علئ ضيفه المضيف
اوندهت الگذله اعلئ شفه اتحلَّمت بيها النهود
اونزعت الدنيه تعبها
اولبست الدنيه گصبها،
اشموع تمشي اويه الدموع
اوصوَّت البوم ابعماه:
- چم يونس ابكل حوت!
چم يونس ابكل حوت!
چم يونس ابكل حوت!
اوكبرت الدنيه ابحلمها
اوكبرت السچه ابجدمها
اوكبرت النجمه ابعلمها
اونگرة الحافر هتاف
اوصورة الحافر فناير، تفرش العالم ضفاف
فجر أبيض
اوشهرزاد،
تسكت اوتغُفئ السوالف بالجواب
اوتغُفئ كل دمعه ابتعبها
اوتغُفئ كل ضحچه ابلعبها
اوتغُفئ كل چلمه ابكتبها
اوحس ربابه ابطارف الدنيه ترتل،
صحوة اجروحك سؤال:
وين رايح،
يامُهر أسود تشيل،
سيف، والفارس چتيل ؟
---------------------
هذه القصيدة كتبت تحت حالة لوحة الفنان العراقي كاظم حيدر المعنونه " مسيح من الجنوب" والمشيرة إلى الشهيد خالد زكي رائد المحاولة الثورية المسلحة في أهوار العراق في الجنوب ، المحاولة التي أشارت.
ش.س
تعليقات
إرسال تعليق