ش. بالثوره اوبس

شاكر السماوي

بالثوره او بس

شد جرحك شعبنه ،او شد
علئ اسلاحك
علئ احلامك
علئ ايامك
علئ التنظيم
بيه أوبيك ، كل فاشي او عميل ايطيح
بس كونك علئ الشدات تصمد

شد جرحك شعبنه، اوهاك
حكمة كل شعب يلگاك:
- ناس اليوم صارت ، و الزمن هم صار ،
صراع ، او خندقين ، او نار
بيها اتهد ضميرك و الحلم و الثار ...
تلگى الناس: ثوره اتجيب ثوره
و السكوت ابكل سكوتي ايموت .
تلگى ادموع كل ذيچ النذور اشموع...
تهدينه ، و الجروح اسطور،
تقراها الليالي او عالليالي اتعيد:
سالوفه شعب لو ثار ...
بيه حتى النعوش اتثور.
تلگلى الروح ، روح ابكل حقيقه اتسوح ،
شعله ابكل ضمير ايشوف :
الثوره ضوه و عيون
تندل الحقيقه
او عالحقيقه بالجدل ترشد

شاكر السماوي
الجزائر 1980-05-16