شاكر السماوي ٦

أشجان عِراقية
شاكر السماوي🌹

حدودك فينا الحدود يا عراق.
وجودك فينا الوجود يا عراق.
و حين تقاذفتنا الحدود، و تقاذفتنا الخرائط، محونا علئ وجع السراب المتسرب فينا ماضي دونما غد، و غداً دونما ماضي ... فوقفنا بينهما إلتفاتات يتيمه صوب مدارات توشمت في الروح أرواحاً ... فكنت الملهم و المستلهم يا عراق.

🌹روحي مشتعله ابقهرها
         شمعه يطويها سهرها
أحلام، و أيام، اوخواطر،
      مره تأخذني علئ اعيوني حدايق    اومره تأخذني علئ اظنوني مشانق.
🌹ع الظلمه فراشه امطرزه ابدم.
    و بدمي فراشه امطرزه ابدم.
🌹وحشه ...
   وأيامي تمرني...
          صفنه تطول،
            اوروح تذبل،
اوموت ياخذني اعلئ حده ابغير رعشه.
🌹ياوطن!...
وينك انت؟...
روحي تندهلك : تعال!...
حتئ لو كلك محن!!
🌹ياطعم الليالي ذيچ، يل بيچ ...
       كل صح، كل غلط،
          كل شوگ و عتاب.
ردي العمر هاذلك، ردي لي:
   همي الما أريده، والأريده
      اوزعل الأحباب
🌹يابيتي البعيد اهناك يل بيك...
تنزفني الجروح اجروح تنبيك:
-عيني ابكل ضوه يعبر علئ الباب.
اوگلبي ابلازعل متروس بعتاب.
اوروحي امساهره لساع ...
ما بين السطور ابذاك الكتاب.
🌹چاوين اليگل للشوگ:
-بيبان الوطن تنده لك ابشوگ...
🌹أنشد ابروحي التجيني
      تنشد اجروحي الغفت
      ع التمني، و التغني،
    و الليالي الما نجم منهن هجرني.
🌹سولف...
يل بعيد اوبالجفون عاتبات.
سولف...
گلبي ديوان الحبايب، و الضماير، و الصداقات.
سولف...
روحي تسمع كل نبض منك-وحگك...
حتئ لو گالوا عليك:
إفلات هم مات.
🌹آهك يا زعل ريسان**
يا رعشه حبيبه، ياصدگ ينشاف إنسان...
(شاحچي؟
    والحچي لو حار...
       مايلگئ الكلام البيه ينگال!)
يا حلم ريسان...
ياوحشة حبيبه،
بارسالة اتدگ علئ البيبان...
(شابچي؟...
    والليالي اهناك، و هنا
       آذني ابوجعهن، و الصبر طال!)
🌹ابهيده!...
   ابهيده يا حبي الهجرني...
ابهيده من تبدي العتاب
ابهيده من تجفيني:
لا!...
لا علئ ليلك تذبني.
ابهيده!... مو تدريني روحك...
روحي مثلي ابكل عذاب...
إجناح فراشه يدولبها الضباب.
🌹ياريت العشگ ما چان...
ماطولك علئ اليهواك
ما تگدر تصير انسان
🌹إذا أنت لم تحترق، حينما أحترق...
فإن احتراقي انتحار**
🌹من تذل روحك تذلني...
          اومن تذلني...
              روحك ابذلي تذل.
🌹اوهاي آخر رساله امن الشهيد اتعيد بالقصه العتيگه، و الشهيد ايزيد :
-من سدوا سجنهم و الأناشيد
سدوا بالگلب طعم المواعيد.
اومن فكوا غدرهم و التوابيت
فكوا بالگلب كل وحشة البيت.
🌹كل طرة فجر هالروح
   تلگاني اعلئ بيبان الوطن مذبوح
🌹من جوئ ابرگبتي اهجس اچفوف
    من برئ اعلئ جفني اهجس
    اچفوف.
🌹بلايه خوف...
        الدنيه عين ابلايه شوف
🌹بچفوفي قرءتها العراف...
   سبع اسنين سوده...
                    اوسبعه ما تنشاف.
  اوسبع دروب حمره...
                   اوسبعه ماتنشاف.
اوسبع شطوط خضره...
                  اوسبعه ماتنشاف.

🌹اوريسان البعيد ايعيد بعيوني الوطن و البار،
و الخوفه الشجاعه، اوجية العيد
اوريسان الجديد ايعيد بعيوني الوطن و الناس
واكتاب امن الشعر، گالوا عليه اجديد.
وينك يا وطن؟...وينك؟...عمينه الشوفتك، وانت:
-ما تفعل تصد عينك؟!

1980 - الجزائر
**********************
🌹ريسان : صديقي الشاعر ريسان الخزعلي الذي ما ودعته و ما ودعني حين افترقنا أيام الوطن.

🌹هذه صياغة خاصة لعبارة ناظم حكمت الشهيرة "اذا انت لم تحترق ، و انا لم أحترق ... فمن سيضيء هذا العالم"

ش.س