شاكر السماوي ٤

تقاسيم علئ الحس المنفرد
شاكر السماوي🌹

ظل
ظل غريب
يا گلب دافي على دمي تغيب
يا لحن يعزف علئ روحي تراتيل الخناجر و الصليب
يا ضمير، صَلي بجروحي ِتشوف...
اجروحي من تكثر تطيب
يا عُمُر ِتنِشد زمانك ع الليالي اللي تجيب...
اوما تجيب!
ظل غريب
(-ما هي جَنتك بيك تمشي،
أوبيك تصدح كل اغاني العندليب!)

ظل غريب
ابلا مواويل اوقوافي
ظل علئ الِذكرئ التجيك اظنون غافي
ظل علئ البوسه شفايف،
بيها تلهث كل شرايينك عوافي
ظل هواجس بيضه ما تحزن عليك،
اشما صدئ اظنونك يخيب

ظل غريب
(- ِشلك ابِظل تعثر ادروبك عليه
اوتعثر إنتَ من يغيب؟!)

ظل غريب
لا تصافي اولا تغيظ
اولا قوافيك ِتشح بيك اوتفيض
اولا رماد اسنينك ايشطك علئ اترابك سراب
كافي تِحزن، كافي تفرح
كافي تسكت، كافي تصرخ
كافي تتحيَّر علئ الدهشه التجيك ابكل غريب
ظل غريب

(-وحدك ايقاعك علئ الوحشه حبيب)

ظل غريب
لا نبع، لا شط، لا مصب
لا شمس، لا عين، لا حب، لا غضب
لا حلم،لا شوف، لا هم، لا سبب
لا ورد يذبل عليك
لا ذنب يزحف بيدك
اولا ندم فايض علئ اضفافه النحيب
             ظل غريب
(- أحلئ ما بالدنيه وحشه
زخه لا ع الگاع نزلت
اولا لگت غيمتها من ردت علئ السچه التغيب !)

ظل غريب
ظل...
ظل غريب.

ش.س🌹