علي الشباني
يهلبت جلمه بيك... تهون
قصيدة: علي الشباني
مستاحش
تمر بيَّ السچچ سكته..وأرد مذبوح
لن طولك بعد ما مش
ولك عمري عطش...عمري مهر مجنون
ولك عمري تعنالك، يهلبت چلمه بيك تهون
آني الطحت بدروبك مذلّه..وهَم
أفر گلبي بسواليفك واطيحن دم
وانتَ امسيّس بكل السواجي اورود
وانتَ امسيّس بكل الگلوب اورود
وبروحي تمر جدحة نجم للگاع
تجرحني ولا عوفك
و اخافن تثگل عيوني من اشوفك
و اطيح بروحي من تجزي حطب والهب...
وانتَ ولا تخضّر عود
ولك خضّر ولو بس ماي
اجيك مناحر السچه، والحچي مترب عله عيوني
و اصابيعي دمع...و امشيلك امرايه
اجيك بحيل فختايه وارد عشگ ما ينگال
واطگ بعيونك المغرب...شذر و هلال
ياخذني عليك الليل... يلطولك سمه... وهلال
أگعد بدربك سمه...وانتَ اكبر بعمري گمر
آني المبعثر سواجي، و انت ها وسعك نهر
آني بيَّ السكته تمشي سنين
تعبان النهر بالماي
ثگلان النهر بالطين
والسكته جسر ع الماي، روحي لياجرف تردين
يا هلبت تجي بلا خوف
زاهي الشوف بعيونك...واحچيلك عليْ الليل كلّه
وترجف بروحي محنّه
غنّه حتى الخوف، بيَّ الماي غنّه
وفاضت بروحي المحنّه
واعتنيت الشوگ بيّه وما خفت...
خافت عيونك عليّ وما خفت
طشريت ايامي، دوهني غرامك حيل
وبروحي تهت
وانت كلش مستريح، وآني من شفتك همت
آني من شفتك شبابيچ العمر وجن ضوه وقداح
وايامي رصيف يروح للملگه...ويرد مرتاح
والبيت اليخضّر لك على العتبه عشب اخضر
و اظل آني على الشوفات...خلگ يزغر
خلگ يكبر
وتظل انت على ايامي حرير اشگر
١٩٤٦-٢٠١١
تعليقات
إرسال تعليق